മംഗളൂരു ; ആൺകുട്ടികളെ ലൈംഗിക പീഡനത്തിനിരയാക്കിയ കേസിൽ വൈദികനെ അറസ്റ്റ് ചെയ്തു. ഫാദർ സിപ്രിയൻ പിന്റോ എന്ന വൈദികനെയാണ് പൊലീസ് അറസ്റ്റ് ചെയ്തത്. മൈസൂരു ആസ്ഥാനമായി പ്രവർത്തിക്കുന്ന ‘ഒടനടി’ (Odanadi) എന്ന സന്നദ്ധ സംഘടനയുടെ ഇടപെടലിനെത്തുടർന്നാണ് നടപടി. ഒളിവിലായിരുന്ന വൈദികനെ ബന്ധു വീട്ടിൽ നിന്നാണ് പോലീസ് കസ്റ്റഡിയിലെടുത്തത്.
1988 മുതൽ മംഗളൂരു വാലൻസിയയിലെ സെന്റ് വിൻസെന്റ് ഫെറർ പള്ളിയിൽ സേവനമനുഷ്ഠിച്ചു വരികയായിരുന്നു പിന്റോ. അഞ്ച് കുട്ടികൾ ലൈംഗിക പീഡനത്തിന് ഇരയായതായി പ്രാഥമിക അന്വേഷണത്തിൽ കണ്ടെത്തിയെന്ന് പോലീസ് അറിയിച്ചു. സംഭവത്തിൽ കൂടുതൽ വിവരങ്ങൾ ശേഖരിച്ചുവരികയാണെന്നും ഇരകളായ കുട്ടികളുമായി സംസാരിക്കുന്നുണ്ടെന്നും അന്വേഷണ ഉദ്യോഗസ്ഥർ വ്യക്തമാക്കി.
പള്ളിക്കുള്ളിൽ നടന്ന പീഡനങ്ങളെക്കുറിച്ചാണ് പരാതിയിൽ പറയുന്നത്. ആദ്യം പീഡനത്തിനിരയായ ആൺകുട്ടിക്ക് ചോക്ലേറ്റ് നൽകുകയും, തുടർന്ന് മോശമായ രീതിയിൽ സംസാരിക്കുകയും ചെയ്തു. പിന്നീട് കുട്ടിയെ പള്ളിയുടെ ‘സാക്രിസ്റ്റി’ക്കിന് (പള്ളിയിൽ വിശുദ്ധ വസ്തുക്കൾ സൂക്ഷിക്കുന്ന മുറി) അടുത്തുള്ള മുറിയിലേക്ക് കൊണ്ടുപോയി ലൈംഗികമായി പീഡിപ്പിച്ചു. പിന്നീട് പലതവണ പള്ളിയിൽ എത്തിയപ്പോഴും വൈദികൻ കുട്ടിയുടെ സ്വകാര്യ ഭാഗങ്ങളിൽ സ്പർശിച്ചതായി പരാതിയിൽ പറയുന്നു.
ഓഗസ്റ്റ് 14-ന് വൈകുന്നേരം 6.30-ഓടെ, പ്രാർത്ഥനയെക്കുറിച്ച് സംസാരിക്കാൻ പള്ളിയിലെത്തിയ ഒരു കുട്ടിയെ മുറിയിലേക്ക് കൊണ്ടുപോയി. അവിടെ വെച്ച് വൈദികൻ കുട്ടിയോട് ലൈംഗികാതിക്രമം നടത്തിയതായി പൊലീസ് പറയുന്നു .
പിന്നീട് കുട്ടി തന്റെ സുഹൃത്തുക്കളോട് ഇക്കാര്യം സംസാരിച്ചപ്പോൾ, അവരിൽ ചിലർക്കും സമാനമായ അനുഭവം ഉണ്ടായിട്ടുണ്ടെന്ന് മനസ്സിലാക്കി. തുടർന്ന് കുട്ടി ഇക്കാര്യം മാതാപിതാക്കളെ അറിയിച്ചു. കുടുംബം മംഗളൂരു രൂപതയുടെ തലവനെ സമീപിച്ചപ്പോൾ, വിഷയം പുറത്തുപറയാതെ രഹസ്യമായി സൂക്ഷിക്കാൻ നിർദ്ദേശിച്ചതായി പരാതിയിൽ പറയുന്നു.സംഭവത്തിൽ കാലതാമസം വരുത്തിയതിനെതിരെ സന്നദ്ധ സംഘടന രംഗത്തെത്തി. ഓഗസ്റ്റ് മാസത്തിൽ തന്നെ വിഷയം രൂപതയുടെ ശ്രദ്ധയിൽപ്പെടുത്തിയിരുന്നതായി ‘ഒടനടി’ സഹസ്ഥാപകൻ കെ.വി. സ്റ്റാൻലി പറഞ്ഞു. എന്നാൽ, അധികൃതരെ വിവരമറിയിക്കുന്നതിന് പകരം, രൂപത ആഭ്യന്തര അന്വേഷണ സമിതി രൂപീകരിക്കുകയും, വൈദികനെ അവധിയിൽ പ്രവേശിപ്പിക്കുകയുമാണ് ചെയ്തതെന്ന് അദ്ദേഹം ആരോപിച്ചു.
കുട്ടികളുടെ മാതാപിതാക്കൾ ബെംഗളൂരുവിലെ കർണാടക ചൈൽഡ് പ്രൊട്ടക്ഷൻ ഡയറക്ടറേറ്റിലും പരാതി നൽകി. സ്റ്റാൻലി മംഗളൂരു പോലീസ് കമ്മീഷണർ സുധീർ കുമാർ റെഡ്ഡിയെ ബന്ധപ്പെട്ടു. അദ്ദേഹത്തിന്റെ ഇടപെടലിനെത്തുടർന്ന് പോലീസ് കുട്ടികളുമായി സംസാരിക്കുകയും ഔദ്യോഗികമായി കേസ് രജിസ്റ്റർ ചെയ്യുകയുമായിരുന്നു.
