ഈരാറ്റുപേട്ട: പൂഞ്ഞാര് നിയോജക മണ്ഡലത്തിലെ കുടിവെള്ള പ്രശ്നത്തിന് ശാശ്വത പരിഹാരമാകുന്നു. സ്ഥലം എംഎല്എ പി.സി. ജോര്ജിന്റെ ശക്തമായ ഇടപെടലിനെ തുടര്ന്ന് നിയോജക മണ്ഡലത്തിലെ ഈരാറ്റുപേട്ട, മുണ്ടക്കയം എന്നിവിടങ്ങളില് ജല അതോറിട്ടിയുടെ സെക്ഷന് ഓഫീസ് വൈകാതെ പ്രവര്ത്തനം ആരംഭിക്കും. ഓഫീസുകള് അനുവദിച്ച് കൊണ്ട് ജലവിഭവ വകുപ്പ് കഴിഞ്ഞദിവസം ഉത്തരവിറക്കി. മന്ത്രി പി.ജെ. ജോസഫുമായി ചീഫ് വിപ്പ് പി.സി. ജോര്ജ് നടത്തിയ ചര്ച്ചകളെ തുടര്ന്നാണ് തീരുമാനം.
നിലവില് പൊന്കുന്നം, പാലാ സബ്ഡിവിഷന് ഓഫീസുകളില് നിന്നായിരുന്നു പൂഞ്ഞാര് നിയോജക മണ്ഡലത്തിലെ 12 പഞ്ചായത്തുകളില് കുടിവെള്ള വിതരണം നടത്തിയിരുന്നത്.
വിവിധ പഞ്ചായത്തുകളില് കുടിവെള്ള പൈപ്പുകള് പൊട്ടി ജലം പാഴാകുന്നത് നിത്യസംഭവമായിരുന്നു. വേനല്ക്കാലമെത്തുന്നതോടെ നിയോജക മണ്ഡലത്തിലെ മിക്ക പഞ്ചായത്തുകളിലും രൂക്ഷമായ കുടിവെള്ള ക്ഷാമമാണ് നേരിട്ടിരുന്നത്. ഇത്തരം പരാതികള്ക്കാണ് പുതിയ ഓഫീസുകള് പ്രവര്ത്തനം ആരംഭിക്കുന്നതോടെ പരിഹാരമാവുക. മുണ്ടക്കയം സെക്ഷന് ഓഫീസ് പരിധിയില് പാറത്തോട്, മുണ്ടക്കയം, കോരുത്തോട്, കൂട്ടിക്കല്, എരുമേലി പഞ്ചായത്തുകളും ഈരാറ്റുപേട്ട സെക്ഷന് ഓഫീസ് പരിധിയില് തിടനാട്, തലനാട്, തലപ്പുളം, പൂഞ്ഞാര്, പൂഞ്ഞാര് തെക്കേക്കര, തീക്കോയി തുടങ്ങിയ പഞ്ചായത്തുകളെയും ഉള്പ്പെടുത്തിയാണ് ഓഫീസുകളുടെ പ്രവര്ത്തനം ആരംഭിക്കുക. പുതിയ ഓഫീസുകള് പ്രവര്ത്തനം ആരംഭിക്കുന്നതുവരെ പ്രാരംഭ പ്രവര്ത്തനങ്ങള്ക്ക് പാലാ അസി. സെക്ഷന് ഓഫീസര്ക്കാണ് മേല്നോട്ട ചുമതല.
