ആലപ്പുഴ: മെഡലിനെകുറിച്ച് ചിന്തിക്കേണ്ട, അത് നിങ്ങളെ തേടിയെത്തും; മികച്ച പ്രകടനമാണ് നിങ്ങള് നടത്തേണ്ടത് എങ്കില് നിങ്ങള് നിങ്ങള് ചരിത്രത്തിന്റെ ഭാഗമാകും. പറയുന്നത് മറ്റാരുമല്ല കേരള താരങ്ങളെ മാസിക പിരിമുറക്കങ്ങളില്പെടാതെ ആത്മവിശ്വാസം പകര്ന്ന് നല്കാന് സംസ്ഥാന സ്പോര്ട്സ് കൗണ്സില് നിയോഗിച്ച വിദഗ്ധ സംഘം. ആദ്യമായാണ് കേരളം ദേശീയ ഗെയിംസിലെ താരങ്ങളെ സഹായിക്കാന് ഇത്തരമൊരു സംഘത്തെ നിയോഗിക്കുന്നത്. ആറംഗ സംഘത്തെയാണ് നിയോഗിച്ചിട്ടുള്ളത്.
ഒരേ ടീമില് മത്സരിക്കുന്ന താരങ്ങള് തന്നെ വ്യത്യസ്ത മാനസിക നിലകള് ഉള്ളവരാണ്. ഇവരുടെ മനസ് ഓരേ ലക്ഷ്യത്തിലേക്ക് എത്തിക്കുകയാണ് തങ്ങളുടെ ലക്ഷ്യമെന്ന് വിദഗ്ധ സംഘത്തിലെ അംഗങ്ങളായ ഡോ. സോണി ജോണും ഡോ. വിപിന് വി. റോന്ഡാന്റും പറയുന്നു. വ്യക്തിപരമായ സംശയങ്ങള്ക്കുള്ള മറുപടികളും സ്വയം ആത്മവിശ്വാസം വര്ദ്ധിപ്പിക്കാനുള്ള ഇടപെടലുകളുമാണ് ഇവര് പ്രധാനമായും നടത്തുന്നത്.
മെഡലിനെ കുറിച്ച് പറഞ്ഞ് താരങ്ങളെ സമ്മര്ദ്ദത്തിലാക്കുന്നതാണ് പലപ്പോഴും മെഡല് പ്രതീക്ഷയുള്ള താരങ്ങളെ പോലും പുറകോട്ടടിക്കുന്നതെന്ന് ഇവര് പറയുന്നത്. ആത്മവിശ്വാസം വര്ദ്ധിപ്പിക്കുന്ന വീഡിയോകളുടെ പ്രദര്ശനങ്ങളും ഗ്രൂപ്പായും വ്യക്തിപരമായുമുള്ള ആശയവിനിമയങ്ങളുമാണ് താരങ്ങള്ക്കായി ഇവര് ഒരുക്കുന്നത്.
