ഗ്വാഡോങ് (ചൈന): ചൈന മാസ്റ്റേഴ്‌സ് ബാഡ്മിന്റണ്‍ ടൂര്‍ണമെന്‍റില്‍ ഇന്ത്യയുടെ സാത്വിക് സായിരാജ് രാങ്കിറെഡ്ഡി-ചിരാഗ് ഷെട്ടി സഖ്യം കിരീടം നേടി. 2023ലും 2025ലും ഫൈനലിലെത്തിയെങ്കിലും ചുണ്ടിനും കപ്പിനുമിടയില്‍ കൈവിട്ടുപോയ കിരീടമാണ് ഇരുവരും 2026ല്‍ സ്വന്തമാക്കിയത്.
ഇക്കുറി ചൈനീസ് താരങ്ങളുടെ ടീമിനെ ഫൈനലില്‍ തോല്‍പിച്ചായിരുന്നു സാത്വിക് സായിരാജ് രങ്ക റെഡ്ഡി- ചിരാഗ് ഷെട്ടി ടീം കിരീടം ഉയര്‍ത്തിയത്. ഫൈനലില്‍ ചൈനയുടെ ഹെ ജി ടിങ്‌റെന്‍ – ഷിയാങ് യു സഖ്യത്തെയാണ് ഒന്നിനെതിരെ രണ്ട് ഗെയിമുകള്‍ക്ക് തകര്‍ത്തത്. ആദ്യ ഗെയിം കൈവിട്ടപ്പോള്‍ രണ്ട് വര്‍ഷം ഫൈനലില്‍ കൈവിട്ടുപോയ കിരീടം ഇക്കുറിയും നഷ്ടപ്പെടുമെന്ന് പലരും കരുതി. പക്ഷെ അവിശ്വസനീയമായ തിരിച്ചുവരവാണ് സാത്വിക്കും ചിരാഗും പിന്നീട് നടത്തിയത്. 11-21നാണ് ചൈനീസ് സംഘം ആദ്യ ഗെയിം പിടിച്ചെടുത്തത്. എന്നാല്‍ രണ്ടാം ഗെയിം 21-13ന് സാത്വിജ്- ചിരാഗ് ഷെട്ടി സഖ്യം നേടി. നിര്‍ണായക മൂന്നാം ഗെയിമില്‍ 21-17ന് വിജയിച്ച് അവര്‍ കിരീടവും നേടി. ഒരു മണിക്കൂറും പത്ത് മിനിറ്റു നേരം ഫൈനല്‍ പോരാട്ടം നീണ്ടു നിന്നു.
