ന്യൂദല്‍ഹി: പ്രധാനമന്ത്രി നരേന്ദ്ര മോദിയുടെ വിദേശ യാത്രകളെക്കുറിച്ചുള്ള വിശദാംശങ്ങള്‍ വിവരാവകാശ നിയമപ്രകാരം വെളിപ്പെടുത്തണമെന്ന് വ്യോമസേനയോട് നിര്‍ദ്ദേശിച്ച കേന്ദ്ര വിവരാവകാശ കമ്മീഷന്‌റെ ഉത്തരവ് ദല്‍ഹി ഹൈക്കോടതി റദ്ദാക്കി.
ദേശീയ സുരക്ഷയ്‌ക്കും പ്രധാനമന്ത്രിയുടെ സുരക്ഷാ സംവിധാനത്തിനും ഇത്തരം വെളിപ്പെടുത്തലുകള്‍ പ്രത്യാഘാതങ്ങള്‍ ഉണ്ടാക്കുമെന്ന് ഹൈക്കോടതി ചൂണ്ടിക്കാട്ടി.
പ്രധാനമന്ത്രിയോടൊപ്പം യാത്ര ചെയ്തിരുന്ന എസ്പിജി ദ്യോഗസ്ഥരുടെ പേരുകള്‍, സ്‌പെഷ്യല്‍ ഫ്‌ളൈറ്റ് റിട്ടേണുകള്‍ എന്നിവയെക്കുറിച്ചുള്ള വിശദാംശങ്ങളാണ് വിരമിച്ച കൊമോഡോര്‍ ലോകേഷ് ബത്ര വിവരാവകാശ നിയമപ്രകാരം ആവശ്യപ്പെട്ടത്. മുന്‍ പ്രധാനമന്ത്രി മന്‍മോഹന്‍ സിംഗിന്റെയും വിദേശ യാത്രകളെക്കുറിച്ചുള്ള വിശദാംശങ്ങള്‍ ഇദ്‌ദേഹം ആവശ്യപ്പെട്ടിരുന്നു. തുടര്‍ന്നാണ് അവ വെളിപ്പെടുത്തണമെന്ന് വ്യോമസേനയോട് കേന്ദ്ര വിവരാവകാശ കമ്മീഷന്‍ ആവശ്യപ്പെട്ടത്.
