ഹിന്ദു പുരാണങ്ങളിലും ശാക്തേയ വിശ്വാസത്തിലും ആദിപരാശക്തിയുടെ ഉഗ്രരൂപിണിയായ ഭാവമാണ് വരാഹി ദേവി (വാരാഹി). വിഷ്ണുവിന്റെ വരാഹാവതാരത്തിന്റെ ശക്തിസ്വരൂപിണിയായും സപ്തമാതാക്കളിൽ ഒരാളായും ദേവിയെ കണക്കാക്കുന്നു. ശ്രീവിദ്യാ സമ്പ്രദായത്തിൽ പരമശക്തിയായ ശ്രീ ലളിതാ പരമേശ്വരിയുടെ സൈന്യാധിപയായിട്ടാണ് വരാഹി ദേവിയെ കണക്കാക്കുന്നത്.
ഭക്തർക്ക് അതിശക്തമായ സംരക്ഷണം നൽകുന്ന ദേവിയാണ് വരാഹി. അപകടങ്ങൾ, രോഗങ്ങൾ, ദുർമന്ത്രവാദം തുടങ്ങിയ ദോഷങ്ങളിൽ നിന്ന് ദേവി രക്ഷിക്കുന്നു.ആത്മീയ സാധനയിൽ ഉയരങ്ങൾ കീഴടക്കാൻ ആഗ്രഹിക്കുന്നവർക്ക് വാരാഹിയെ ഒഴിവാക്കാനാകില്ല.
.അസുര രാജാവായ ഹിരണ്യകശിപുവിനെ വധിച്ച ശേഷം കലി അടങ്ങാതിരുന്ന നരസിംഹത്തെ സമാധാനിപ്പിക്കാനായാണ് വരാഹി അവതരിച്ചത് എന്നാണ് ഐതിഹ്യം. ദേവി ഭഗവാന്റെ മടിയിൽ ഇരുന്നു സമാധാനിപ്പിച്ചു. അതിനുശേഷം അവർ സ്വർഗത്തിലേക്ക് മടങ്ങി. ഭക്തിയോടെയും പൂർണ വിശ്വാസത്തോടു കൂടിയും പ്രാർഥിക്കുന്നവരെ വരാഹി ദേവി അനുഗ്രഹിക്കും.
വരാഹി മന്ത്രം ജപിക്കുന്നവരുടെ പാതയിലെ എല്ലാ പ്രതിബന്ധങ്ങളും നീക്കുകയും സർവ ഐശ്വര്യവും സമ്പത്തും നൽകി അനുഗ്രഹിക്കുകയും ചെയ്യും.ദേവീ പൂജയ്ക്കായി മുറിയിൽ ഒരു ചെറിയ സ്ഥലം അലങ്കരിച്ച് ദേവിയുടെ ചിത്രം സ്ഥാപിക്കണം. ഇവിടം പൂക്കൾ കൊണ്ട് അലങ്കരിച്ചതിന് ശേഷം വിളക്ക് കത്തിച്ച് പ്രാർഥിക്കാം. മൺവിളക്കിൽ ചതുരാകൃതിയിലുള്ള ചെറിയ കടും നീല നിറത്തിലുള്ള തുണിയെടുത്ത് അതിൽ കുറച്ച് വെള്ള കടുകിട്ട് ഒരു കിഴി കെട്ടാം.
ഈ കിഴി മൺചിരാതിലിട്ട് എള്ളെണ്ണ ഉപയോഗിച്ച് വിളക്ക് തെളിയിക്കാം, ഇത് വീട്ടിൽ തന്നെ ചെയ്യാവുന്നതാണ്.വരാഹി ദേവിയെ പ്രീതിപ്പെടുത്താൻ എല്ലാ ശനിയാഴ്ചയും പൂജ നടത്താം. രാവിലെ 6 മുതൽ വൈകിട്ട് 7 വരെയും അല്ലെങ്കിൽ രാത്രി 8 മുതൽ 9 വരെയും ഈ പൂജ ചെയ്യാം. എട്ട് ശനിയാഴ്ച തുടർച്ചയായി ഈ പൂജ ചെയ്യണം. വീട്ടിൽ ഇത് ചെയ്യാൻ കഴിയാത്തവർക്ക് അടുത്തുള്ള ഏത് ക്ഷേത്രത്തിലും ഈ പൂജ നടത്താം
വരാഹി ദേവിയുടെ അനുഗ്രഹം ലഭിക്കുമ്പോൾ തന്നെ നമ്മെ അലട്ടുന്ന മറ്റെല്ലാ പ്രശ്നങ്ങളും പരിഹരിക്കാനാകും. വരാഹി മന്ത്രം 108 തവണയെങ്കിലും ജപിക്കുന്നതും ഉത്തമമാണ്. സമയമില്ലാത്തവർ കുറഞ്ഞത് മൂന്ന് തവണയെങ്കിലും ഈ മന്ത്രം ജപിക്കാം. വരാഹിയെ ആരാധിക്കുമ്പോഴോ ക്ഷേത്രദർശനം നടത്തുമ്പോഴോ മന്ത്രം ജപിക്കുന്നത് ഉത്തമമാണ്.
ഓം ക്ലീം വരാഹമുകി ഹ്രീം സിദ്ധി സ്വരൂപിണി ശ്രീം തന വസംഗരീ ദാനം വർഷയ സ്വാഹ എന്നാണ് വാരാഹിദേവി മൂലമന്ത്രം. മന്ത്രങ്ങൾ എപ്പോഴും ഗുരുവിന്റെ ഉപദേശത്തോടെ മാത്രം ജപിക്കുക. .
