റാഞ്ചി: സമരത്തിന്റെ 24-ാം ദിവസം, നിയമന പരീക്ഷകളിലെ ക്രമക്കേടുകള്‍ക്കെതിരെ പ്രതിഷേധിക്കുന്ന വിദ്യാര്‍ത്ഥികളുടെ പ്രധാന ആവശ്യത്തിന് വഴങ്ങി ജാര്‍ഖണ്ഡ് സര്‍ക്കാര്‍. ജെഎസ്എസ്സി-സിജിഎല്‍ പരീക്ഷ അടക്കം, ടിഡിപിഎല്‍ നടത്തുന്ന എല്ലാ നിയമന പരീക്ഷകളും റദ്ദാക്കാന്‍ സര്‍ക്കാര്‍ തീരുമാനിച്ചു. മുഖ്യമന്ത്രി ഹേമന്ത് സോറന്റെ അധ്യക്ഷതയില്‍ നടന്ന മന്ത്രിസഭയുടെ യോഗമാണ് തീരുമാനമെടുത്തത്. 2014 മുതല്‍ സംസ്ഥാനത്ത് നടന്ന എല്ലാ നിയമന പരീക്ഷകളിലെയും ക്രമക്കേടുകള്‍ അന്വേഷിക്കാന്‍ സിഐഡിക്ക് നിര്‍ദ്ദേശം നല്‍കിയിട്ടുണ്ടെന്നും മുഖ്യമന്ത്രി പറഞ്ഞു.
നടന്നുകൊണ്ടിരിക്കുന്ന സിഐഡി, എസ്ഐടി അന്വേഷണങ്ങളില്‍ ചില പ്രാരംഭ വെളിപ്പെടുത്തലുകള്‍ ഉണ്ടായിട്ടുണ്ടെന്ന് മുഖ്യമന്ത്രി സമ്മതിച്ചു.
ജെപിഎസ്സി സിവില്‍ സര്‍വീസസ് പ്രിലിമിനറി പരീക്ഷ ഉള്‍പ്പെടെയുള്ള പരീക്ഷകള്‍ നടത്തിയ സ്വകാര്യ ഏജന്‍സിയാണ് ടിഡിപിഎല്‍. രണ്ട് സിവില്‍ സര്‍വീസസ് ബാക്ക്ലോഗ് പരീക്ഷകള്‍ക്ക് പുറമേ. 2024 ല്‍ ജാര്‍ഖണ്ഡ് സ്റ്റാഫ് സെലക്ഷന്‍ കമ്മീഷന്‍ (ജെഎസ്എസ്സി) ആണ് കമ്പൈന്‍ഡ് ഗ്രാജുവേറ്റ് ലെവല്‍ (സിജിഎല്‍) പരീക്ഷ നടത്തിയത്, വിജയിച്ച 1800 ഓളം ഉദ്യോഗാര്‍ത്ഥികളെ വിവിധ വകുപ്പുകളില്‍ നിയമിച്ചിട്ടുണ്ട്.
