കോഴിക്കോട്: കാന്തപുരം എ.പി. അബൂബക്കര് മുസ്ലിയാരുടെ പ്രസ്താവന കേവലം സ്ത്രീ വിരുദ്ധത മാത്രമല്ല മറിച്ച് മതരാഷ്ട്രവാദത്തിന്റെ ആദ്യ വെടിയൊച്ചയാണെന്ന് ബിജെപി ദേശീയ നിര്വാഹക സമിതി അംഗം പി.കെ. കൃഷ്ണദാസ്.
പ്രസ്താവന ഭരണഘടന വിരുദ്ധവും നിയമവിരുദ്ധവും ദേശവിരുദ്ധവുമാണ്. നമ്മുടെ ഭരണഘടനയില് സ്ത്രീകള്ക്കും പുരുഷനും എല്ലാവിധ സ്വാതന്ത്ര്യവും നല്കുന്നുണ്ട്. ഈ ഭരണഘടന മുസ്ലിം സ്ത്രീകള്ക്ക് ബാധകമല്ല എന്നാണ് കാന്തപുരത്തിന്റെ പ്രസ്താവനയിലൂടെ മനസിലാക്കേണ്ടത്. കാന്തപുരത്തിന്റെ സ്ത്രീ വിരുദ്ധ വിവാദ പ്രസ്താവനയെ മുസ്ലിംലീഗിന്റെ സംസ്ഥാന അധ്യക്ഷന് പാണക്കാട് സാദിക്കലി ശിഹാബ് തങ്ങളും ന്യായീകരിക്കുകയാണ്. സ്ത്രീ സുരക്ഷാ മുന്നിര്ത്തിയാണ് കാന്തപുരം അത്തരമൊരു പ്രസ്താവന പുറപ്പെടുവിച്ചത് എന്നായിരുന്നു മുസ്ലിംലീഗിന്റെ വാദമെന്നും പി.കെ. കൃഷ്ണദാസ് പറഞ്ഞു. മാരാര്ജി ഭവനില് നടന്ന വാര്ത്താസമ്മേളനത്തില് സംസാരിക്കുകയായിരുന്നു അദ്ദേഹം.
കേരളത്തെ താലിബാനിസത്തിലേക്ക്, ശിലായുഗത്തിലേക്ക് നയിക്കാന് ജമാഅത്ത് ഇസ്ലാമി, മുസ്ലിംലീഗ് ഉള്പ്പെടെയുള്ള സംഘടനകള് ശ്രമിച്ചുകൊണ്ടിരിക്കുകയാണ്. അവരുടെ മുന്നില് കീഴ്പ്പെടുന്ന സമീപനമാണ് കോണ്ഗ്രസിനും യുഡിഎഫിനുമുള്ളത്. കാന്തപുരത്തിനെതിരായിട്ടുള്ള മുഖ്യമന്ത്രിയുടെ പ്രതികരണവും പ്രതിഷേധവും തികച്ചും ആത്മാര്ത്ഥതയില്ലാത്തതാണ്. പ്രസ്താവനയ്ക്കെതിരെ അതിശക്തമായ പ്രതിഷേധം ഉയര്ന്ന സാഹചര്യത്തില് ജനങ്ങളുടെ കണ്ണില് പൊടിയിടാന് വേണ്ടിയാണ് മുഖ്യമന്ത്രിയുടെ പ്രസ്താവന. അല്ലെങ്കില് ആ കൂട്ടത്തില് മുസ്ലിംലീഗിനെയും തള്ളിപ്പറയാന് മുഖ്യമന്ത്രി തയാറാകുമായിരുന്നു. കാന്തപുരം മാത്രമല്ല ജമാഅത്തെ ഇസ്ലാമി, മുസ്ലിംലീഗ് തുടങ്ങിയ മതരാഷ്ട്രവാദ സംഘടനകളുടെ അജണ്ടയുടെ അടിസ്ഥാനത്തിലാണ് ഇതൊക്കെ പുറത്തുവന്നുകൊണ്ടിരിക്കുന്നത്. സ്ത്രീ സ്വാതന്ത്ര്യത്തിന്റെയും ലിംഗ സമത്വത്തിന്റെയും പേരില് വാടകയ്ക്ക് എടുത്ത ചില സ്ത്രീകളെ ശബരിമലയില് കയറ്റി അവിടത്തെ ആചാരങ്ങളും അനുഷ്ഠാനങ്ങളും തകര്ക്കാന് ശ്രമിച്ച സിപിഎമ്മും പ്രതിപക്ഷ നേതാവും സിപിഎമ്മിന്റെ സംസ്ഥാന സെക്രട്ടറിയും ഇപ്പോഴും മൗനം പാലിക്കുകയാണ്. ഇവിടെ യുഡിഎഫിന്റെയും എല്ഡിഎഫിന്റെയും രാഷ്ട്രീയ അജണ്ട നിശ്ചയിക്കുന്നത് ജമാഅത്തെ ഇസ്ലാമിയെ പോലെയുള്ള തീവ്രവാദ സംഘടനകളാണ്. ഇതിലൂടെ തെളിയുന്നത് യുഡിഎഫും എല്ഡിഎഫും ഒന്നാണ് എന്ന ബിജെപിയുടെ രാഷ്ട്രീയ നിലപാടാണ്. ഭരണഘടനയെ ചോദ്യം ചെയ്യുന്ന തീവ്രവാദ വിഘടനവാദികളെ, താലിബാനികളെ കൂടാരത്തില് കിടത്തിക്കൊണ്ട് എന്ത് പുതുയുഗമാണ് മുഖ്യമന്ത്രി സൃഷ്ടിക്കാന് പോകുന്നതെന്നും പി.കെ. കൃഷ്ണദാസ് ചോദിച്ചു. വാര്ത്താസമ്മേളനത്തില് ബിജെപി സിറ്റി ജില്ലാ അധ്യക്ഷന് അഡ്വ. കെ.പി. പ്രകാശ് ബാബു, സംസ്ഥാന സെല് കോ – ഓര്ഡിനേറ്റര് അഡ്വ. വി.കെ. സജീവന് എന്നിവരും പങ്കെടുത്തു.
