റിയോ ഡി ജനീറോ: ആരാധകരെ വലിയ നിരാശയിലേക്ക് തള്ളിവിട്ടുകൊണ്ട് ബ്രസീലിയന് സൂപ്പര് താരം നെയമറുടെ സ്ഥിരീകരണം. ബ്രസീലിന്റെ മഞ്ഞക്കുപ്പായത്തില് ഇനിയൊരു തിരിച്ചുവരവുണ്ടാകില്ലെന്ന് ഉറപ്പിച്ച് സൂപ്പര്താരം നെയ്മര് ജൂനിയര്.
കോപ്പ സുഡാമേരിക്കാനയില് സാന്റോസ് 4-2ന് വെനിസ്വേലന് ക്ലബ്ബായ യൂണിവേഴ്സിഡാഡ് സെന്ട്രലിനെ തോല്പ്പിച്ച മത്സരത്തിന് ശേഷമാണ് വിരമിക്കല് തീരുമാനം നെയ്മര് ആവര്ത്തിച്ചത്. ലോകകപ്പില് നിന്ന് ബ്രസീല് പുറത്തായതിന് പിന്നാലെ ബ്രസീല് കുപ്പായത്തില് തന്റെ അവസാന മത്സരം കളിച്ചു കഴിഞ്ഞുവെന്ന് നെയ്മര് പറഞ്ഞിരുന്നു. എന്നാല്, കേവലം 34 വയസ് പ്രായമുള്ള നെയ്മര്ക്ക് അടുത്ത ലോകകപ്പ് കൂടി കളിക്കാനാകുമെന്നും അതിനായി പരിശ്രമിക്കണമെന്നും നെയ്മറുടെ പിതാവടക്കം പറഞ്ഞിരുന്നു. അതുകൊണ്ടുതന്നെ നെയ്മര് വിരമിക്കല് തീരുമാനം പിന്വലിക്കുമെന്ന് ആരാധകര് പ്രതീക്ഷിച്ചിരുന്നു. ദേശീയ ടീമിനൊപ്പമുള്ള എന്റെ അധ്യായം അവസാനിച്ചു. ഞാന് ചരിത്രം കുറിച്ചു, അതില് ഏറെ സന്തോഷവാനാണ്. ബ്രസീലിന്റെ മഞ്ഞക്കുപ്പായത്തിനു വേണ്ടി എന്റെ ജീവനും രക്തവും നല്കി ഞാന് പൊരുതി. എന്നാല് ഇനി ഞാനതിന് ആഗ്രഹിക്കുന്നില്ല. എല്ലാവിധ പിന്തുണയും ആരാധകരും ബ്രസീലിയന് ഫുട്ബോള് കോണ്ഫെഡറേഷനും നല്കി. എല്ലാവരോടും നന്ദിയുണ്ട്- നെയ്മര് പറഞ്ഞു
ലോകകപ്പിന്റെ ഭൂരിഭാഗം മത്സരങ്ങളിലും പരിക്കുമൂലം പുറത്തിരിക്കേണ്ടി വന്ന നെയ്മര്, നോര്വെയ്ക്കെതിരായ പ്രീ-ക്വാര്ട്ടറിലാണ് പകരക്കാരനായി കളത്തിലിറങ്ങിയത്. അവസാന നിമിഷങ്ങളില് ഒരു പെനാല്റ്റി ഗോള് നേടിയെങ്കിലും ടീമിന്റെ തോല്വിയും ലോകകപ്പില് നിന്നുള്ള പുറത്താകലും തടയാനായില്ല.
സാന്റോസ് സഹതാരങ്ങള് വെനിസ്വേലയില് കളിക്കുമ്പോള് നെയ്മര് പോക്കര് ടൂര്ണമെന്റില് പങ്കെടുത്തെന്ന മാധ്യമ റിപ്പോര്ട്ടുകള് വലിയ വാര്ത്തയായിരുന്നു. യൂണിവേഴ്സിഡാഡ് സെന്ട്രലിനെതിരായ 4-2ന്റെ വിജയത്തിനിടെ ഗോള് നേടിയ ശേഷം, കാര്ഡുകള് കൈകാര്യം ചെയ്യുന്നതും കോര്ണര് ഫ്ളാഗ് ഉപയോഗിച്ച് ഗോള്ഫ് കളിക്കുന്നതും അനുകരിച്ച് ആഘോഷിച്ചാണ് നെയ്മര് വിമര്ശകര്ക്ക് മറുപടി നല്കിയത്.
