ന്യൂദല്‍ഹി: മയക്കുമരുന്ന് കേസുകള്‍ വര്‍ദ്ധിച്ചുവരുന്നതില്‍ ആശങ്ക പ്രകടിപ്പിച്ച സുപ്രീം കോടതി, എന്‍ഡിപിഎസ് ആക്ട് പ്രകാരമുള്ള കേസുകളുടെ വിചാരണയ്‌ക്കായി 449 പ്രത്യേക കോടതികള്‍ സ്ഥാപിക്കാന്‍ കേന്ദ്ര സര്‍ക്കാരിനോടും സംസ്ഥാനങ്ങളോടുമടക്കം അടിയന്തര നിര്‍ദ്ദേശം നല്‍കി. രാജ്യത്ത് 176 എന്‍ഡിപിഎസ് പ്രത്യേക കോടതികള്‍ മാത്രമേ നിലവിലുള്ളൂവെന്ന് ചൂണ്ടിക്കാട്ടി കേന്ദ്രസര്‍ക്കാര്‍ സമര്‍പ്പിച്ച സ്റ്റാറ്റസ് റിപ്പോര്‍ട്ടിന്‍മേലാണ് ചീഫ് ജസ്റ്റിസ് സൂര്യകാന്ത് ഉള്‍പ്പെട്ട ബെഞ്ച് ഈ നിര്‍ദ്ദേശം നല്‍കിയത്.
ഈ കോടതികള്‍ക്കായി ആവശ്യമായ അടിസ്ഥാന സൗകര്യങ്ങള്‍ ഒരുക്കാനും ജുഡീഷ്യല്‍, അഡ്മിനിസ്‌ട്രേറ്റീവ് ജീവനക്കാരെ നിയമിക്കാനും ബെഞ്ച് നിര്‍ദ്ദേശിച്ചിട്ടുണ്ട്.
എന്‍ഡിപിഎസ് ആക്ട്, നിയമവിരുദ്ധ പ്രവര്‍ത്തനങ്ങള്‍ (തടയല്‍) ആക്ട് (യുഎപിഎ), മഹാരാഷ്‌ട്ര സംഘടിത കുറ്റകൃത്യ നിയന്ത്രണ നിയമം (എംസിഒസിഎ), ദേശീയ അന്വേഷണ ഏജന്‍സി (എന്‍ഐഎ) ആക്ട് എന്നിവയുള്‍പ്പെടെയുള്ള പ്രത്യേക ചട്ടങ്ങള്‍ പ്രകാരമുള്ള വിചാരണകള്‍ വേഗത്തിലാക്കാന്‍ സുപ്രീം കോടതി സ്വമേധയാ നടപടികള്‍ ആരംഭിക്കുകയായിരുന്നു.
