തിരുവനന്തപുരം: മേയര് വി.വി. രാജേഷ് എട്ടു ദിവസത്തെ ഔദ്യോഗിക സന്ദര്ശനത്തിനായി അമേരിക്കയിലേക്ക് തിരിച്ചു.ഫിലാഡല്ഫിയയില് നടക്കുന്ന ഫോക്കാന (ഫെഡറേഷന് ഓഫ് കേരള അസോസിയേഷന്സ് ഇന് നോര്ത്ത് അമേരിക്ക) സമ്മേളനത്തില് പങ്കെടുക്കുന്ന മേയര് പ്രവാസി മലയാളികള്, നഗര ഭരണാധികാരികള്, വിവിധ മേഖലകളില് പ്രാവീണ്യം തെളിയിച്ചവര് തുടങ്ങിയവരുമായി കൂടിക്കാഴ്ചയും നടത്തും.
മേയറായി ചുമതലയേറ്റതിന് പിന്നാലെ തിരുവനന്തപുരം കോര്പ്പറേഷന് ഓഫീസ് സന്ദര്ശിച്ച ഫോക്കാന ഭാരവാഹികളാണ് വി.വി. രാജേഷിനെ സമ്മേളനത്തിലേക്ക് ക്ഷണിച്ചത്.
അമേരിക്കയില് താമസിക്കുന്ന തിരുവനന്തപുരത്ത് നിന്നും ഉളള പ്രമുഖ വ്യക്തികളുമായും രാജേഷ് ആശയവിനിമയം നടത്തും.തിരുവനന്തപുരത്തിന് പ്രയോജനകരമായ മികച്ച മാതൃകകള് കണ്ടെത്തുന്നതിനായി, നഗര ഭരണം, മുനിസിപ്പല് ഭരണനിര്വഹണം, സുസ്ഥിര നഗരവികസനം എന്നിവയില് ആശയങ്ങള് കൈമാറുന്നതിനായി വിവിധ യുഎസ് നഗരങ്ങളിലെ മേയര്മാരുമായും നഗര ഭരണാധികാരികളുമായും അദ്ദേഹം കൂടിക്കാഴ്ച നടത്തും.
ന്യൂജേഴ്സിയില് നടക്കുന്ന ‘നാമം’ (NAMAM) അവാര്ഡ് നൈറ്റിലും വി വി രാജേഷ് പങ്കെടുക്കും. പരിപാടിക്കിടയില്, അന്താരാഷ്ട്ര പ്രശസ്തനായ ഓങ്കോളജിസ്റ്റ് ഡോ. എം.വി. പിള്ളയുമായും മറ്റ് പ്രമുഖ വിദഗ്ധരുമായും അദ്ദേഹം കൂടിക്കാഴ്ച നടത്തും. തിരുവനന്തപുരത്ത് അന്താരാഷ്ട്ര നിലവാരമുള്ള ആരോഗ്യ-അര്ബുദ ചികിത്സാ സൗകര്യങ്ങള് വികസിപ്പിക്കുന്നതിനുള്ള സാധ്യതകള് ചര്ച്ച ചെയ്യും.
അമേരിക്കന് മലയാളി സമൂഹവുമായി ശക്തമായ ബന്ധം കെട്ടിപ്പടുക്കാനും തിരുവനന്തപുരം നഗരത്തിന്റെ വികസന പ്രവര്ത്തനങ്ങള് വേഗത്തിലാക്കുന്നതില് അവരുടെ അനുഭവസമ്പത്തും വൈദഗ്ധ്യവും പിന്തുണയും പ്രയോജനപ്പെടുത്താനും ഈ സന്ദര്ശനം സഹായിക്കുമെന്ന് മേയര് പറഞ്ഞു.ആഗസ്റ്റ് 10-ന് രാജേഷ് തിരുവനന്തപുരത്ത് തിരിച്ചെത്തും. അദ്ദേഹത്തിന്റെ അഭാവത്തില്, മേയറുടെ ചുമതലകള് ഡെപ്യൂട്ടി മേയര് ജി എസ് ആശാ നാഥ് നിര്വഹിക്കും.
