തൃശ്ശൂര്: പൂരങ്ങളുടെ പൂരമായ തൃശ്ശൂര് പൂരം പ്രമേയമാക്കിയുള്ള എട്ട് ആല്ബങ്ങള് ഒരുക്കിയ ഗാനരചയിതാവും സംവിധായകനുമാണ് ഹരി പി. നായര്. തൃശ്ശൂര് പൂരത്തെ വരികളിലൂടെ, വര്ണ്ണനകളിലൂടെ അതിമനോഹരമായി അവതരിപ്പിച്ച എട്ട് ആല്ബങ്ങള്ക്ക് രചനയും സംവിധാനവും നിര്വഹിക്കുകയെന്ന മറ്റാരും ചെയ്തിട്ടില്ലാത്ത അപൂര്വ്വതയുടെ തിളക്കമുണ്ട് ഹരി പി. നായരുടെ ഈ സര്ഗ്ഗസൃഷ്ടികള്ക്ക്. പൂരം മനോഹരം, ഉടന് പൂരം, ദുബായ് പൂരം, ഹൃദയത്തില് പൂരം, തൃപ്പൂരം, പൂരപ്രേമം, കടലിനക്കരെ പൂരം, പൂരപ്രണയം തുടങ്ങിയ ആല്ബങ്ങള് ഓരോന്നും പൂരത്തിന്റെ വൈവിധ്യതകളെ വരച്ചുകാണിക്കുന്നു. ഇന്ദുലേഖ ആലപിച്ച് രചന, മാളവിക, ഗായത്രി സുരേഷ് എന്നീ നായികമാര് അഭിനയിച്ച ‘പൂരം മനോഹരം’ ശാസ്ത്രീയ സംഗീത നൃത്താവിഷ്ക്കാരമാണ്. രാജ്കലേഷും മാത്തുക്കുട്ടിയും പ്രത്യക്ഷപ്പെട്ട അടിപൊളി പാട്ടിന്റെ ഈണപ്പകര്ച്ച നിറഞ്ഞ ‘ഉടന്പൂരം’ രഞ്ജിത്ത് ഉണ്ണിയാണ് ആലപിച്ചത്.
അനൂപ് ശങ്കര് ആലപിച്ച ‘ദുബായ് പൂര’ വും സന്നിധാനന്ദന് ആലപിച്ച ‘കടലിനക്കരെ പൂര’ വും ദുബായില് നടന്ന തൃശ്ശൂര് പൂരാഘോഷങ്ങളുടെ പുതുമ നിറഞ്ഞതാണ്.
കൊറോണക്കാലത്തെ പുരസ്മരണകളാണ് ‘ഹൃദയത്തില് പൂരം’ എന്ന ആല്ബത്തിന്റെ ഇതിവൃത്തം. വിജേഷ് ഗോപാലാണ് ആലപിച്ചിരിക്കുന്നത്. കുട്ടികളുടെ മനസ്സിലെ പൂ
രം പകര്ത്തിവെച്ച ‘തൃപ്പൂരം’ എന്ന ആല്ബത്തില് വിജേഷ് ഗോപാലിനൊപ്പം കൃഷ്ണദിയയും പാടിയിരിക്കുന്നു.
പൂരപ്രേമികള് ഏറ്റുപാടിയ ഗാനമാണ് പോയ വര്ഷം സന്നിധാനന്ദന് പാടിയ ‘പൂരപ്രേമം.’ ഈ വര്ഷം പുറത്തിറക്കിയിരിക്കുന്ന’പൂരപ്രണയം’ എന്ന ആല്ബത്തിന് രഞ്ജിത്ത് ഉണ്ണിയാണ് സ്വരം പകര്ന്നിരിക്കുന്നത്.
ഓരോ ആല്ബങ്ങളുടെയും പൂര്ത്തീകരണത്തില് അരങ്ങിലും അണിയറയിലുമായി നിരവധി പ്രതിഭകളുടെ സര്ഗ്ഗാത്മകമായ സംഭാവനകളുണ്ട്. മലയാള ദൃശ്യമാധ്യമരംഗത്ത് രണ്ടുപതിറ്റാണ്ടിലേറെയായി സജീവസാന്നിധ്യമാണ് ഹരി.ചലചിത്ര തിരക്കഥാകൃത്ത്, ടോലിവിഷന് ഷോ ഡയറക്ടര്, അവതാരകന്, ഗാനരചയിതാവ്, പ്രഭാഷകന് എന്നിങ്ങനെ ബഹുമുഖപ്രതിഭയാണ് ഹരി പി. നായര്. കൊച്ചിന് ദേവസ്വം ബോര്ഡ് സെക്രട്ടറിയായിരുന്ന വടാശ്ശേരി തങ്കപ്പന്നായരുടേയും സാന്തകുമാരിയുടേയും മകനായി തൃശൂര് കോടന്നൂര് ശാസ്താംകടവിലാണ് ഹരിയുടെ ജനനം. ഊര്ജതന്ത്രത്തില് ബിരുദധാരിയായ ഹരി തിരുവനന്തപുരം പ്രസ്ക്ലബില്നിന്നും ജേണലിസത്തില് പി.ജി നേടിയിട്ടുണ്ട്.
എട്ടുവര്ഷം ഏഷ്യാനെറ്റില് പ്രോഗ്രാം പ്രൊഡ്യൂസറായിരുന്നു. ഹരിശ്രീ ക്രിയേഷന്സ് എന്ന സ്വന്തം പ്രൊഡക്ഷന് ഹൗസിന്റെ ബാനറില് വിഷ്വല്മീഡിയ പ്രവര്ത്തനങ്ങള് നടത്തുന്നു. മമ്മൂട്ടി നായകനായ ഗാനഗന്ധര്വന്, ജയറാമും കുഞ്ചാക്കോ ബോബനും അഭിനയിച്ച പഞ്ചവര്ണത്തത്ത എന്നീ ചിത്രങ്ങളുടെ രചന രമേഷ് പിഷാരടിക്കൊപ്പം നിര്വഹിച്ചു. ലോഹിതദാസ് സംവിധാനം ചെയ്ത നിവേദ്യമാണ് ആദ്യമായി അഭിനയിച്ച സിനിമ. ഹൗസ് ഫുള് എന്ന മലയാള ചലചിത്രത്തിന്റെ കാസ്റ്റിങ്ങ് ഡയറക്ടറായിരുന്നു. ഓര്മയില് എന്നും, വണ്സ് അപോണ് എ ടൈം തുടങ്ങി നിരവധി ടെലിവിഷന് പരിപാടികളുടെ സംവിധായകനായിരുന്നു. ഹരി രചിച്ച 84 ഗാനങ്ങളടങ്ങിയ ഹരിഗീതം എന്ന കാവ്യപുസ്തകം സാഹിത്യാസ്വാദകരുടെ അഭിനന്ദനങ്ങളേറ്റുവാങ്ങി. കുട്ടികളിലും യുവാക്കളിലം വ്യക്തിവികാസം ഉദ്ദേശിച്ച് സദ്ഗമയ, കിഡ്സ് സ്കൈ എന്നീ ക്ലാസ്സുകള് നടത്തിവരുന്നു.
തൃശൂര് പൂരത്തോടനുബന്ധിച്ച് എട്ടുവര്ഷമായി പൂരപ്പാട്ടുകളുടെ ആല്ബം പുറത്തിറക്കിയ ഹരി പി. നായരെ തൃശൂര് സാഹിതിയും ലിറ്റററി ഫോറവും ചേര്ന്ന് കഴിഞ്ഞദിവസം ആദരിച്ചിരുന്നു.
ജന്മഭൂമി ഓണ്ലൈന്