വൈക്കം: മഹാദേവ ക്ഷേത്രത്തിലെ അഷ്ടമിയുല്സവത്തിന്റെ ഭാഗമായി, വടയാര് സമൂഹമഠം നടത്തുന്ന സന്ധ്യവേലയും പ്രാതല് വഴിപാടും ഒറ്റപ്പണസമര്പ്പണവും ഇന്ന് ആചാര വ്രതാനുഷ്ടാനങ്ങളോടെ നടത്തും. വൈക്കത്തഷ്ടമിയുടെ മുന്നോടിയായുള്ള സന്ധ്യവേലകളുടെ സമാപനം കുറിക്കുന്നതാണ് വടയാര് സമൂഹമഠത്തിന്റെ സന്ധ്യവേല. നൂറ്റാണ്ടുകളായി നിലനില്ക്കുന്ന ആചാരമാണിത്.
ചൊവ്വാഴ്ചത്തെ പ്രാതലിനുള്ള അരിയളക്കല് ദേവസ്വം കലവറയില് നടത്തി. മാന്യസ്ഥാനത്ത് ഇലവെച്ച് വൈക്കത്തപ്പന് വിളമ്പിയ ശേഷമാണ് ഭക്തജനങ്ങള്ക്ക് പ്രാതല്സദ്യ വിളമ്പുന്നത്. സന്ധ്യാവേലയ്ക്ക് മുന്പായി അനുഷ്ടാന ചടങ്ങായ ക്ഷേത്രദര്ശനം ഇന്നലെ പൂര്ത്തിയാക്കി. കുടുംബക്ഷേത്രങ്ങളായ തൃപ്പക്കുടം, ഇളംകാവ്, വാക്കയില്, പുണ്ഡരികപുരം, ടിവി പുരം, ഉദയനാപുരം ക്ഷേത്രങ്ങള് സമൂഹമഠാംഗങ്ങള് സന്ദര്ശിച്ച് അനുഗ്രഹം വാങ്ങി. സമൂഹം പ്രസിഡന്റ് എം.ഈശ്വരയ്യര്, സെക്രട്ടറി എന്.ഹരിഹരയ്യര്, വൈസ് പ്രസിഡന്റ് ഡോ.എം.പി.ശര്മ്മ, ജോ.സെക്രട്ടറി പി.പത്മനാഭയ്യര് എന്നിവരുടെ നേതൃത്വത്തിലാണ് ക്ഷേത്രദര്ശനം പൂര്ത്തിയാക്കിയത്.
അനുഷ്ടാനചടങ്ങായ ഒറ്റപ്പണ സമര്പ്പണം ദീപാരാധനയ്ക്കു ശേഷം ക്ഷേത്രനടയില് നടത്തും.
പ്രതികരിക്കാൻ ഇവിടെ എഴുതുക: