പാരീസ്: 15 വയസ്സിൽ താഴെയുള്ള കുട്ടികൾക്ക് സോഷ്യൽ മീഡിയ ഉപയോഗിക്കുന്നതിന് പൂർണ്ണ വിലക്കേർപ്പെടുത്തി ഫ്രാൻസ് പാർലമെന്റ് നിയമം പാസ്സാക്കി. ഇതോടെ കുട്ടികൾക്ക് സോഷ്യൽ മീഡിയ പ്ലാറ്റ്ഫോമുകൾ വിലക്കുന്ന ആദ്യ യൂറോപ്യൻ രാജ്യമായി ഫ്രാൻസ് മാറി. 2027 ജനുവരി മുതൽ നിയമം പൂർണ്ണമായി പ്രാബല്യത്തിൽ വരും.
കുട്ടികളുടെ മാനസികാരോഗ്യത്തെയും സുരക്ഷിതത്വത്തെയും മുൻനിർത്തിയാണ് ഈ നിർണ്ണായക തീരുമാനം. പുതിയ നിയമമനുസരിച്ച് ഫ്രാൻസിൽ സോഷ്യൽ മീഡിയ ഉപയോഗിക്കുന്ന എല്ലാവരും പ്രായം തെളിയിക്കുന്ന പ്രായപരിശോധന നടത്തേണ്ടി വരും. ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഈ തീരുമാനത്തെ സ്വാഗതം ചെയ്തു. സെനറ്റിലും നാഷണൽ അസംബ്ലിയിലും ചൊവ്വാഴ്ച നടന്ന വോട്ടെടുപ്പിലൂടെയാണ് ബില്ലിന് അംഗീകാരം ലഭിച്ചത്.
രണ്ട് ഘട്ടങ്ങളായാണ് വിലക്ക് നടപ്പിലാക്കുന്നത്. ഈ വർഷം സെപ്റ്റംബർ മുതൽ 15 വയസ്സിൽ താഴെയുള്ളവർക്ക് പുതിയ സോഷ്യൽ മീഡിയ അക്കൗണ്ടുകൾ തുടങ്ങാൻ സാധിക്കില്ല. പുതിയ അക്കൗണ്ട് തുടങ്ങുന്ന എല്ലാവർക്കും പ്രായപരിശോധന നിർബന്ധമാക്കും. 2027 ജനുവരി മുതൽ ഈ നിയമം നിലവിലുള്ള എല്ലാ അക്കൗണ്ടുകൾക്കും ബാധകമാകും. ഇതോടെ ഫ്രാൻസിലെ മുഴുവൻ ഉപയോക്താക്കളും 15 വയസ്സിന് മുകളിലാണെന്ന് സാക്ഷ്യപ്പെടുത്തേണ്ടി വരും.
ഓസ്ട്രേലിയക്ക് ശേഷം കുട്ടികൾക്ക് സോഷ്യൽ മീഡിയ വിലക്കുന്ന രണ്ടാമത്തെ രാജ്യമാണ് ഫ്രാൻസ്. നിയമത്തിന്റെ വ്യാപ്തിയെയും സാങ്കേതിക പ്രായോഗികതയെയും കുറിച്ച് ചില വിമർശനങ്ങൾ ഉയർന്നിട്ടുണ്ടെങ്കിലും, പ്രായപരിശോധന ഉറപ്പാക്കാനുള്ള ഡിജിറ്റൽ സംവിധാനങ്ങൾ സുരക്ഷിതവും ഫലപ്രദവുമാണെന്ന് ഫ്രഞ്ച് സർക്കാർ വ്യക്തമാക്കി. ഓസ്ട്രേലിയക്ക് പുറമെ യുകെയും യൂറോപ്യൻ യൂണിയനും കുട്ടികളുടെ സോഷ്യൽ മീഡിയ ഉപയോഗത്തിൽ നിയന്ത്രണങ്ങൾ കൊണ്ടുവരാനുള്ള തയാറെടുപ്പിലാണ്.
