മദ്രസകളെയും മറ്റും ആര്‍ടിഇ ആക്ടില്‍ നിന്ന് ഒഴിവാക്കിയ വിധി സുപ്രീം കോടതി വിശാല ബെഞ്ച് പരിശോധിക്കും

ന്യൂദല്‍ഹി: മദ്രസകള്‍ അടക്കം മതബോധനം നല്‍കുന്ന ന്യൂനപക്ഷ സ്ഥാപനങ്ങളെ കുട്ടികളുടെ വിദ്യാഭ്യാസ അവകാശ നിയമത്തിന്റെ (ആര്‍ടിഇ ആക്ട്) വ്യവസ്ഥകളില്‍ നിന്ന് ഒഴിവാക്കിയ 2014 ലെ വിധി സുപ്രീം കോടതിയുടെ വിശാല ബെഞ്ച് പരിശോധിക്കും. മഹാരാഷ്‌ട്ര സംസ്ഥാന ന്യൂനപക്ഷ കമ്മീഷന്‍ ചെയര്‍മാന്‍ പ്യാരെ സിയ ഖാന്‍ സമര്‍പ്പിച്ച പൊതുതാല്‍പ്പര്യ ഹര്‍ജിയിലാണ് ജസ്റ്റിസുമാരായ ദീപങ്കര്‍ ദത്ത , ഷീല്‍ നാഗു എന്നിവരടങ്ങിയ ബെഞ്ചിന്‌റെ നിര്‍ദേശം.
ന്യൂനപക്ഷ വിദ്യാഭ്യാസ സ്ഥാപനങ്ങളില്‍ അധ്യാപക യോഗ്യതാ പരീക്ഷ (ടെറ്റ്) നിര്‍ബന്ധമാക്കുന്നതിന്‌റെ സാധ്യതകള്‍ പരിശോധിക്കാനും കോടതി സമ്മതിച്ചു.
ന്യൂനപക്ഷങ്ങളുടെ സാംസ്‌കാരികവും വിദ്യാഭ്യാസപരവുമായ അവകാശങ്ങള്‍ സംരക്ഷിക്കുന്ന ആര്‍ട്ടിക്കിള്‍ 29, 30 എന്നിവയ്‌ക്ക് വിധേയമായി മാത്രമേ ആര്‍ടിഇ നിയമം ബാധകമാകൂയെന്ന് സെക്ഷന്‍ 1(4) വ്യവസ്ഥ ചെയ്യുന്നു. മദ്രസകള്‍, വേദ പാഠശാലകള്‍, പ്രാഥമികമായി മതപരമായ പ്രബോധനം നല്‍കുന്ന വിദ്യാഭ്യാസ സ്ഥാപനങ്ങള്‍ എന്നിവയ്‌ക്ക് നിയമം ബാധകമല്ലെന്ന് സെക്ഷന്‍ 1(5) പറയുന്നു. സാര്‍വത്രികവും ഗുണനിലവാരമുള്ളതുമായ പ്രാഥമിക വിദ്യാഭ്യാസം ഉറപ്പാക്കുക എന്ന കുട്ടികളുടെ വിദ്യാഭ്യാസ അവകാശ നിയമത്തിന്റെ ലക്ഷ്യത്തോട് നീതിപുലര്‍ത്തുന്നതല്ല ഇതെന്ന് ഹര്‍ജിയില്‍ ചൂണ്ടിക്കാട്ടി.