ന്യൂഡൽഹി: നീറ്റ് പേപ്പർ ചോർച്ചയിൽ രാജ്യത്തുട നീളമുള്ള പ്രതിഷേധങ്ങളിൽ പ്രതികരണവുമായി കേന്ദ്ര സർക്കാർ. കേസിൽ അതിവേഗ കോടതികൾ സ്ഥാപിക്കുമെന്നും, കുറ്റക്കാർക്കെതിരെ കർശന നടപടിയുണ്ടാവുമെന്നും പ്രധാനമന്ത്രി നരേന്ദ്ര മോദി തന്റെ എക്സ് പോസ്റ്റിൽ വ്യക്തമാക്കി. പേപ്പർ ചോർച്ച കേസുകൾ വേഗത്തിൽ വിചാരണ ചെയ്യുന്നതിനും കുറ്റവാളികൾക്ക് വേഗത്തിലുള്ള ശിക്ഷ നൽകുന്നതിനുമായായിരിക്കും അതിവേഗ കോടതികൾ.
ഒപ്പം രാജ്യത്തെ യുവാക്കൾക്കും അവരുടെ ക്ഷേമത്തിനുമാണ് ഗവൺമെൻ്റിന്റെ പ്രഥമ പരിഗണനയെന്ന് അദ്ദേഹം പോസ്റ്റിൽ പറയുന്നു. തീരുമാനം നടപ്പാക്കുന്നതിന് ഉചിതമായ നടപടികൾ കൈക്കൊള്ളാൻ ബന്ധപ്പെട്ട ഉദ്യോഗസ്ഥർക്ക് നിർദേശം നല്കിയിട്ടുണ്ടെന്നും അദ്ദേഹം പോസ്റ്റിൽ പറഞ്ഞു. വിദ്യാർത്ഥികളുടെ താൽപ്പര്യങ്ങൾ സംരക്ഷിക്കുന്നതിനും പരീക്ഷാ സമ്പ്രദായത്തിൽ സുതാര്യത ഉറപ്പാക്കുന്നതിനുമായി സ്വീകരിച്ച നടപടികളുടെ ഒരു പരമ്പരയുടെ ഭാഗമാണിതെന്നും പ്രധാനമന്ത്രി വ്യക്തമാക്കി.
