പാലത്തോള് ശ്രീരാമസ്വാമി ക്ഷേത്രം
മലപ്പുറം ജില്ലയില് ഏലംകുളം പഞ്ചായത്തിലെ മല്ലിശ്ശേരിക്ക് അടുത്ത് വാഴങ്കോളിലാണ് പാലത്തോള് ശ്രീരാമക്ഷേത്രം. ശംഖ്ചക്ര ഗദാപത്മധാരിയായ മഹാവിഷ്ണുവിന്റെ പൂ
ര്ണ്ണകായ കൃഷ്ണശിലാവിഗ്രഹം പടിഞ്ഞാറു ദര്ശനമായാണ് പ്രതിഷ്ഠിച്ചിരിക്കുന്നത്.
ഹനുമാന്റെ കയ്യില് മുദ്രമോതിരം നല്കുന്ന സമയത്തെ ഭഗവാന്റെ ഭാവമാണ് പ്രതിഷ്ഠയ്ക്ക്. ഉപദേവതകള് ഇല്ല. ചതുര ശ്രീകോവിലാണ്.സഹസ്രനാമ പുഷ്പാഞ്ജലി, ശര്ക്കരപ്പായസം, പാല്പ്പായസം, വെള്ളനിവേദ്യം, എന്നിവയാണ് പ്രധാന വഴിപാടുകള്.
അന്യാധീനപ്പെട്ട ഭൂമി വീണ്ടെടുത്താണ് ശ്രീരാമ ക്ഷേത്രം പണിത് പുന:പ്രതിഷ്ഠ നിര്വഹിച്ചത്.രാമായണമാസക്കാലത്ത് രാവിലെ ആറുമണി മുതല് 11 മണി വരെയും വൈകിട്ട് 5 മണി മുതല് 6 മണി വരെയുമാണ് ദര്ശന സമയം.
പാലത്തോള് മഹാവിഷ്ണു ക്ഷേത്രം (ലക്ഷ്മണ സങ്കല്പം)
ഭഗവാന് ലക്ഷ്മണഭാവത്തില് പടിഞ്ഞാട്ട് ദര്ശനമായിരിക്കുന്ന ക്ഷേത്രമാണിത്. 2000 വര്ഷത്തിലധികം പഴക്കമുണ്ടെന്നാണ് വിശ്വാസം. നാല് തൃക്കൈകളിലും ശംഖ്, ചക്രം, ഗദ, പത്മമേന്തിയ മഹാവിഷ്ണുവിന്റെ പൂര്ണ്ണകായ വിഗ്രഹമാണ് വട്ടശ്രീകോവിലില്.
ശാസ്താവ്, ഗണപതി, നാഗം ഉപദേവതകള്. പ്രഭാ സത്യക സമേതനായ ശാസ്താവിന് നാലമ്പലത്തിന് പുറത്ത് പ്രത്യേകം ശ്രീകോവില് ഉണ്ട്. നാലമ്പലത്തിനകത്ത് ശ്രീകോവിലിന്റെ തെക്കുഭാഗത്ത് തെക്കോട്ടു ദര്ശനമായി ഗണപതി പ്രതിഷ്ഠയുമുണ്ട്. നിത്യവും മൂന്ന് പൂജകള് ആണുള്ളത്. ജനകീയ കമ്മറ്റി ഏറ്റെടുത്താണ് ക്ഷേത്രപുനരുദ്ധാരണം നടത്തിയത്.
അര്ച്ചന, അപ്പം, അട, വിദ്യാഗോപാല പൂജ, പാല്പ്പായസം, നീരാജനം എന്നിവ ഇവിടുത്തെ പ്രധാന വഴിപാടുകളാണ്. സത്സന്താന ലബ്ധിക്കായി പുത്രകാമേഷ്ടി ഹോമം തുലാമാസത്തിലെ തിരുവോണം നക്ഷത്രത്തില് നടന്നുവരുന്നു.
പാലത്തോള് ഭരതസ്വാമി
ഏലംകുളം പഞ്ചായത്തിലാണ് ക്ഷേത്രം. രാമ-ലക്ഷ്മണന്മാരെ നോക്കി കിഴക്കോട്ടാണ് ചതുര ശ്രീകോവിലില് ഭരത സ്വാമിയുടെ, രണ്ട് കൈകള് ഉള്ള, കൃഷ്ണശിലാ വിഗ്രഹ പ്രതിഷ്ഠ. ഉപദേവതകളില്ല. ക്ഷേത്രത്തിന് 1500 വര്ഷത്തിലധികം പഴക്കമുണ്ട്. വിവിധ സൂക്താര്ച്ചനകള്, മാല, പായസം, നെയ് വിളക്ക്, കാര്യസാധ്യത്തിന് വേണ്ടി വഴുതനങ്ങ നിവേദ്യം തുടങ്ങിയവയാണ് പ്രധാന വഴിപാടുകള്. വഴിപാട് നടത്തേണ്ടവര് തന്നെ വഴുതനങ്ങ നിവേദ്യം തയ്യാറാക്കണം.
മലയാളമാസം ഒന്നാം തീയ്യതി മാത്രമാണ് പൂജ.കര്ക്കടകത്തില് രാവിലെ അഞ്ചര മുതല് പത്തര വരെയും വൈകിട്ട് 5 മുതല് 7 വരെയും ക്ഷേത്രദര്ശനമുണ്ട്.
പാലത്തോള് ശത്രുഘ്ന ക്ഷേത്രം
കിഴക്കോട്ട് ദര്ശനമായ ശത്രുഘ്ന സ്വാമിയാണ് ഈ ക്ഷേത്രത്തിലെ പ്രതിഷ്ഠ. ശംഖ് ചക്ര ഗദാ പത്മങ്ങള് നാലു തൃക്കൈകളിലുമേന്തിയ ചതുര്ബാഹുവായ മഹാവിഷ്ണു രൂപമാണ്. ഇവിടെ ഭഗവാന് ക്രോധഭാവമാണ്. ശ്രീകോവില് ചതുരാകൃതിയിലാണ്. കൃഷ്ണശിലാ വിഗ്രഹമാണുള്ളത്. ഉപദേവതകള് ഇല്ല. പാനകം, ശ്രീചക്രപൂജ , കളഭച്ചാര്ത്ത് ഇവയാണ് പ്രധാന വഴിപാടുകള്.
ക്ഷേത്രത്തില് നിത്യപൂജ രാവിലെ മാത്രമാണ് ഉള്ളത്. കര്ക്കടകത്തില് രണ്ടു നേരം പൂജ ഉണ്ട്. കര്ക്കടകത്തില് രാവിലെ 6 മുതല് ഉച്ചയ്ക്ക് 12 വരെയും വൈകീട്ട് 5 മുതല് രാത്രി 7 വരെയുമാണ് ദര്ശനസമയം.
ജന്മഭൂമി ഓണ്ലൈന്