ചെന്നൈ : നീറ്റ് പരീക്ഷാ ചോദ്യപേപ്പർ ചോർച്ചയ്ക്കെതിരെ ദൽഹിയിലെ ജന്തർ മന്തറിൽ ആരംഭിച്ച സിജെപിയുടെ പ്രതിഷേധത്തിന് പിന്തുണ അറിയിച്ച് നടൻ കമൽഹാസൻ. എക്സിലെ ഒരു പോസ്റ്റിലാണ് കമൽ തന്റെ പിന്തുണ അറിയിച്ചത്. സംവിധാനങ്ങൾ പൂർണ്ണമായും തകർന്നുവെന്നും രാജ്യം പരാജയപ്പെട്ടുവെന്നും അദ്ദേഹം പറഞ്ഞു.
ഒരു നീണ്ട പോസ്റ്റ് പങ്കുവെച്ചുകൊണ്ട് നമ്മൾ കാത്തിരിക്കേണ്ടിയിരുന്നില്ല, ഒരു കുട്ടി കരയുമ്പോൾ അത് കേൾക്കണമായിരുന്നുവെന്ന് കമൽ ഹസൻ പറഞ്ഞു. ഒരു രാജ്യത്തെ കുട്ടികൾ ഉത്തരങ്ങൾക്ക് പകരം ബാരിക്കേഡുകളും ലാത്തിച്ചാർജ്ജും നേരിടുമ്പോൾ, ആ രാജ്യം പരാജയപ്പെട്ടു. @Wangchuk66, മുന്നോട്ടുള്ള യാത്രയിൽ രാജ്യത്തിന് നിങ്ങളുടെ മനസ്സാക്ഷിയുടെ ശബ്ദം ആവശ്യമാണ്. ദയവായി നിങ്ങളുടെ നിരാഹാരം അവസാനിപ്പിക്കുക എന്നും താരം പോസ്റ്റിൽ കൂട്ടിച്ചേർത്തു.
ഇതിനു പുറമെ കുട്ടികളോടും അദ്ദേഹം അഭ്യർത്ഥിച്ചു. “നിങ്ങളാണ് ഞങ്ങളിൽ ഏറ്റവും മികച്ചത്. നിങ്ങൾ നിങ്ങളുടെ കടമ നിർവഹിച്ചു. ഇനി രാഷ്ട്രം നിങ്ങളോടുള്ള കടമ നിർവഹിക്കണം. നിങ്ങളുടെ സ്വപ്നങ്ങൾ എപ്പോഴും ഞങ്ങളുടെ പരാജയങ്ങളേക്കാൾ വലുതായിരിക്കട്ടെ.”- നടൻ കൂട്ടിച്ചേർത്തു.
