കൊച്ചി: ബെത്ലഹേം കുടുംബയൂണിറ്റ് എന്ന ചിത്രത്തിന് വലിയ വാഴ്ത്തലുകളാണ് റിവ്യൂ ചെയ്യുന്ന സിനിമാനിരീക്ഷകര് നല്കുന്നത്. എല്ലാ സിനിമകളേയും നഖശിഖാന്തം വിമര്ശിക്കുന്ന അശ്വന്ത് കോക്ക് ഉള്പ്പെടെയുള്ളവര് ഒരു ഗിരീഷ് എഡി (സിനിമയുടെ സംവിധായകന്) വണ്ടര് എന്നാണ് ബെത്ലഹേം കുടുംബ യൂണിറ്റിനെ പ്രശംസിക്കുന്നത്. തണ്ണീര്മത്തന് ദിനങ്ങള്, സൂപ്പര് ശരണ്യ, പ്രേമലു എന്നീ സൂപ്പര് ഹിറ്റ് സിനിമകള്ക്ക് ശേഷം ഗിരീഷ് എഡിയുടെ ഹിറ്റ് സിനിമകളുടെ പട്ടികയില് മറ്റൊരു സിനിമ കൂടിയായി. സോഷ്യല് മീഡിയയില് ഈ സിനിമയ്ക്കുള്ള പ്രശംസകള് നിറയുകയാണ്.
നിവിന് പോളി സര്വ്വം മായ എന്ന അഖില് സത്യന് സിനിമയ്ക്ക് ശേഷം മറ്റൊരു ഹിറ്റ് കൂടി നേടുകയാണ്. ഒപ്പം നിവിന് പോളി, മമിത ബൈജു കൂട്ടുകെട്ടും പ്രേക്ഷകര്ക്ക് ഹരമായി മാറി. ഇവര്തമ്മിലുള്ള കെമിസ്ട്രിയും നിവിന് പോളിയുടെ കോമഡി ടൈമിങ്ങും ആണ് ഈ സിനിമയുടെ പ്രത്യേകതയായി ചൂണ്ടിക്കാണിക്കപ്പെടുന്നത്. ഒരു ഇടവേളയ്ക്ക് ശേഷം നിവിന് പോളി എന്ന നായകന് തിരിച്ചെത്തുകയാണ്. മമിത ബൈജുവിനെ സംബന്ധിച്ചിടത്തോളം തമിഴിലെ രണ്ട് സൂപ്പര് സ്റ്റാറുകളായ വിജയ് (ജനനായകന്), സൂര്യ (വിശ്വനാഥന് ആന്റ് സണ്സ്) എന്നിങ്ങനെ രണ്ട് മെഹാഹിറ്റിന് ശേഷം മറ്റൊരു വിജയം കൂടിയാണ് ബെത്ലഹേം യൂണിറ്റിന്റെ സ്വീകാര്യതയിലൂടെ ലഭിച്ചിരിക്കുന്നത്. ഭാവനാ സ്റ്റുഡിയോസിന്റെ ബാനറില് ദിലീപ് പോത്തന്, ശ്യാം പുഷ്കരന്, ഫഹദ് ഫാസില് എന്നിവര് ചേര്ന്നാണ് ഈ സിനിമ നിര്മ്മിക്കുന്നത്.
ചിരിയാണ് ബെത്ലഹേം കുടുംബയൂണിറ്റിന്റെ മെയിന്. നിവിന് പോളി മാത്രമല്ല, സംഗീത് പ്രതാപ്, സുരേഷ് കൃഷ്ണ, വിനയ് ഫോര്ട്ട്, റോഷന് ഷാനവാസ്, ശ്യാം മോഹന് എന്നിവരും ചിരിയുടെ മാലപ്പടക്കം പൊട്ടിക്കുന്നു. ശ്രീന്ദ, മീനാക്ഷി, പാര്വ്വതി അയ്യപ്പദാസ് എന്നിവരും തകര്ത്തഭിനയിച്ചിരിക്കുന്നു. രണ്ട് മണിക്കൂര് 37 മിനിറ്റ് നേരം ബെത്ലഹേം കുടുംബയൂണിറ്റിലെ കഥാപാത്രങ്ങള്ക്കൊപ്പം നമ്മള് ചിരിയുടെയും പ്രണയത്തിന്റെയും മറ്റൊരു ലോകത്ത് അലിഞ്ഞുചേരുമെന്നാണ് വിലയിരുത്തല്.
കാറ്ററിംഗ് യൂണിറ്റ് നടത്തുന്ന ജസ്റ്റിനും കോളെജ് വിദ്യാര്ത്ഥിനിയായ ആഷ്ലിയുമായാണ് നിവിന് പോളിയും മമിത ബൈജുവും പ്രത്യക്ഷപ്പെടുന്നത്. കാറ്ററിംഗ് യൂണിറ്റിന് പുറമെ ലാപ് ടോപ് നന്നാക്കുന്ന, റിയല് എസ്റ്റേറ്റ് ഇടപാടുകള് നടത്തുന്ന, അനുജന് ജോയലിന് (സംഗീത് പ്രതാപ്) വേണ്ടി ഷോര്ട്ട് ഫിലിമുകള് പിടിക്കുന്ന ആള് കൂടിയാണ് നിവിന് പോളി. ഇവരുടെ ഗ്രാമമായ കറുകുറ്റിയിലേക്ക് സാമ്പത്തിക പ്രശ്നം മൂലം മുണ്ടക്കയത്ത് നിന്നും മാറിത്താമസിക്കാന് കൂടുംബത്തോടൊപ്പം എത്തുന്ന കഥാപാത്രമാണ് മമിത ബൈജുവിന്റെ ആഷ് ലി എന്ന കഥാപാത്രം. നിവിന് പോളിയുടെ അയല്വാസിയായി എത്തുന്ന മമിത ബൈജു ആദ്യം ഭയപ്പെടുകയും പിന്നീട് പ്രണയത്തിലേക്ക് വീഴുകയും ചെയ്യുകയാണ്. മമിത ബൈജു അഭിനയിക്കുകയാണെന്നേ തോന്നില്ല. കഥാപാത്രമായി ജീവിക്കുകയായിരുന്നു. ഒരു കോളെജ് പെണ്കുട്ടിയും അല്പം പ്രായമുള്ള യുവാവും തമ്മിലുള്ള പ്രണയം അനായാസമാണ് ഗിരീഷ് എഡി ചിത്രീകരിച്ചിരിക്കുന്നത്. ചിരിയ്ക്കും പ്രണയത്തിനും പുറമോ ആക്ഷനും ഡ്രാമയും കൂടി നിറഞ്ഞിരിക്കുന്നു. വിനായക് ശശികുമാറിന്റെ വരികള്ക്ക് വിഷ്ണുവിശാല് നല്കിയ സംഗീതവും ശ്രദ്ധനേടുകയാണ്. ഗിരീഷ് എഡിയും കിരണ് ജോസിയും ചേര്ന്നാണ് കഥ എഴുതിയിരിക്കുന്നത്.
