ആറ്റിങ്ങല്‍: ഉപയോഗിക്കാത്ത വൈദ്യുതിക്ക് ബില്ല് നല്‍കിയ കെഎസ്ഇബിക്ക് 10,000 രൂപയുടെ പിഴ. പുറമേ കോടതിച്ചെലവിനത്തില്‍ 3,000 രൂപയും പരാതിക്കാരന് നല്‍കണം. തിരുവനന്തപുരം ജില്ലാ ഉപഭോക്ത്യ തര്‍ക്ക പരിഹാര കമ്മിഷന്റേതാണ് വിധി. പരാതിക്കാരന് കെഎസ്ഇബി നല്‍കിയ ബില്ലും കമ്മിഷന്‍ റദ്ദാക്കി. ഇളമ്പ പൂവണത്തുംമൂട് സൗപര്‍ണികയില്‍ എസ്. രവീന്ദ്രന്‍പിള്ളയുടെ പരാതിയിലാണ് കമ്മിഷന്റെ നടപടി.
രവീന്ദ്രന്‍പിള്ള 2013ല്‍ വാങ്ങിയ വീടിന്റെ വൈദ്യുതിബില്ലുമായി ബന്ധപ്പെട്ടാണ് പരാതി ഉണ്ടായത്. വീട് വാങ്ങിയ ശേഷം ലഭിച്ച ആദ്യത്തെ ബില്ല് 123 രൂപയുടേതായിരുന്നു. ഡോര്‍ ക്ലോസ്ഡ് എന്ന് രേഖപ്പെടുത്തിയിരുന്ന ബില്ലായിരുന്നു ഇത്. രണ്ടുമാസം കഴിഞ്ഞ് റീഡിങ് എടുത്തശേഷം 3000 യൂണിറ്റ് വൈദ്യുതി ഉപയോഗിച്ചതായും ഇതിന് 25,059 രൂപയുടെ ബില്ല് നല്‍കുകയും ചെയ്തു. താന്‍ ഇത്രയും വൈദ്യുതി ഉപയോഗിച്ചിട്ടില്ലെന്ന് കാണിച്ച് രവീന്ദ്രന്‍പിള്ള കെഎസ്ഇബി അധികൃതര്‍ക്ക് പരാതി നല്‍കി.
ഇടിമിന്നല്‍ കാരണം ഉണ്ടായതാകാം എന്ന് കെഎസ്ഇബി വിലയിരുത്തിയെങ്കിലും ബില്ലടയ്‌ക്കാനായിരുന്നു നിര്‍ദേശം. അതടയ്‌ക്കാന്‍ കഴിയാതെ വന്നതോടെ രവീന്ദ്രന്‍പിള്ളയുടെ വീട്ടിലേക്കുള്ള വൈദ്യുതി കെഎസ്ഇബി വിച്ഛേദിച്ചു. തുടര്‍ന്ന് ആറ്റിങ്ങല്‍ ഓഫീസില്‍ രവീന്ദ്രന്‍പിള്ള പരാതി നല്‍കി. അസിസ്റ്റന്റ് എന്‍ജിനിയര്‍ പരിശോധന നടത്തി. തുടര്‍ന്ന് 4000 രൂപ അടിയന്തരമായി അടയ്‌ക്കാന്‍ നിര്‍ദേശിച്ചു. ഈ തുക രവീന്ദ്രന്‍ പിള്ള അടച്ചതിനെത്തുടര്‍ന്ന് അടുത്ത ദിവസം വൈദ്യുതി കണക്ഷന്‍ നല്‍കി. അവശേഷിക്കുന്ന 21,059 രൂപയുടെ കുടിശ്ശിക സംബന്ധിച്ച് പിന്നീട് പരിശോധിക്കാമെന്ന് അധികൃതര്‍ അറിയിച്ചു. എന്നാല്‍ പിന്നീട് രവീന്ദ്രന്‍പിള്ളയ്‌ക്ക് ഈ തുകയും ഇതിന്റെ പലിശയും ചേര്‍ത്ത് 35,308 രൂപ 15 ദിവസത്തിനുള്ളില്‍ അടയ്‌ക്കണമെന്ന് കാണിച്ച് കെഎസ്ഇബി നോട്ടീസ് നല്‍കി. ഇതേത്തുടര്‍ന്ന് 2017 ഡിസംബര്‍ 28ന് രവീന്ദ്രന്‍പിള്ള ജില്ലാ ഉപഭോക്തതര്‍ക്ക പരിഹാര കമ്മിഷനില്‍ പരാതി നല്‍കി. പത്താം ക്ലാസുവരെ മാത്രം പഠിച്ചിട്ടുള്ള കൃഷിപ്പണിക്കാരനായ രവീന്ദ്രന്‍ പിള്ള (72) തനിച്ചാണ് തനിക്കുവേണ്ടി കോടതിയില്‍ വാദിച്ചത്.
കെഎസ്ഇബിക്കുവേണ്ടി അഭിഭാഷകന്‍ ഹാജരായി. ഉപഭോക്ത്യ തര്‍ക്കപരിഹാര കമ്മിഷന്‍ പ്രസിഡന്റ് പി.വി. ജയരാജന്‍, അംഗങ്ങളായ പ്രീത ജി. നായര്‍, വി.ആര്‍. വിജു എന്നിവരാണ് വാദം കേട്ട് ജൂണ്‍ 22ന് വിധി പ്രസ്താവിച്ചത്. നഷ്ടപരിഹാരത്തിനു പുറമേ വൈദ്യുതി ബോര്‍ഡ് നല്‍കിയ 35,308 രൂപയുടെ ബില്‍ കാന്‍സല്‍ ചെയ്യുകയും ചെയ്തു.
