ഗുരുക്കന്മാര്‍ ദീര്‍ഘദര്‍ശികളാണെന്നു പറഞ്ഞുവല്ലോ. യാഗരക്ഷാര്‍ഥം രാമലക്ഷ്മണകുമാരന്മാരെ ഒപ്പംകൂട്ടുന്ന വിശ്വാമിത്രമഹര്‍ഷി അവര്‍ക്ക് ബല, അതിബല മന്ത്രോപദേശം നല്‍കിയ ശേഷമാണ് ഗംഗാനദി കടത്തുന്നത്. ദാഹവും വിശപ്പും അതിജീവിക്കാനുള്ള ദേവനിര്‍മിതവിദ്യകളാണിവ.
ദുര്‍ഘടലക്ഷ്യങ്ങളാണ് ഇനി മുതല്‍ ഇവര്‍ക്കു മുന്നില്‍.കാത്തിരിക്കുന്ന പ്രതിസന്ധികളുടെ കാട്ടുപാതകളെ ഗുരു നേരത്തേ കാണുന്നു.
താടകാവനത്തിലെ ഘോരരൂപിണി രാമബാണമേറ്റു ചിറകറ്റ മല പോലെ വീഴുന്നതോടെ, ലക്ഷ്മണസമേതനായ രാമന് ദിവ്യാസ്ത്രങ്ങള്‍ ഉപദേശിക്കുകയാണ് ഗുരു വിശ്വാമിത്രന്‍. യാഗഭഞ്ജകരായ രാക്ഷസരെ കാട്ടിക്കൊടുക്കുകയേ വേണ്ടൂ ഇനി അദ്ദേഹത്തിന്.
രാക്ഷസ സംഘത്തിലെ സുബാഹു ഉള്‍പ്പെടെ ഒപ്പമുള്ളവരൊക്കെയും ഇല്ലാതാകുമ്പോള്‍ മാരീചന് മാത്രം അവശേഷിക്കുന്നു. അമ്പില്‍നിന്നു രക്ഷയില്ലാതെ കരയിലും വെള്ളത്തിലും പായുന്ന അയാള്‍ക്ക് ഒടുവില്‍ ഭഗവദ്പാദങ്ങള്‍തന്നെ അഭയം. മറ്റൊരു ദൗത്യത്തിനായി ജീവിതം തുടരേണ്ടതുണ്ട് മാരീചന്. രാവണനെ ഭയന്ന് ആ ദൗത്യം ഏറ്റെടുക്കുമ്പോഴും ഭഗവാന്റെ തികഞ്ഞ ഭക്തന്‍തന്നെ മാരീചന് എന്നു കാണാം പില്‍ക്കാലത്ത്.
ജന്മഭൂമി ഓണ്‍ലൈന്‍