സമകാലിക കേരളത്തിന്റെ സാമൂഹിക കുടുംബ ജീവിതത്തില് അതിപ്രാധാന്യത്തോടെ ചര്ച്ച ചെയ്യപ്പെടേണ്ട ഒരു വിഷയമാണ് ‘പുര നിറയുന്ന പുരുഷന്മാര്’ എന്ന ലേഖനപരമ്പരയിലൂടെ രഞ്ജിത് മുരളി അവതരിപ്പിച്ചത്. പ്രായം കടന്നിട്ടും അനുയോജ്യരായ ജീവിതപങ്കാളിയെ കണ്ടെത്താന് കഴിയാതെ അവിവാഹിതരായി തുടരേണ്ടി വരുന്ന യുവാക്കളുടെ എണ്ണം വര്ധിച്ചുവരുന്നതിന്റെ മാനസികവും സാമൂഹികവും സാമ്പത്തികവുമായ കാരണങ്ങളാണ് ഈ ലേഖന പരമ്പര ചര്ച്ച ചെയ്തത്. കോഴിക്കോട് കാരന്തൂര് ഹരഹര മഹാദേവ ക്ഷേത്രത്തില് സംഘടിപ്പിച്ച വിവാഹ രജിസ്ട്രേഷന് ക്യാമ്പില് സംഘാടകര് പ്രതീക്ഷിച്ച ആയിരം പേര്ക്ക് പകരം 7000-ത്തിലധികം ആളുകള് എത്തിയത് കേരളത്തിലെ മാറുന്ന സാമൂഹിക അവസ്ഥയാണ് കാണിച്ചുതരുന്നത്.
2024-ലെ സാമ്പിള് രജിസ്ട്രേഷന് സിസ്റ്റം റിപ്പോര്ട്ട് പ്രകാരം സ്ത്രീകളുടെ ശരാശരി വിവാഹപ്രായം 2014-ല് 23.8 ആയിരുന്നത് 24.5 വയസ്സായി ഉയര്ന്നു. 20-49 പ്രായപരിധിയിലുള്ള പുരുഷന്മാരില് 35.9 ശതമാനവും സ്ത്രീകളില് 10.2 ശതമാനവും അവിവാഹിതരാണെന്ന കണക്കുകള് ആശങ്കയുണ്ടാക്കുന്നതാണ്. കൂടാതെ ദേശീയ കുടുംബാരോഗ്യ സര്വേയുടെ അഞ്ചാം ഘട്ടം അനുസരിച്ച് കേരളത്തിലെ മൊത്തം പ്രത്യുത്പാദന നിരക്ക് ദേശീയ ശരാശരിയായ 1.9-നേക്കാള് കുറഞ്ഞ് 1.5-ല് എത്തിയിരിക്കുന്നു.
സര്ക്കാര് ജോലി, സ്ഥിരവരുമാനം, സ്വന്തം വീട്, ഉയര്ന്ന വിദ്യാഭ്യാസം എന്നിങ്ങനെ നിരവധി നിബന്ധനകളാണ് ഇന്ന് വിവാഹാലോചനാ വേദികളില് മുന്നില് നില്ക്കുന്നത്. സാമ്പത്തിക സ്വാതന്ത്ര്യം ലഭിച്ചുതുടങ്ങിയതോടെ വിവാഹാനന്തരം ജോലി ഉപേക്ഷിക്കേണ്ടി വരുന്നതോ വ്യക്തിസ്വാതന്ത്ര്യത്തില് കുറവ് വരുന്നതോ ആയ സാഹചര്യങ്ങള് അംഗീകരിക്കാന് പെണ്കുട്ടികള് വിമുഖത കാട്ടുന്നു. വിദേശത്ത് പഠിക്കാനും ജോലി ചെയ്യാനും ആഗ്രഹിക്കുന്ന പെണ്കുട്ടികള് അതിന് അനുയോജ്യരായ വരന്മാരെയാണ് ആഗ്രഹിക്കുന്നത്.
അതുപോലെ മറ്റൊരു പ്രതിസന്ധിയാണ് ജാതിയും ജാതകവും. ആധുനികരാകുമ്പോഴും കേരളത്തിന്റെ വിവാഹവേദിയില് ജാതിയും ഉപജാതിയും ജാതകപ്പൊരുത്തവുമൊക്കെ ഇന്നും നിര്ണായക ഘടകങ്ങള് തന്നെയാണ്. പരസ്പരം ഇഷ്ടപ്പെടുന്നവരുടെ വിവാഹങ്ങള് പോലും ചൊവ്വാദോഷത്തിന്റെയും ദശാസന്ധിയുടെയും പേരില് മുടങ്ങിപ്പോകുന്ന സാഹചര്യം സമൂഹത്തില് നിലനില്ക്കുന്നു.
കേരളത്തില് വധുവിനെ ലഭിക്കാതെയായതോടെ അന്യസംസ്ഥാനങ്ങളിലേക്ക് വധുവിനെ തേടി പോകുന്നവരുടെ എണ്ണം വര്ധിക്കുന്നു. അതോടൊപ്പം ഈ നിസ്സഹായാവസ്ഥ മുതലെടുത്ത് നടത്തുന്ന തട്ടിപ്പുകളുടെ എണ്ണവും കൂടുന്നു. നാഷണല് ക്രൈം റെക്കോര്ഡ്സ് ബ്യൂറോയുടെ കണക്കുപ്രകാരം 2020-ല് 854 ആയിരുന്ന മാട്രിമോണിയല് തട്ടിപ്പ് പരാതികള് 2021-ല് 1128 ആയി ഉയര്ന്നു.
ഈ വിഷയം കേവലം വ്യക്തികളുടെയോ ഏതാനും കുടുംബങ്ങളുടെയോ മാത്രം പ്രശ്നമല്ല, മറിച്ച് സമൂഹത്തെ മുഴുവന് ബാധിക്കുന്ന ഒന്നാണ്. വിവാഹം വൈകുന്നതും അവിവാഹിതരുടെ എണ്ണം കൂടുന്നതും കുട്ടികളുടെ അനുപാതം കുറയുന്നതിനും മുതിര്ന്നവരുടെ അനുപാതം കൂടുന്നതിനും കാരണമാകുന്നു. ഇത് ഭാവിയില് പല തരത്തിലുള്ള സാമൂഹിക പ്രതിസന്ധികള്ക്ക് വഴിതെളിക്കും. വിവാഹമായില്ലേ എന്ന നിരന്തരമായ അന്വേഷണങ്ങള് യുവാക്കളെയും മാതാപിതാക്കളെയും സമ്മര്ദ്ദത്തിലാക്കുന്നു. ഇത് പിന്നീട് വിഷാദരോഗത്തിലേക്കും സാമൂഹിക ഒറ്റപ്പെടലിലേക്കും നയിക്കുന്നു. ഇതോടൊപ്പം വിവാഹമോചനങ്ങളുടെ എണ്ണത്തിലുണ്ടാകുന്ന വര്ധനവ് കുടുംബബന്ധങ്ങളുടെ തകര്ച്ചയെ സൂചിപ്പിക്കുന്നു.
വളരെ കാലികപ്രസക്തമായ ഒരു വിഷയം കേവലം ഒരു വാര്ത്ത എന്നതിലുപരി കൃത്യമായ സ്ഥിതിവിവരക്കണക്കുകളുടെയും യഥാര്ത്ഥ ജീവിതാനുഭവങ്ങളുടെയും പിന്ബലത്തോടെ അവതരിപ്പിച്ച ലേഖകന് പ്രത്യേകം അഭിനന്ദനം അര്ഹിക്കുന്നു. പ്രശ്നങ്ങള് ചൂണ്ടിക്കാണിക്കുക മാത്രമല്ല, അതിനുള്ള പ്രായോഗിക പരിഹാരങ്ങളും മുന്നോട്ടുവയ്ക്കുന്നു. മാട്രിമോണിയല് സൈറ്റുകള്ക്കും ബ്രോക്കര്മാര്ക്കും പകരം തദ്ദേശസ്ഥാപനങ്ങള്, സമുദായ സംഘടനകള്, റസിഡന്റ്സ് അസോസിയേഷനുകള് എന്നിവയുടെ നേതൃത്വത്തില് വിശ്വാസ്യതയുള്ള വിവാഹനടത്തിപ്പ് സംവിധാനങ്ങള് ഒരുക്കേണ്ടതിന്റെ ആവശ്യകത, ശാസ്ത്രീയമായ വിവാഹപൂര്വ കൗണ്സിലിംഗിന്റെ പ്രസക്തി, പുനര്വിവാഹത്തോടുള്ള സമൂഹത്തിന്റെ വിമുഖത മാറേണ്ടതിന്റെ ആവശ്യകത തുടങ്ങിയവയെല്ലാം ലേഖനത്തെ മികച്ചതാക്കുന്നു.
രണ്ടു വ്യക്തികളുടെ സ്നേഹത്തിന്റെയും ബഹുമാനത്തിന്റെയും ഒത്തുചേരലാകണം വിവാഹം എന്ന സന്ദേശമാണ് പരമ്പര മുന്നോട്ടുവയ്ക്കുന്നത്. സമൂഹത്തിന്റെ കണ്ണുതുറപ്പിക്കുന്ന അന്വേഷണാത്മക പത്രപ്രവര്ത്തന ശ്രമങ്ങള് ഇനിയും ഉണ്ടാകട്ടെ. ലേഖകനും ജന്മഭൂമിക്കും അഭിനന്ദനങ്ങള്…
അഡ്വ. ജി. അഞ്ജനാദേവി
ദേശീയ വനിതാ കമ്മിഷന്
ഉപദേശക സമിതിയംഗം


















