ന്യൂദല്‍ഹി: രാഷ്‌ട്രീയ സ്വയംസേവക സംഘത്തിന്റെ 101-ാം സ്ഥാപക ദിനത്തില്‍, സംഘടനയിലെ പ്രവര്‍ത്തകര്‍ക്ക് പ്രധാനമന്ത്രി നരേന്ദ്ര മോദി ആശംസകള്‍ നേര്‍ന്നു.സേവനം, രാഷ്‌ട്രനിർമ്മാണം, സാമൂഹിക ഐക്യം എന്നിവയിൽ ശ്രദ്ധേയമായ ഒരു നൂറ്റാണ്ട് ആർ എസ്എസ് പൂർത്തിയാക്കിയെന്ന് അദ്ദേഹം സമൂഹമാധ്യമത്തിൽ കുറിച്ചു.
അഗാധമായ കടമബോധത്തോടും, ‘രാഷ്‌ട്രം ആദ്യം’ എന്ന ചിന്തയോടും കൂടി ഈ സംഘടനയിലെ അസംഖ്യം പ്രവർത്തകർ സമൂഹത്തിനായി പ്രവർത്തിച്ചിട്ടുണ്ടെന്ന് അദ്ദേഹം ചൂണ്ടിക്കാട്ടി. വരുംകാലങ്ങളിലും ഈ മനോഭാവം ദേശീയ വികസനത്തിന് കൂടുതൽ കരുത്തേകട്ടെ എന്ന് പ്രധാനമന്ത്രി ആശംസിച്ചു.
‘രാഷ്‌ട്രം ആദ്യം’ എന്ന ചിന്തയോടും അചഞ്ചലമായ പ്രതിബദ്ധതയോടും കൂടി, ഭാരതമാതാവിന്റെ സേവനത്തിനായി ആർ എസ് എസ് സ്വയംസേവകർ സമർപ്പിതരാണെന്ന് കേന്ദ്ര ആഭ്യന്തര മന്ത്രി അമിത് ഷാ പറഞ്ഞു. ശക്തവും സമൃദ്ധവും സ്വയംപര്യാപ്തവുമായ ഒരു ഭാരതം കെട്ടിപ്പടുക്കാനുള്ള ദൃഢനിശ്ചയത്തിന്, രാജ്യത്തുടനീളമുള്ള ആർ എസ് എസ് സ്വയംസേവകർ നടത്തുന്ന സേവന പ്രവർത്തനങ്ങൾ കരുത്തുപകരുന്നത് തുടരുന്നുവെന്നും അദ്ദേഹം കൂട്ടിച്ചേർത്തു.
