പരസ്പരപൂരകങ്ങളാണ് പ്രകൃതിയും പുരുഷനും. അപ്പോള്‍ ഇരുകൂട്ടര്‍ക്കും വേറിട്ട് അസ്തിത്വമുണ്ടോ? അതിനാല്‍, കാട്ടിലേക്കു കൂട്ടാതിരിക്കാനുള്ള തടസ്സ വാദങ്ങളൊന്നും വേണ്ട സീതാദേവിയോട്.
”രാമായണങ്ങള്‍ പലതും കവിവരരാമോദമോടു പറഞ്ഞുകേള്‍പ്പുണ്ടു ഞാന്‍. ജാനകിയോടു കൂടാതെ രഘുവരന്‍ കാനനവാസത്തിനെന്നു പോയിടുന്നു.”
ദുഷ്ടരാക്ഷസരുടെ വിഹാരകേന്ദ്രത്തിലേക്കാണു യാത്രയെന്നറിയാം. ഭക്ഷിക്കാന്‍ കിട്ടുന്നത് എന്തെങ്കിലുമൊക്കെയാകാം. ക്ലേശങ്ങള്‍ നിറഞ്ഞതാണ് കാനനം. എങ്കിലും ”നിന്നുടെ സന്നിധൗ വാണീടുമെന്നെ മറ്റാര്‍ക്കാനും പീഡിച്ചു കൂടുമോ?” എന്നാണ് സീതയുടെ രാമനോടുള്ള ചോദ്യം. ഭര്‍ത്താവുമൊത്തു നടക്കുമ്പോള്‍ കൂര്‍ത്തുമൂര്‍ത്ത കല്ലുകളും മുള്ളുകളും പൂക്കള്‍ക്കു സമാനംതന്നെ. വഴങ്ങാതെ നിവൃത്തിയില്ല സീതാവല്ലഭന്. അങ്ങനെയെങ്കില്‍ തയാറെടുത്തുകൊള്ളുക. കാട്ടിലേക്കു വേണ്ടാത്തതൊക്കെ ഗുരുപത്‌നി അരുന്ധതീദേവിക്കു നല്‍കി പുറപ്പെട്ടുകൊള്‍ക.
ജന്മഭൂമി ഓണ്‍ലൈന്‍