തിരുവനന്തപുരം: ബിജെപി സംസ്ഥാന കമ്മിറ്റിയുടെ നേതൃത്വത്തിൽ സംസ്ഥാനത്തുടനീളം വിപുലമായ സ്വാതന്ത്ര്യദിനാഘോഷ പരിപാടികൾ സംഘടിപ്പിച്ചു. സംസ്ഥാനതല ആഘോഷങ്ങളുടെ ഭാഗമായി തിരുവനന്തപുരത്തെ മാരാർജി ഭവനിൽ ബിജെപിയുടെ ആദ്യ സംസ്ഥാന അധ്യക്ഷനും മുതിർന്ന നേതാവുമായ ശ്രീ ഒ. രാജഗോപാൽ ദേശീയപതാക ഉയർത്തി. തുടർന്ന് പുഷ്പാർച്ചനയും പ്രവർത്തകർ വന്ദേ മാതരവും ദേശീയ ഗാനവും ആലപിച്ചു.
രാജ്യത്തിന്റെ സ്വാതന്ത്ര്യത്തിനായി ജീവത്യാഗം ചെയ്ത ധീരദേശാഭിമാനികളെ അനുസ്മരിച്ചുകൊണ്ടാണ് ചടങ്ങുകൾ സംഘടിപ്പിച്ചത്. ബിജെപി സംസ്ഥാന ജനറൽ സെക്രട്ടറി അഡ്വ. എസ്. സുരേഷ്, സംസ്ഥാന ഉപാധ്യക്ഷന്മാരായ ശ്രീ കെ. സോമൻ, ഡോ. അബ്ദുൽ സലാം, സംസ്ഥാന സെക്രട്ടറി പൂന്തുറ ശ്രീകുമാർ തുടങ്ങിയ സംസ്ഥാന-ജില്ലാ നേതാക്കളും പ്രവർത്തകരും മാരാർജി ഭവനിൽ നടന്ന ചടങ്ങിൽ പങ്കെടുത്തു.
സ്വാതന്ത്ര്യദിനാഘോഷങ്ങളുടെ ഭാഗമായി സംസ്ഥാനത്തെ വിവിധ ജില്ലാ കേന്ദ്രങ്ങളിലും മണ്ഡലം, പഞ്ചായത്ത് തലങ്ങളിലും ബിജെപിയുടെ നേതൃത്വത്തിൽ പരിപാടികൾ സംഘടിപ്പിച്ചു. എല്ലാ കേന്ദ്രങ്ങളിലും ദേശീയപതാക ഉയർത്തുകയും ‘വന്ദേ മാതരം’ പൂർണമായി ആലപിക്കുകയും ചെയ്തു. സ്വാതന്ത്ര്യത്തിന്റെ മഹത്വവും രാജ്യസ്നേഹത്തിന്റെ സന്ദേശവും ജനങ്ങളിലേക്ക് എത്തിക്കുന്ന വിവിധ പരിപാടികളും ഇതിന്റെ ഭാഗമായി നടന്നു.
