കൂട്ടിക്കല്: ഇളംകാട്- അടിവാരം റോഡിന്റെ സംരക്ഷണ ഭിത്തി തകര്ന്നു. കൂട്ടിക്കല് പഞ്ചായത്തില് പെട്ട ഇളംകാട് -അടിവാരം റോഡില് കൊടുങ്ങ സുബ്രഹ്മണ്യസ്വാമി ക്ഷേത്രത്തിനു സമീപമാണ് റോഡിന്റെ സംരക്ഷണ ഭിത്തി ഇടിഞ്ഞു പോയത്. ഇതോടെ ഈ മേഖലയിലേക്കുളള യാത്ര നിലച്ചിരിക്കുകയാണ്. നൂറുകണക്കിനു കുടുംബങ്ങള് തിങ്ങിപാര്ക്കുന്ന മേഖലയിലെ പ്രധാന റോഡ് തകര്ന്നതോടെ ജനം യാത്രാ ബുദ്ധിമുട്ടിലാണ്. സമീപത്തെ പാറമടയിലേക്കു ദിനംപ്രതി നൂറുകണക്കിനു ടോറസ് വാഹനങ്ങളടക്കം വലിയ വാഹനങ്ങള് കടന്നു പോകുന്നതാണ് റോഡിന്റെ സംരക്ഷണ ഭിത്തി തകരാന് കാരണമെന്ന് നാട്ടുകാര് കുറ്റപ്പെടുത്തി. റോഡ് തകരുന്നത് സംബന്ധിച്ച് നിരവധി തവണ അധികാരികള്ക്കുമുന്നില് പരാതിയുമായി എത്തിയെങ്കിലും പ്രയോജനപ്പെട്ടില്ലന്നും നാട്ടുകാര് പറയുന്നു. സംരക്ഷണ ഭിത്തി തകര്ന്നതോടെ ഇതു വഴി ഓട്ടോറിക്ഷകള്ക്കു മാത്രമെ കടന്നുപോകാനാവൂ. ഇതോടെ സ്കൂള് ബസ്സുകളടക്കമുളള വാഹനങ്ങളുടെ ഗതാഗതം നിലച്ചിരിക്കുകയാണ്.
















