മലയാളികൾക്ക് മുന്നിൽ സംസാരിക്കുമ്പോൾ മലയാളത്തിൽ തന്നെ സംസാരിക്കുകയാണ് നല്ലതെന്ന് നടി ഉർവശി. പുതിയ ചിത്രമായ‘ആശ’യുടെ പ്രമോഷനിടെ അവതാരക ഇംഗ്ലിഷിൽ സംസാരിച്ചപ്പോഴാണ് താരം സ്വന്തം നിലപാട് വ്യക്തമാക്കിയത്.
‘കൊച്ചേ കേരളത്തിൽ നിന്നുകൊണ്ട് മലയാളികൾ അത്ര വലിയ ആൾക്കാരാണ് എന്നു കരുതി ഇംഗ്ലിഷിൽ എന്തിനാണ് ഈ കടുകു വറുക്കുന്നത്?. മലയാളികളല്ലേ ഈ നിൽക്കുന്നവർ എല്ലാവരും. ഞാൻ വിചാരിച്ചു ഐശ്വര്യ ലക്ഷ്മി ചെന്നൈയിൽ നിന്ന് ബിസിയായിട്ട് വന്നതുകൊണ്ട് അവളോട് ഇംഗ്ലീഷിൽ സംസാരിക്കുന്നതായിരിക്കും എന്ന്. എന്നെയും ഇംഗ്ലിഷിൽ പറഞ്ഞ് അറ്റാക്ക് ചെയ്യുകയാണ്. നിങ്ങൾ എന്താ റിയാക്ട് ചെയ്യാത്തെ പിള്ളേരേ, എന്നെ ഒന്ന് രക്ഷപ്പെടുത്ത്,’, എന്നായിരുന്നു ഉർവശിയുടെ പ്രതികരണം.
ഇതിനു മറുപടിയായി ഇവന്റിലെ അവതാരക ദക്ഷ രവീന്ദ്രനാഥ് ‘ഐ ആം ദി സോറി ചേച്ചി’ എന്നു പറയുന്നുണ്ട്. ഉടൻ ഉർവശി ‘സോറി പറയാൻ അത്രയ്ക്ക് മോശമായിട്ടില്ല. നമ്മൾ നമ്മുടെ നാട്ടിൽ സംസാരിക്കുമ്പോൾ നമ്മുടെ ഭാഷയിൽ സംസാരിച്ചാൽ മതി, എല്ലാവർക്കും മനസിലാകും അല്ലേ’ എന്നും ഉർവശി പറഞ്ഞു. ഇതിനു മറുപടിയായി അവതാരക അതേ എന്നും പറയുന്നുണ്ട്.
ഇതിന്റെ വിഡിയോ വൈറലായതിനു പിന്നാലെ അവതാരകയായ ദക്ഷ രവീന്ദ്രനാഥ് ഈ വിഡിയോ ഇന്സ്റ്റഗ്രാമിൽ പങ്കുവച്ചു. ‘എന്നെ ആരും ബഹിരാകാശത്തേക്ക് അയക്കേണ്ടതില്ല. ഞാൻ തന്നെ എന്റെ ബാഗുകൾ പാക്കുചെയ്തിട്ടുണ്ട്’ എന്ന കുറിപ്പോടെയാണ് ദക്ഷ വിഡിയോ പങ്കുവച്ചത്.
