ന്യൂദല്‍ഹി: അമ്പത് വയസ്സുള്ള ബിജെപി വക്താവായ ഗൗരവ് ഭാട്ടിയയുടെ പഴയ കാല ഫോട്ടോയില്‍ എഐ ഉപയോഗിച്ച് മാറ്റം വരുത്തുകയും ഈ ഫോട്ടോയ്‌ക്കൊപ്പം ഗൗരവ് ഭാട്ടിയയുടെ ഒരു വ്യാജ പ്രസ്താവനയും സമൂഹമാധ്യമങ്ങളില്‍ പങ്കുവെച്ച സിജെപി വക്താവ് സൗരവ് ദാസ് പെട്ടു. കൃത്രിമബുദ്ധി ഉപയോഗിച്ച് സൃഷ്ടിച്ച തന്റെ വ്യാജ ഫോട്ടോയും ഇതിനൊപ്പമുള്ള തന്റെ വ്യാജമായ പ്രസ്താവനയും പിന്‍വലിച്ച് മാപ്പ് പറയാന്‍ ഗൗരവ് ഭാട്ടിയ ആവശ്യപ്പെടുകയായിരുന്നു.
എഐ ഉപയോഗിച്ച് മാറ്റം വരുത്തിയ ഫോട്ടോയില്‍ കൂളിംഗ് ഗ്ലാസും കോട്ടും ഇട്ട്, ഒരു പുത്തന്‍ പണക്കാരനായ ചെറുപ്പക്കാരനായാണ് ഗൗരവ് ഭാട്ടിയയെ അവതരിപ്പിച്ചിരിക്കുന്നത്. സുപ്രീംകോടതിയില്‍ സീനിയര്‍ അഭിഭാഷകനായ, നരച്ച തലമുടിയുള്ള വ്യക്തിയാണ് ഇപ്പോഴത്തെ ഗൗരവ് ഭാട്ടിയ. സ്വതന്ത്ര ഭരദ്വാജിനെ ദിമാഗി നക്സല്‍ എന്ന് ഗൗരവ് ഭാട്ടിയ വിളിച്ചു എന്നാണ് സൗരവ് ദാസ് തന്റെ സമൂഹമാധ്യമ പോസ്റ്റില്‍ അവകാശപ്പെട്ടിരിക്കുന്നത്.
സ്വതന്ത്ര ഭരദ്വാജ് ബിജെപി പ്രവര്‍ത്തകനാണ്. ദല്‍ഹിയിലെ ജന്തര്‍മന്തറില്‍ നടന്ന സമരത്തില്‍ പങ്കെടുത്ത നിഷു ആസാദ് എന്ന പെണ്‍കുട്ടി അടുത്ത കാലത്ത് മോദിയുടെ 13ാം ചരമദിനം എന്ന പോസ്റ്റിടുകയും ചെയ്തിരുന്നു. ഇതാണ് ബിജെപി യുവപ്രവര്‍ത്തകനായ സ്വതന്ത്ര ഭരദ്വാജിനെ പ്രകോപിപ്പിച്ചത്. ഇതോടെ സ്വതന്ത്ര ഭരദ്വാജ് നിഷു ആസാദിന്റെ പിതാവിനെ ആക്രമിച്ചതായി പരാതിയുണ്ടായിരുന്നു. കഴിഞ്ഞ ദിവസം സ്വതന്ത്ര ഭരദ്വാജിനെ ദല്‍ഹി പൊലീസ് അറസ്റ്റ് ചെയ്യുകയും ചെയ്തു. . ഈ സ്വതന്ത്ര മഹാരാജിനെ ദിമാഗി നക്സല്‍ എന്ന് ഗൗരവ് ഭാട്ടിയ വിളിച്ചു എന്നായിരുന്നു സൗരവ് ദാസിന്റെ പോസ്റ്റ്. ദല്‍ഹിയിലെ ബിജെപിയ്‌ക്കുള്ളില്‍ വിള്ളലുണ്ടാക്കുകയായിരുന്നു സൗരവ് ദാസിന്റെ ലക്ഷ്യം. തന്റെ ഈ വ്യാജ എഐ ഫോട്ടോയും അതിനൊപ്പം നല്‍കിയ വ്യാജമായി സൃഷ്ടിച്ച പോസ്റ്റും പിന്‍വലിക്കണമെന്നും നിരുപാധികം മാപ്പു പറയണമെന്നും സൗരവ് ദാസിനോട് ഗൗരവ് ഭാട്ടിയ ആവശ്യപ്പെട്ടിരുന്നു.
എന്നാല്‍ സൗരവ് ദാസിന്റെ ഭാഗത്ത് നിന്നും യാതൊരു നടപടിയുമുണ്ടായില്ല. ഇതില്‍ പ്രകോപിതനായ ഗൗരവ് ഭാട്ടിയ രണ്ടാമത്തെ താക്കീത് നല്കി. ഇക്കുറി അടുത്ത 50 മിനിറ്റിനകം തന്റെ വ്യാജചിത്രം പിന്‍വലിച്ച് നിരുപാധികം മാപ്പ് പറഞ്ഞില്ലെങ്കില്‍ നിയമപരമായ പ്രത്യാഘാതം അനുഭവിക്കേണ്ടിവരുമെന്ന് ഭീഷണി മുഴക്കി. സംഗതി ഗൗരവമാണെന്ന് കണ്ടതോടെ സൗരവ് ദാസ് ഈ ഫോട്ടോ പിന്‍വലിച്ച് മാപ്പ് പറഞ്ഞിരിക്കുകയാണ്.
ഈ സംഭവം സൗരവ് ദാസിന് വലിയ നാണക്കേടായിരിക്കുകയാണ്. ഫോട്ടോ പിന്‍വലിച്ച് നിരുപാധികം മാപ്പ് പറഞ്ഞതോടെ സൗരവ് ദാസിനെതിരെ സമൂഹമാധ്യമങ്ങളില്‍ വലിയ തോതില്‍ പരിഹാസം ഉയരുകയാണ്.
