പനാജി : പാറ്റാ പാർട്ടി നടത്തിയ പ്രതിഷേധത്തിനിടെ ഹിന്ദുക്കൾക്കെതിരെ മുദ്രാവാക്യം . പനാജിയിൽ നടന്ന ‘കോക്രോച്ച് ജനതാ പാർട്ടി’ പ്രതിഷേധത്തിലാണ് ‘മുർദാബാദ്, മുർദാബാദ്, ഹിന്ദുത്വ മുർദാബാദ്’ തുടങ്ങിയ മുദ്രാവാക്യങ്ങൾ മുഴക്കിയത്. സംഭവത്തിൽ പ്രതിഷേധത്തിൽ പങ്കെടുത്ത തിരിച്ചറിയപ്പെടാത്ത മുന്നൂറോളം പേർക്കെതിരെ ഗോവ പോലീസ് എഫ്.ഐ.ആർ രജിസ്റ്റർ ചെയ്തു. ചീഫ് ഇലക്ഷൻ കമ്മീഷണർ ഗ്യാനേഷ് കുമാറിനെതിരെ നടന്ന പ്രതിഷേധത്തിനിടെ, ഇവർ ഹിന്ദു വിരുദ്ധ മുദ്രാവാക്യങ്ങൾ മുഴക്കുകയായിരുന്നു.
തലൈഗാവോ സ്വദേശിയായ രാംപ്രസാദ് കേൽക്കറാണ് പരാതി നൽകിയത്. ഒക്ടോബർ 11-ന് നടന്ന പ്രതിഷേധത്തിന്റെ, സമൂഹമാധ്യമങ്ങളിൽ പ്രചരിച്ച വീഡിയോ അദ്ദേഹം ഇതിന് തെളിവായി ചൂണ്ടിക്കാട്ടി. മതപരമായ അസ്വാരസ്യങ്ങൾ വളർത്തുന്ന തരത്തിലുള്ള മുദ്രാവാക്യങ്ങളാണ് പ്രതിഷേധക്കാർ മുഴക്കിയതെന്ന് പനാജി പോലീസ് ഇൻസ്പെക്ടർ വിജയ്‌കുമാർ ചോദങ്കർ പറഞ്ഞു.
ഭാരതീയ ന്യായ സംഹിത (BNS) 2023-ലെ 196, 299 വകുപ്പുകൾ പ്രകാരമാണ് കേസ് രജിസ്റ്റർ ചെയ്തിരിക്കുന്നത്. സംഭവത്തിൽ അന്വേഷണം നടക്കുന്നുണ്ടെന്നും, സംസ്ഥാനത്തെ വർഗീയ സൗഹാർദ്ദം തകർക്കാനുള്ള ശ്രമങ്ങളെ സർക്കാർ വെച്ചുപൊറുപ്പിക്കില്ലെന്നും ഗോവ മുഖ്യമന്ത്രി പ്രമോദ് സാവന്ത് വ്യക്തമാക്കി.
