ന്യൂജേഴ്സി: ലോകകപ്പ് ഫൈനലിന് പിന്നാലെ മത്സരം നടന്ന ന്യൂജേഴ്സി സ്റ്റേഡിയത്തില് അര്ജന്റീന താരങ്ങള് നടത്തിയ അക്രമ സംഭവത്തില് ഫിഫ അന്വേഷണം നടത്തും. ഇതിനായി ഫിഫ അച്ചടക്ക സമിതി ഡിസിപ്ലിനറി ആന്ഡ് എത്തിക്സ് പ്രോസിക്ക്യൂട്ടറെ ചുമതലപ്പെടുത്തി. മത്സരശേഷം എന്താണ് സംഭവിച്ചതെന്ന് കണ്ടെത്താനാണ് നിര്ദേശം നല്കിയിരിക്കുന്നത്.
ഫൈനലില് അര്ജന്റീനയെ 1-0ന് തോല്പ്പിച്ച് സ്പെയിന് ജേതാക്കളായിരുന്നു. മത്സരശേഷം സ്പാനിഷ് താരങ്ങള് മൈതാനത്തിറങ്ങി ആഹ്ലാദിക്കുന്ന അവസരത്തിലായിരുന്നു അനിഷ്ട സംഭവങ്ങള് അരങ്ങേറിയത്. അര്ജന്റീന താരങ്ങളായ നഹുവേല് മൊളീന, ലിയാന്ഡ്രോ പരേദേസ്, തിയാഗോ അല്മാഡ, ടീം അസിസ്റ്റന്റ് കോച്ച് റോബര്ട്ടോ അയാള എന്നിവര് സംഭവത്തിലുള്പ്പെട്ടിരുന്നു. സ്പാനിഷ് താരം എറിക് ഗാര്ഷ്യയെ പരേദേസ് കഴുത്തിന് പിടിച്ചു തള്ളുകയും കോച്ച് ലയണല് സ്കലോനി പരേദേസിനെ പിന്തിരിപ്പിക്കാന് ശ്രമിക്കുന്നതും. തുടര്ന്ന് മറ്റൊരു സ്പാനിഷ് താരം ഗാവിയുടെ മുഖത്ത് പിടിച്ച് നിലത്തടിക്കുകയും ഇടിക്കുകയും ചെയ്തത് മാധ്യമങ്ങളിലൂടെ ചിത്രങ്ങളും വീഡിയോകളും സഹിതം പ്രചരിച്ചിരുന്നു.
