തിരുവനന്തപുരം:സംസ്ഥാനത്ത് കനത്ത മഴയെത്തുടര്ന്നുണ്ടായ പ്രളയക്കെടുതികള് സംഭവിച്ച പ്രദേശങ്ങളില് ദുരിതാശ്വാസ പ്രവര്ത്തനങ്ങള് കൂടുതല് ഊര്ജ്ജിതമാക്കാന് ബിജെപി തീരുമാനിച്ചതായി സംസ്ഥാന അധ്യക്ഷന് രാജീവ് ചന്ദ്രശേഖര് എംഎല്എ. ഇതിന്റെ ഭാഗമായി കേരളത്തിലെ വിവിധ സ്ഥലങ്ങളില് ബി.ജെ.പി പ്രവര്ത്തകര് സേവന പ്രവര്ത്തനങ്ങളുമായി മുന്നിട്ടിറങ്ങുകയാണ്.
ക്യാമ്പുകള് സജ്ജമാക്കുക, ശുചീകരണ പ്രവര്ത്തനങ്ങള് നടത്തുക, റോഡുകളില് തടസങ്ങള് നീക്കുക തുടങ്ങിയ അടിയന്തര കാര്യങ്ങള് ബി.ജെ.പി പ്രവര്ത്തകര് ചെയ്തുവരുന്നുണ്ട്. ഇതിനോടകം തന്നെ വിവിധ സ്ഥലങ്ങളില്, പഞ്ചായത്ത് തലങ്ങള് വരെ കാള് സെന്ററുകളും ഹെല്പ്പ് ഡെസ്കുകളും പ്രവര്ത്തനം ആരംഭിച്ചിട്ടുണ്ട്. ദുരിതബാധിത പ്രദേശങ്ങളില് ഭക്ഷണ വിതരണം ഉള്പ്പെടെയുള്ള അടിയന്തര സഹായങ്ങളും പാര്ട്ടി ഉറപ്പാക്കുന്നുണ്ട്. ആവശ്യമായ ഇടങ്ങളിലെല്ലാം വൈദ്യസഹായത്തിനുള്ള സംവിധാനവും ഒരുക്കിയിട്ടുണ്ട്. റാന്നി, വയനാട്, ഇടുക്കി, കോട്ടയം തുടങ്ങി നിരവധി പ്രദേശങ്ങളിലെ സ്ഥിതിഗതികള് ഇപ്പോഴും അതീവ ഗുരുതരമായി തുടരുകയാണ്.
വിവിധ ജില്ലകളിലെ ദുരിതാശ്വാസ പ്രവര്ത്തനങ്ങളെ ഏകോപിപ്പിക്കുന്നതിനായി സംസ്ഥാനതലത്തില് ബിജെപി പ്രത്യേക സമിതി രൂപീകരിച്ചു. നിയമസഭാ കക്ഷി നേതാവ് ബി.ബി. ഗോപകുമാര് എം.എല്.എ, ജനറല് സെക്രട്ടറിമാരായ അഡ്വ. സുരേഷ്, അനൂപ് ആന്റണി, വൈസ് പ്രസിഡന്റ് കെ. സോമന് എന്നിവരുടെ നേതൃത്വത്തിലുള്ള പ്രത്യേക സംഘമാണ് ദുരിതാശ്വാസ പ്രവര്ത്തനങ്ങളുടെ ഏകോപന ചുമതല നിര്വഹിക്കുന്നത്. ഇവര് ദുരിതബാധിത മേഖലകളില് നേരിട്ടെത്തി പ്രവര്ത്തനങ്ങള് ഏകോപിപ്പിക്കും.
സംസ്ഥാനത്ത് പ്രളയക്കെടുതി അനുഭവിക്കുന്ന ജനങ്ങളെ സഹായിക്കാന് മുഴുവന് പ്രവര്ത്തകരും രംഗത്തിറങ്ങണമെന്ന് ബി.ജെ.പി സംസ്ഥാന അധ്യക്ഷന് രാജീവ് ചന്ദ്രശേഖര് ആഹ്വാനം ചെയ്തു. കേരളത്തിലെ ഈ ദുരിതകാലത്തെ നേരിടാന് എല്ലാ ജനങ്ങളും പരസ്പരം കൈകോര്ത്ത് മുന്നോട്ട് വരണം.
കേരളത്തിലുടനീളം പെയ്തിറങ്ങിയ കനത്ത മഴയിലും പെട്ടെന്നുണ്ടായ വെള്ളപ്പൊക്കത്തിലും നിരവധി ജീവനുകള് പൊലിയുകയും നാശനഷ്ടങ്ങള് സംഭവിക്കുകയും ചെയ്തതില് അതിയായ ദുഃഖം രേഖപ്പെടുത്തിയ അധ്യക്ഷന്, കേന്ദ്ര ആഭ്യന്തര മന്ത്രാലയം സ്ഥിതിഗതികള് കൃത്യമായി നിരീക്ഷിച്ചു വരികയും രക്ഷാപ്രവര്ത്തനങ്ങള്ക്കായി ദേശീയ ദുരന്ത പ്രതികരണ സേന സംഘങ്ങളെ ഇതിനകം വിന്യസിച്ചതായും അറിയിച്ചു.ദുരിതബാധിതരായ ഓരോ കുടുംബത്തിനും രക്ഷാപ്രവര്ത്തനങ്ങളും ദുരിതാശ്വാസ സഹായങ്ങളും എത്തുന്നുണ്ടെന്നും, വീടും ഉപജീവനമാര്ഗവും നഷ്ടപ്പെട്ടവര്ക്ക് സമയബന്ധിതമായ പിന്തുണ ലഭിക്കുന്നുണ്ടെന്നും ഉറപ്പാക്കണമെന്നും സംസ്ഥാന സര്ക്കാരിനോട് ബിജെപി സംസ്ഥാന അധ്യക്ഷന് അഭ്യര്ത്ഥിച്ചു.
