മണ്ണാര്ക്കാട്: കണ്ണുകള്ക്ക് കാണാനാകാത്ത കാഴ്ചകള് വിരല്ത്തുമ്പുകളിലൂടെ തിരിച്ചറിയാം. മനസ്സില് തെളിയുന്ന രൂപങ്ങള്ക്ക് കൈകളിലൂടെ ജീവന് നല്കാം. കാഴ്ചയുടെ പരിമിതികള്ക്കിടയിലും സ്വന്തം കഴിവുകൊണ്ട് പുതിയ ലോകം നെയ്തെടുക്കുകയാണ് മൂന്നാം ക്ലാസുകാരി അനഘ ബാബുക്കുട്ടന്. കസേര നെയ്ത്തുമായി രണ്ടാം തവണയാണ് അനഘ സംസ്ഥാന ശാസ്ത്രമേളയുടെ വേദിയിലെത്തുന്നത്. കോട്ടയം കാഞ്ഞിരപ്പള്ളി അസീസി സ്കൂള് ഫോര് ദ ബ്ലൈന്ഡിലെ വിദ്യാര്ത്ഥിനിയാണ് അനഘ. കഴിഞ്ഞ തവണ മത്സരത്തില് എ ഗ്രേഡും സ്വന്തമാക്കി. ആനേട്ടത്തിന്റെ ആത്മവിശ്വാസത്തിലാണ് ഇത്തവണയും മത്സരത്തിനെത്തുന്നത്. ചങ്ങനാശ്ശേരിയിലെ ബാബു-രാജി ദമ്പതികളുടെ മകളാണ്.


















