പറവൂര്: ലക്ഷങ്ങള് മുടക്കി വീടുകളുടെ മേല്ക്കൂരയില് സൗരോര്ജ പാനലുകള് സ്ഥാപിച്ചിട്ടും കെഎസ്ഇബിയുടെ നെറ്റ് മീറ്റര് ലഭിക്കാത്തതിനാല് വൈദ്യുതി ഉത്പാദനം ഗ്രിഡിലേക്ക് ബന്ധിപ്പിക്കാനാകാതെ സംസ്ഥാനത്ത് ആയിരക്കണക്കിന് കുടുംബങ്ങള് പ്രതിസന്ധിയില്. നെറ്റ് മീറ്ററിനായി അപേക്ഷ നല്കി മാസങ്ങളോളം കാത്തിരിക്കേണ്ട അവസ്ഥയാണ് പലര്ക്കും. കഴിഞ്ഞ രണ്ടു വര്ഷമായി മീറ്റര് ലഭ്യതയില് പ്രശ്നങ്ങള് നിലനില്ക്കുന്നതായും കഴിഞ്ഞ മൂന്ന് മാസമായി പ്രതിസന്ധി രൂക്ഷമായതായും ഉപഭോക്താക്കള് പറയുന്നു. മീറ്റര് ക്ഷാമം എപ്പോള് പരിഹരിക്കുമെന്ന കാര്യത്തില് വ്യക്തമായ മറുപടി നല്കാന് കെഎസ്ഇബിക്കും കഴിയുന്നില്ലെന്നാണ് പരാതി.
വീടുകളില് ഉത്പാദിപ്പിക്കുന്ന വൈദ്യുതിയില് ഗാര്ഹിക ആവശ്യത്തിനുശേഷം അധികം വരുന്ന വൈദ്യുതി കെഎസ്ഇബിയുടെ വിതരണ ശൃംഖലയിലേക്ക് നല്കുന്നതാണ് നെറ്റ് മീറ്ററിങ് സംവിധാനം. ഗ്രിഡില് നിന്ന് ഉപഭോക്താവ് ഉപയോഗിക്കുന്ന വൈദ്യുതിയും സോളാര് പാനലുകളില് നിന്ന് ഗ്രിഡിലേക്ക് നല്കുന്ന വൈദ്യുതിയും പ്രത്യേകം രേഖപ്പെടുത്തി കണക്കാക്കുന്നതാണ് ബൈഡയറക്ഷണല് നെറ്റ് മീറ്ററിന്റെ പ്രധാന ചുമതല. കെഎസ്ഇബിയുടെ ഔദ്യോഗിക വിവരമനുസരിച്ച് നിലവിലുള്ള സാധാരണ മീറ്റര് മാത്രം ഉപയോഗിച്ച് നെറ്റ് മീറ്ററിങ് ആനുകൂല്യം നേടാനാകില്ല. ആവശ്യമായ നെറ്റ് മീറ്ററും മറ്റ് അനുബന്ധ മീറ്ററിങ് സംവിധാനങ്ങളും സ്ഥാപിക്കണം.
നെറ്റ് മീറ്റര് സ്ഥാപിച്ചശേഷമാണ് ഓണ്-ഗ്രിഡ് സൗരനിലയം ഔദ്യോഗികമായി ഗ്രിഡുമായി ബന്ധിപ്പിച്ച് പ്രവര്ത്തിപ്പിക്കാന് കഴിയുക. കെഎസ്ഇബിയുടെ നിലവിലെ നടപടിക്രമത്തിലും പ്ലാന്റ് പരിശോധന, ടെസ്റ്റ് സര്ട്ടിഫിക്കറ്റ്, കരാര് ഒപ്പിടല്, മീറ്റര് സ്ഥാപിക്കല്, സംയുക്ത പരിശോധന എന്നിവ പൂര്ത്തിയാക്കിയ ശേഷമാണ് നടപടിക്രമം പൂര്ത്തിയാകുന്നത്. മീറ്റര് ലഭ്യമല്ലാത്തതിനാല് സ്വന്തമായി ബൈഡയറക്ഷണല് മീറ്റര് വാങ്ങി സ്ഥാപിക്കാനാണ് ചില ഉപഭോക്താക്കള്ക്ക് കെഎസ്ഇബി നിര്ദേശം നല്കുന്നത്. വിപണിയില് ഏകദേശം 6000 രൂപവരെ ചെലവഴിച്ച് മീറ്റര് വാങ്ങേണ്ടിവരുന്ന സാഹചര്യമാണ് ഇതോടെ ഉണ്ടാകുന്നത്. സ്വകാര്യമായി വാങ്ങുന്ന മീറ്ററുകള്ക്ക് പരിമിതമായ വാറന്റി മാത്രമാണ് ലഭിക്കുന്നതെന്നും പിന്നീട് മീറ്ററിന്റെ തകരാര്, കൃത്യത, മാറ്റിസ്ഥാപിക്കല് തുടങ്ങിയ കാര്യങ്ങളില് ഉത്തരവാദിത്വം ഏറ്റെടുക്കുന്നതില് കെഎസ്ഇബി വ്യക്തത നല്കുന്നില്ലെന്നും ഉപഭോക്താക്കള് ആരോപിക്കുന്നു.
കെഎസ്ഇബിയുടെ മീറ്ററിന് പ്രതിമാസ വാടക നല്കേണ്ടിവന്നാലും മീറ്ററിന്റെ പരിപാലനം, കൃത്യത, തകരാര് സംഭവിച്ചാല് പരിഹാരം തുടങ്ങിയ കാര്യങ്ങളില് ബോര്ഡിന്റെ ഉത്തരവാദിത്വം ലഭിക്കുമെന്നതിനാലാണ് ഉപഭോക്താക്കളില് വലിയൊരു വിഭാഗം കെഎസ്ഇബി മീറ്ററിനായി കാത്തിരിക്കുന്നത്. സ്വന്തം പണം മുടക്കി പ്ലാന്റ് സ്ഥാപിച്ച ശേഷം വീണ്ടും മീറ്ററിനായി പണം ചെലവഴിക്കേണ്ടിവരുന്നത് ഉപഭോക്താക്കള്ക്ക് കൂടുതല് സാമ്പത്തിക ബാധ്യതയുണ്ടാക്കുന്നതായും പരാതിയുണ്ട്. മിച്ച വൈദ്യുതിക്ക് ലഭിക്കുന്ന പ്രതിഫലം സംബന്ധിച്ചും ഉപഭോക്താക്കള്ക്കിടയില് ആശയക്കുഴപ്പമുണ്ട്. 2.69 രൂപ എന്ന നിരക്ക് കെഎസ്ഇബിയുടെ രേഖകളില് ചില സൗരവൈദ്യുതി വാങ്ങല് പദ്ധതികളുമായി ബന്ധപ്പെട്ട് കാണുന്നുണ്ടെങ്കിലും എല്ലാ ഗാര്ഹിക നെറ്റ് മീറ്ററിങ് ഉപഭോക്താക്കള്ക്കും ഇതേ നിരക്ക് നേരിട്ട് ബാധകമാണെന്ന് പറയാനാകില്ല. നെറ്റ് മീറ്ററിങ് ഉപഭോക്താക്കളുടെ എനര്ജി അക്കൗണ്ടിങ്, ബാങ്കിങ്, സെറ്റില്മെന്റ് എന്നിവ കേരള സ്റ്റേറ്റ് ഇലക്ട്രിസിറ്റി റെഗുലേറ്ററി കമ്മിഷന്റെ ചട്ടങ്ങള് അനുസരിച്ചാണ് നടക്കുന്നത്.
ഇതിനിടെ, കെഎസ്ഇബി തന്നെ സ്മാര്ട്ട് മീറ്ററിങ് സംവിധാനത്തിലേക്ക് മാറുന്നതിനുള്ള നടപടികളുമായി മുന്നോട്ടുപോകുന്നതിനാല് ഇപ്പോള് ഉപഭോക്താക്കള് സ്വന്തം പണം മുടക്കി വാങ്ങുന്ന മീറ്ററുകളുടെ ഭാവിയെക്കുറിച്ചും ആശങ്ക ഉയര്ന്നിട്ടുണ്ട്.
ജന്മഭൂമി ഓണ്ലൈന്