തിരുവനന്തപുരം: തിരുവനന്തപുരം നഗരത്തിന്റെ വികസനവും ഭാവി നഗരാസൂത്രണവും സംബന്ധിച്ച് മേയറും പൗരന്മാരും തമ്മിൽ നേരിട്ടുള്ള ആശയവിനിമയത്തിന് വേദിയൊരുങ്ങുന്നു. ‘നേതി നേതി : ലറ്റ് അസ് ടോക്ക്’ എന്ന കൂട്ടായ്‌മ സംഘടിപ്പിക്കുന്ന പ്രത്യേക പൗരസംവാദം ‘മേയർ കെയേഴ്സ്’ എന്ന പേരിൽ സെപ്റ്റംബർ 5ന് നടക്കും.
വെള്ളിയാഴ്ച വൈകിട്ട് 5.30ന് ജവഹർ നഗറിലെ തിരുവനന്തപുരം ചേംബർ ഓഫ് കൊമേഴ്സ് ആൻഡ് ഇൻഡസ്ട്രി ചേംബർ ഹാളിലാണ് പരിപാടി.
അടുത്തിടെ നടത്തിയ അമേരിക്കൻ സന്ദർശനത്തിലൂടെ വിവിധ നഗരങ്ങളിലെ ഭരണസംവിധാനങ്ങളും വികസന മാതൃകകളും നേരിട്ട് മനസ്സിലാക്കിയ അനുഭവങ്ങൾ മേയർ അഡ്വ. വി. വി. രാജേഷ് പങ്കുവയ്‌ക്കും. സന്ദർശനത്തിൽ മേയറോടൊപ്പം ഉണ്ടായിരുന്ന മാധ്യമപ്രവർത്തകൻ പി. ശ്രീകുമാറും സംവാദത്തിൽ പങ്കെടുക്കും. അമേരിക്കൻ നഗരങ്ങളിൽ നേരിട്ടറിഞ്ഞ നഗര ഗതാഗത സംവിധാനം, പൊതുസ്ഥലങ്ങളുടെ വികസനം, ശുചിത്വവും പൗരസൗകര്യങ്ങളും, അടിസ്ഥാനസൗകര്യ വികസനം, നഗരാസൂത്രണം തുടങ്ങിയ മേഖലകളിലെ അനുഭവങ്ങൾ തിരുവനന്തപുരം നഗരത്തിന്റെ വികസനത്തിന് എങ്ങനെ പ്രയോജനപ്പെടുത്താമെന്നതായിരിക്കും പ്രധാന ചർച്ച.
നഗരത്തിന്റെ നിലവിലെ സാഹചര്യങ്ങളും വികസനസാധ്യതകളും വിലയിരുത്തുന്നതിനൊപ്പം പൗരന്മാരുടെ അഭിപ്രായങ്ങളും നിർദേശങ്ങളും നേരിട്ട് കേൾക്കുന്നതിനും സംവാദം ലക്ഷ്യമിടുന്നു. നഗരഭരണത്തിൽ ജനപങ്കാളിത്തം ശക്തിപ്പെടുത്തുകയും വികസന പ്രവർത്തനങ്ങളിൽ പുതിയ ആശയങ്ങൾ ഉൾപ്പെടുത്തുകയും ചെയ്യുന്നതിന് ഇത്തരം തുറന്ന സംവാദങ്ങൾ സഹായകമാകുമെന്നാണ് സംഘാടകരുടെ വിലയിരുത്തൽ.
അമേരിക്കൻ സന്ദർശനത്തിനിടെ വിവിധ നഗരങ്ങളിലെ മേയർമാരുമായും ഉദ്യോഗസ്ഥരുമായും നടത്തിയ കൂടിക്കാഴ്ചകളുടെയും നഗരഭരണ സംവിധാനങ്ങൾ നേരിട്ട് സന്ദർശിച്ചതിന്റെയും അനുഭവങ്ങളും പരിപാടിയിൽ പങ്കുവയ്‌ക്കും. മാലിന്യസംസ്കരണം, സാങ്കേതികവിദ്യയുടെ ഉപയോഗം, പൊതുസൗകര്യങ്ങൾ, നഗര ഗതാഗതം തുടങ്ങിയ മേഖലകളിലെ മാതൃകകൾ തിരുവനന്തപുരം നഗരത്തിന് അനുയോജ്യമായ രീതിയിൽ നടപ്പാക്കുന്നതിനുള്ള സാധ്യതകളും ചർച്ച ചെയ്യും.
“മേയർ കണ്ടു; നഗരത്തിന് ചോദ്യങ്ങളുണ്ട്. നമുക്ക് സംസാരിക്കാം” എന്ന ആശയത്തിലാണ് പരിപാടി സംഘടിപ്പിക്കുന്നത്. ജനങ്ങളും നഗരഭരണ നേതൃത്വവും തമ്മിലുള്ള ആശയവിനിമയത്തിലൂടെ മികച്ച നഗരത്തിനായുള്ള പുതിയ ചിന്തകൾ രൂപപ്പെടുത്തുകയാണ് പരിപാടിയുടെ ലക്ഷ്യം. “ഒരു മികച്ച നഗരം ഒരു സംഭാഷണത്തിൽ നിന്നാണ് ആരംഭിക്കുന്നത്” എന്ന സന്ദേശത്തോടെയാണ് ‘മേയർ കെയേഴ്സ്’ സംഘടിപ്പിക്കുന്നത്.
