കാസര്‍കോട്: വീര്‍സവര്‍ക്കറെയും വന്ദേമാതരത്തെയും താഴ്ത്തിക്കെട്ടാനുള്ള വി.ഡി. സതീശന്‍ സര്‍ക്കാരിന്റെയും കോണ്‍ഗ്രസ്, മുസ്ലിം ലീഗ്, സിപിഎം ഉള്‍പ്പെടെയുള്ള പാര്‍ട്ടി നേതാക്കളുടെയും നീക്കം അനുവദിക്കില്ലെന്ന് ബിജെപി കാസര്‍കോട് ജില്ലാ പ്രസിഡന്റ് എം.എല്‍. അശ്വിനി പറഞ്ഞു.
ചോദ്യത്തില്‍ ഉണ്ടായ സാങ്കേതിക പിഴവിനെ ചോദ്യം ചെയ്യുന്നതിന് പകരം, ഉത്തരമായി ‘വിനായക ദാമോദര്‍ സവര്‍ക്കര്‍’ എന്ന പേര് വന്നതിനെ തന്നെ പൂര്‍ണമായും എതിര്‍ക്കുന്ന നിലപാട് അംഗീകരിക്കാനാകില്ലെന്നും അവര്‍ വ്യക്തമാക്കി. ബിജെപി കാസര്‍കോട് ജില്ലാ ഓഫീസില്‍ മാധ്യമങ്ങളോട് സംസാരിക്കുകയായിരുന്നു അശ്വിനി.
ഗുരുപ്രസാദ് എന്ന അധ്യാപകന്‍ ക്വിസ് മത്സരത്തിന്റെ മേല്‍നോട്ടം വഹിക്കുക മാത്രമാണ് ചെയ്തിട്ടുള്ളത്. ‘ഏറ്റവും കൂടുതല്‍ ജയില്‍ശിക്ഷ’ എന്നതിന് പകരം ‘ഏറ്റവും കൂടുതല്‍ ശിക്ഷ’ എന്ന രീതിയില്‍ ചോദ്യം വന്നത് സാങ്കേതിക പിഴവായോ വ്യാകരണ പിശകായോ കാണുന്നതിന് പകരം, അതിന്റെ പേരില്‍ വീര്‍ സവര്‍ക്കറുടെ ദേശസ്‌നേഹത്തെയും ജയില്‍വാസത്തെയും ചോദ്യം ചെയ്യാനുള്ള ശ്രമമാണ് നടക്കുന്നതെന്ന് അശ്വിനി ആരോപിച്ചു. ഇത്തരം നീക്കങ്ങളെ ബിജെപി ശക്തമായി എതിര്‍ക്കുമെന്നും അവര്‍ പറഞ്ഞു. ചോദ്യപേപ്പര്‍ തയ്യാറാക്കിയ അധ്യാപികമാര്‍ക്കെതിരെ എന്തുകൊണ്ടാണ് നടപടി സ്വീകരിക്കാത്തതെന്ന് വിദ്യാഭ്യാസ വകുപ്പ് വ്യക്തമാക്കണം. വീര്‍ സവര്‍ക്കര്‍ എന്ന പേര് കേള്‍ക്കുമ്പോള്‍ തന്നെ ചിലര്‍ അതിരൂക്ഷമായി പ്രതികരിക്കുന്നതിന്റെ കാരണം എന്താണെന്ന് ഈ നാട്ടിലെ രാജ്യസ്‌നേഹികള്‍ക്ക് അറിയാന്‍ താല്‍പ്പര്യമുണ്ട്. ചരിത്രത്തെ രാഷ്‌ട്രീയ താല്‍പ്പര്യങ്ങള്‍ക്ക് അനുസരിച്ച് വളച്ചൊടിക്കാനുള്ള ശ്രമങ്ങള്‍ അംഗീകരിക്കാനാകില്ലെന്നും അശ്വിനി പറഞ്ഞു. ബിജെപി ജില്ലാ ജനറല്‍ സെക്രട്ടറി പി.ആര്‍. സുനിലും വാര്‍ത്താസമ്മേളനത്തില്‍ പങ്കെടുത്തു.
