പത്തനംതിട്ട: ക്ഷേത്ര ജീവനക്കാരിയുടെ കണ്ണില് മുളകുപൊടി എറിഞ്ഞ് മാല പൊട്ടിക്കാന് ശ്രമിച്ച പൂജാരി പിടിയില്.ഇലന്തൂര് സ്വദേശി എം പി ബിജുമോന് (52) ആണ് ഇലവുംതിട്ട പൊലീസിന്റെ പിടിയിലായത്. വെള്ളിയാഴ്ച രാവിലെ 6 മണിയോടെ ഉള്ളന്നൂര് പുലിക്കൂട്ടിനാല് ക്ഷേത്രത്തിലാണ് സംഭവം.
ക്ഷേത്രത്തിലെ കഴകം ജീവനക്കാരി വിജയമ്മ (63) യുടെ മാലയാണ് ബിജുമോന് പൊട്ടിച്ചെടുക്കാന് ശ്രമിച്ചത്. വിജയമ്മ ക്ഷേത്ര ജോലികളില് ഏര്പ്പെട്ടിരിക്കെ ബിജുമോന് ദൂരെ മാറി ബൈക്ക് പാര്ക്ക് ചെയ്ത ശേഷം സമീപത്തുള്ള റബര് തോട്ടത്തിലൂടെ ക്ഷേത്രത്തിനുള്ളില് എത്തി.വിജയമ്മയ്ക്ക് നേരെ മുളകുപൊടി എറിഞ്ഞ് കഴുത്തില് കിടന്ന സ്വര്ണമാല പൊട്ടിച്ചെടുക്കാന് ശ്രമിക്കുകയായിരുന്നു. വിജയമ്മ നിലവിളിച്ചതോടെ പൂജാരി പുറത്തേക്ക് ഓടി രക്ഷപ്പെടാന് ശ്രമിച്ചെങ്കിലും ഓടിയെത്തിയ നാട്ടുകാര് ചേര്ന്ന് ഇയാളെ തടഞ്ഞുവെച്ചു.
നാട്ടുകാര് അറിയിച്ചത് പ്രകാരം സ്ഥലത്ത് എത്തിയ ഇലവുംതിട്ട പൊലീസ് പൂജാരിയെ കസ്റ്റഡിയില് എടുത്തു. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
