ശാസ്താംകോട്ട: സഹകരണ സംഘത്തില് നിക്ഷേപവും തൊഴിലും വാഗ്ദാനം ചെയ്തു പാര്ട്ടി പ്രവര്ത്തകരില് നിന്നു കോടിക്കണക്കിനു രൂപ തട്ടിയെടുത്ത സിപിഎം വനിതാ നേതാവിനെതിരെ നടപടി ശക്തമാക്കാതെ യുഡിഎഫ് സര്ക്കാര്.
കൊല്ലം അഞ്ചുകല്ലുംമുട് കേന്ദ്രമായി പ്രവര്ത്തിക്കുന്ന കോഓപ്പറേറ്റീവ് ബില്ഡിങ് സൊസൈറ്റി ഓഫിസ് സെക്രട്ടറിയായ സിപിഎം കുന്നത്തൂര് ലോക്കല് കമ്മിറ്റിയംഗം ഗംഗയാണ് നേതാക്കളുടെ സംരക്ഷണയില് കഴിഞ്ഞുവന്നത്. സഹകരണ സ്ഥാപനത്തിലെ നിക്ഷേപ ം, ചിട്ടി എന്നിവയിലടക്കം അഞ്ച് കോടിയോളം രൂപയുടെ സാമ്പത്തിക തട്ടിപ്പ് നടത്തിയെന്ന സംഘം പ്രസിഡന്റിന്റെ പരാതിയില് കൊല്ലം വെസ്റ്റ് പൊലീസ് ഇവര്ക്കെതിരെ കേസെടുത്തിരുന്നു. ഇതോടെയാണ് ഗംഗ ഒളിവില് പോയത്.
നിക്ഷേപകര് കൂട്ടത്തോടെ പരാതികളുമായി എത്തിയിട്ടും ഗംഗയ്ക്കു രക്ഷപ്പെടാന് അവസരം നല്കിയത് പാര്ട്ടിയിലെ ഒരുവിഭാഗം നേതാക്കളാണെന്ന ആരോപണം ഉയര്ന്നതോടെ തിരക്കിട്ട് ലോക്കല് കമ്മിറ്റി ചേര്ന്നു പാര്ട്ടിയുടെ പ്രാഥമിക അംഗത്വത്തില് നിന്നും പുറത്താക്കിയിരുന്നു. സിപിഎം കുന്നത്തൂര് ഏരിയ കമ്മിറ്റിയംഗവും മഹിളാ അസോസിക്ഷന് ഏരിയ സെക്രട്ടറിയുമായ പ്രിയദര്ശിനിയുടെ സഹോദരിയാണ് ഗംഗ. പാര്ട്ടി പ്രവര്ത്തകരുടെ വിദ്യാസമ്പന്നരായ മക്കള്ക്ക് സഹകരണ സംഘത്തില് തൊഴില് ഉറപ്പാക്കാമെന്ന വിശ്വസിപ്പിച്ചാണ് വന് തുകകള് ഇവര് തട്ടിയെടുത്തത്.
മൈനാഗപ്പള്ളി പഞ്ചായത്ത് മുന് പ്രസിഡന്റിന് 53 ലക്ഷം രൂപയും മൈനാഗപ്പള്ളി കിഴക്ക് ലോക്കല് കമ്മിറ്റിയംഗത്തിന് 23 ലക്ഷം രൂപയും പടിഞ്ഞാറേകല്ലട ബ്രാഞ്ച് കമ്മിറ്റി അംഗത്തിന് 17 ലക്ഷം രൂപയും ശൂരനാട്, പേരുവഴി, കുലശേഖരപുരം ലോക്കല് കമ്മിറ്റി അംഗങ്ങള്ക്ക് 28 ലക്ഷം രൂപയും ഉള്പ്പെടെ കുന്നത്തൂര്, ശൂരനാട്, കരുനാഗപ്പള്ളി ഏരിയ കമ്മിറ്റി പരിധിയിലെ പാര്ട്ടി പ്രവര്ത്തകര്ക്ക് മൂന്ന് കോടിയോളം രൂപ നഷ്ടമായി. കുന്നത്തൂര് ലോക്കല് കമ്മിറ്റിയംഗമാണ് ഇടനിലക്കാരനായി പ്രവര്ത്തിച്ചത്. ഇയാള് അര ലക്ഷം രൂപ വരെ ഓരോ ഇടപാടിനും കമ്മീഷന് വാങ്ങിയെന്നും പാര്ട്ടിക്കു പരാതി ലഭിച്ചിട്ടുണ്ട്.
വഞ്ചിതരായ പ്രാദേശിക നേതാക്കള് പാര്ട്ടി നേതൃത്വത്തിനു പരാതി നല്കിയെങ്കിലും പരിഹാര നടപടികള് ഒന്നുമുണ്ടായില്ല. പോലീസ് കേസെടുത്ത സാഹചര്യത്തില് ഗംഗയെ സിപിഎം നേതൃത്വം ഇടപെട്ട് രഹസ്യ കേന്ദ്രങ്ങളിലേക്ക് മാറ്റി. എന്നാല് പിന്നീട് യുഡിഎഫ് സര്ക്കാര് അധികാരത്തില് വന്നെങ്കിലുംഇവര്ക്കെതിരെ ശക്തമായ നടപടി സ്വീകരിച്ചില്ലെന്നതാണ് വാസ്തവം.
എം.എസ്.ജയച്ചന്ദ്രന്
