കൊച്ചി:സുപ്രീം കോടതി ചീഫ് ജസ്റ്റിസിനെതിരെയുളള വിവാദ എക്‌സ് പോസ്റ്റില്‍ കെ പി സി സിക്കെതിരെ കോടതിയലക്ഷ്യ നടപടിക്ക് അനുമതി തേടി അഭിഭാഷക സവിത സിംഗ്.വിവാദ എക്‌സ് പോസ്റ്റില്‍ നേരത്തെ കെ പി സി സിക്ക് സുപ്രീം കോടതി നോട്ടീസയച്ചിരുന്നു. ഇതിന് പിന്നാലെയാണ് അഭിഭാഷക കോടതിയലക്ഷ്യ നടപടിക്ക് അനുമതി തേടി അറ്റോര്‍ണി ജനറലിന് കത്ത് നല്‍കിയത്.
മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധത്തിന്റെ ഭാഗമായി രാഹുല്‍ ഗാന്ധിയുടെ നേതൃത്വത്തില്‍ സുപ്രീം കോടതിയിലേക്ക് ഇന്‍ഡി സഖ്യത്തിന്റെ പ്രകടനത്തിനിടെയായിരുന്നു വിവാദ പോസ്റ്റ് കെ പി സി സി ഔദ്യോഗിക എക്‌സ് പേജില്‍ പ്രത്യക്ഷപ്പെട്ടത്.ഇന്‍ഡി സഖ്യ നേതാക്കളെ കാണാന്‍ നിയമപ്രശ്‌നങ്ങളുള്ളതിനാല്‍ സാധിക്കില്ലെന്ന് ചീഫ് ജസ്റ്റിസ് അറിയിച്ചതിലുള്ള രോഷമായിരുന്നു കുറിപ്പിലുണ്ടായിരുന്നത്. ‘സൂര്യകാന്ത് രാജിവയ്‌ക്കൂ, പകരം ആളെ ഞങ്ങള്‍ കണ്ടെത്താം’ എന്ന കുറിപ്പ് വിവാദമായതോടെ ഉടനടി പിന്‍വലിച്ചു.
സംഭവത്തില്‍ ഉത്തരവാദിയായ വ്യക്തിയെ ചുമതലയില്‍നിന്ന് നീക്കിയതായി പിന്നീട് കെ പി സി സി പ്രസിഡന്റ് സണ്ണി ജോസഫ് അറിയിച്ചു. കെ പി സി സി നേതൃത്വത്തിന്റെ അറിവോ സമ്മതമോ ഇല്ലാതെയാണ് പോസ്റ്റ് പ്രസിദ്ധീകരിച്ചതെന്നും ഏത് സാഹചര്യത്തിലാണ് ഈ പോസ്റ്റ് വന്നതെന്ന് പരിശോധിക്കുമെന്നും അദ്ദേഹം അറിയിച്ചിരുന്നു.സംഭവത്തില്‍ ഹര്‍ജി എത്തിയതോടെ വിവാദം സുപ്രീം കോടതിയുടെ പരിധിയിലാണ്.
അതിനിടെ, ചീഫ് ജസ്റ്റിസിനെതിരെ വിവാദ പോസ്റ്റിന് പിന്നാലെ ഡിജിറ്റില്‍ മീഡിയ സെല്ലിനെ നിയന്ത്രിക്കാന്‍ കെ പി സി സി തീരുമാനിച്ചിട്ടുണ്ട്.
