മണ്ണാര്ക്കാട്: കാഴ്ചയും കേള്വിയും പരിമിതമായ കുട്ടികള്ക്ക് ലോകം അനുഭവങ്ങളിലൂടെയും സ്പര്ശനത്തിലൂടെയും ഭാവനയിലൂടെയുമാണ്. അവരുടെ ഓരോ നേട്ടത്തിനും പിന്നില് സാധാരണ പരിശ്രമങ്ങള്ക്കപ്പുറമുള്ള ആത്മവിശ്വാസവും ഇച്ഛാശക്തിയുമുണ്ട്. പാലക്കാട് മണ്ണാര്ക്കാട്ട് തുടരുന്ന സ്കൂള് ശാസ്ത്ര മേള അത്തരം അനുഭവങ്ങള്ക്ക് സാക്ഷിയാകുന്നു. ഭിന്നശേഷി വിഭാഗത്തില്, പരിമിതികള്ക്കു മുന്നില് പിന്മാറാതെ അറിവിന്റെ പുതിയ ആകാശം തേടുന്ന കുരുന്നുകള് കഴിവുകള് കൊണ്ട് വിസ്മയം തീര്ക്കുന്നു.
കുട നിര്മാണത്തിനിടെ കൈയില് സൂചി തറച്ചപ്പോഴും പിന്മാറിയില്ല ഏഴാം ക്ലാസുകാരി അഡോണ ഷിജോ. സ്വന്തം കൈകളാല് കുടയുണ്ടാക്കാനെടുത്തത് രണ്ടര മണിക്കൂര്.
സൂചിയും നൂലുമുപയോഗിച്ച് ഓരോ ഘട്ടവും സ്വയം പൂര്ത്തിയാക്കുന്നതിനിടെ കൈയില് സൂചി തറച്ചെങ്കിലും ശ്രമം ഉപേക്ഷിച്ചില്ല. കാഴ്ചയുടെ പരിമിതികള്ക്കിടെയും സ്വന്തം കഴിവില് വിശ്വാസമര്പ്പിച്ച് കുട നിര്മാണം പൂര്ത്തിയാക്കിയ അഡോണ ശാസ്ത്രമേളയിലെ വേറിട്ട കാഴ്ചയാണ്.
കോട്ടയം ഒളശ്ശ ഗവ. ഹൈസ്കൂള് ഫോര് ദ് ബ്ലൈന്ഡിലെ വിദ്യാര്ത്ഥിയാണ്. തൊടുപുഴ സ്വദേശികളായ ഷിജോ- മഞ്ജു ദമ്പതികളുടെ ഇളയ മകള്. ശാസ്ത്ര മേളയിലെ ഇത്തരം കുട്ടികളുടെ സാന്നിദ്ധ്യം മത്സരത്തിനും സമ്മാനങ്ങള്ക്കും അപ്പുറമുള്ള സന്ദേശമാണ് നല്കുന്നത്. സ്പര്ശനത്തിലൂടെയും അനുഭവങ്ങളിലൂടെയും ചിന്തയിലൂടെയും പുതിയ സാധ്യതകള് കണ്ടെത്തുകയാണ് അവര്.


















