ന്യൂദല്‍ഹി : ഇ 20 പെട്രോള്‍ സുരക്ഷിതമെന്നും ശാസ്ത്രീയമായ പഠനം നടത്തിയ ശേഷമാണ് അവതരിപ്പിച്ചതെന്നും ആവര്‍ത്തിച്ച് കേന്ദ്ര സര്‍ക്കാര്‍. ലോക്‌സഭയിലെ ചോദ്യത്തിന് കേന്ദ്ര പെട്രോളിയം സഹമന്ത്രി സുരേഷ് ഗോപിയാണ് മറുപടി പറഞ്ഞത്.
വാഹന നിര്‍മാതാക്കള്‍, ഓട്ടോമോട്ടീവ് റിസര്‍ച്ച് അസോസിയേഷന്‍, എണ്ണക്കമ്പനികള്‍ എന്നിവരുമായി ചര്‍ച്ച നടത്തിയിരുന്നു. ലാബിലും ഫീല്‍ഡിലും പരിശോധന നടത്തി.നിര്‍ദേശിച്ച പ്രകാരം ഉപയോഗിച്ചാല്‍ സുരക്ഷിതമാണ് എന്നാണ് കണ്ടെത്തല്‍.
നിതി ആയോഗ്, വാഹന നിര്‍മാതാക്കള്‍, എആര്‍എഐ തുടങ്ങിയവരുമായി ചേര്‍ന്ന് നടത്തിയ ശാസ്ത്രീയ പരിശോധനകളിലും പ്രായോഗിക പരീക്ഷണങ്ങളിലും ഇ20 സുരക്ഷിതമാണെന്ന് വ്യക്തമായി.പഴയ വാഹനങ്ങളില്‍ ഇ 20 പെട്രോള്‍ ഉപയോഗിക്കുന്നത്, തകരാറുകളോ ശേഷിയില്‍ കാര്യമായ വ്യത്യാസമോ ഉണ്ടാക്കുന്നില്ലെന്ന് ഈ പഠനങ്ങള്‍ തെളിയിക്കുന്നതായും അദ്ദേഹം പറഞ്ഞു.
എതനോള്‍ കലര്‍ത്തിയ ഇന്ധനം ഉപയോഗിക്കുന്നതിലൂടെ ഏതെങ്കിലും വാഹനത്തിന്റെ എന്‍ജിന്‍ തകരാറിലായതായി ഇതുവരെ ഔദ്യോഗികമായി റിപ്പോര്‍ട്ട് ചെയ്യപ്പെട്ടിട്ടില്ല. ഇത്തരം ഇന്ധനം ഉപയോഗിക്കുന്ന വാഹനങ്ങള്‍ക്കും നിര്‍മാതാക്കള്‍ വാറന്റി നല്‍കുന്നുണ്ട്- സുരേഷ് ഗോപി പറഞ്ഞു.
ഇ20 പെട്രോള്‍ സുരക്ഷിതമാണെന്ന് കേന്ദ്രഗതാഗത മന്ത്രി നിതിന്‍ ഗഡ്കരി നേരത്തെ പറഞ്ഞിരുന്നു. വാഹന എന്‍ജിന്റെ പ്രവര്‍ത്തനത്തെയോ കാര്യക്ഷമതയെയോ ദോഷകരമായി ബാധിക്കില്ല. വിദഗ്ധ സമിതികളുടെ പഠനങ്ങളുടെയും കൂടിയാലോചനകളുടെയും അടിസ്ഥാനത്തിലാണ് ഇ20 അവതരിപ്പിച്ചതെന്നും മന്ത്രി പറഞ്ഞു.
