തിരുവനന്തപുരം: ബുക്കുചെയ്ത പാചക വാതകസിലിണ്ടറുകള് രണ്ടുദിവസത്തിനുള്ളില് വിതരണക്കാര് ഉപഭോക്താക്കള്ക്ക് നല്കിയില്ലെങ്കില് എണ്ണക്കമ്പനികള് ബുക്കിംഗ് റദ്ദാക്കുന്ന രീതി ആള്ക്കാരെ വട്ടം ചുറ്റിക്കുന്നു. ഇറാനും അമേരിക്കയുമായുളള യുദ്ധം കാരണം പാചക വാതക ബുക്കിംഗിന് നിയന്ത്രങ്ങളുണ്ട്. അതിനിടെയാണ് പുതിയ രീതി. ഇത്തരത്തില് പ്രതിദിനം 3000 ബുക്കിംഗുകള് വരെ റദ്ദാക്കപ്പെടുന്നുണ്ടെന്നാണ് വിവരം. ദിവസങ്ങളോളം കാത്തിരുന്നാല് മാത്രമേ വീണ്ടും ബുക്കുചെയ്യാനാകൂ.
ബിപിസിഎല്ലിന് കീഴിലുള്ള ഏജന്സികള്ക്കാണ് കൂടുതല് പ്രശ്നം എന്നാണ് അറിയുന്നത്. ബുക്കിംഗ് റദ്ദാക്കപ്പെട്ടത് അറിയാതെ ഉപഭോക്താക്കളും ഏജന്സികളും തമ്മിലുള്ള തര്ക്കങ്ങളും ഉണ്ടാകുന്നുണ്ട്.ബുക്കുചെയ്ത എല്ലാവര്ക്കും സിലിണ്ടറുകള് രണ്ടുദിവസത്തിനുള്ളില് വിതരണംചെയ്യുക അസാദ്ധ്യമാണെന്നാണ് വിതരണക്കാരുടെ പക്ഷം.
വിതരണം വൈകുമ്പോഴാണ് ഒരു മുന്നറിയിപ്പുമില്ലാതെ ബുക്കിംഗ് റദ്ദാക്കുന്നത്. പശ്ചിമേഷ്യന് യുദ്ധത്തിന്റെ പശ്ചാത്തലത്തില് പാചക വാതക സിലിണ്ടര് ബുക്കിംഗിന് നിയന്ത്രണം ഏര്പ്പെടുത്തിയത് ഇപ്പോഴും തുടരുന്നുണ്ട്. ഗ്രാമപ്രദേശങ്ങളില് 45 ദിവസവും നഗരത്തില് 25 ദിവസവും കഴിഞ്ഞശേഷമേ ബുക്കുചെയ്യാന് കഴിയൂ. യുദ്ധം അവസാനിക്കാത്തതിനാല് ഈ നിയന്ത്രണം ഒഴിവാക്കുന്ന കാര്യത്തില് വ്യക്തതയില്ല.
