വനിതാബിൽ, ഡീ ലിമിറ്റേഷൻ: എൻഡിഎ സർക്കാരിനെ പിന്തുണയ്‌ക്കുമോ ശരദ്പവാർ എൻസിപി വിഭാഗം? മഹാരാഷ്‌ട്ര രാഷ്‌ട്രീയം ന്യൂദൽഹിയിൽ പ്രകടമാകുന്നു

ന്യൂദൽഹി: നാഷണലിസ്റ്റ് കോൺഗ്രസ് പാർട്ടി (ശരദ് പവാർ വിഭാഗം) പാർലമെന്റിന്റെ വരാനിരിക്കുന്ന മൺസൂൺ സമ്മേളനത്തിൽ വനിതാ സംവരണ ബില്ലിനെയും ഡീലിമിറ്റേഷൻ ബില്ലിനെയും പിന്തുണയ്‌ക്കാൻ സാധ്യതയുണ്ടെന്ന് വാർത്തകൾ. ശരദ് പവാറിന്റെ നേതൃത്വത്തിലുള്ള ക്യാമ്പിന്റെ തന്ത്രപരമായ തീരുമാനമായാണ് ഈ നീക്കത്തെ കാണുന്നത്, ദേശീയ ജനാധിപത്യ സഖ്യത്തിൽ (എൻഡിഎ) ഔപചാരികമായി ചേരാതെ രണ്ട് പ്രധാന നിയമനിർമ്മാണങ്ങൾക്ക് അനുകൂലമായി വോട്ട് ചെയ്യുമെന്ന് പ്രതീക്ഷിക്കുന്നതായി അവർ പറയുന്നു.
എൻസിപിക്ക് (ശരദ് പവാർ വിഭാഗം) എട്ട് എംപിമാരാണ്.

ശരദ് പവാർ വിഭാഗത്തിലെ ചിലർ എൻഡിഎയുമായി സഹകരിക്കുന്നതിൽ വിയോജിക്കുന്നുണ്ട്. അതിനാൽ സംഘടനയ്‌ക്കുള്ളിൽ സാധ്യമായ പിളർപ്പ് തടയാനും ലക്ഷ്യമിട്ടാണ് പുറത്തുനിന്നുള്ള പിന്തുണ എന്ന് അവർ വിശദീകരിക്കുന്നു.

എൻസിപി രണ്ട് വിഭാഗങ്ങളായി
2023 ൽ മഹാരാഷ്‌ട്രയിലെ മുൻ ഉപമുഖ്യമന്ത്രി അജിത് പവാറും നിരവധി എംഎൽഎമാരും ശരദ് പവാറിനെ ഉപേക്ഷിച്ച് സംസ്ഥാന ഭരണകക്ഷിയായ മഹായുതിയുമായി കൈകോർത്തപ്പോൾ എൻസിപി രണ്ട് വിഭാഗങ്ങളായി പിരിഞ്ഞു. അങ്ങനെ അജിത് വിഭാഗം ബിജെപി- എൻഡിഎ സഖ്യത്തിൽ ചേർന്ന് മഹാരാഷ്‌ട്രയിൽ അവർക്ക് ഉപമുഖ്യമന്ത്രിസ്ഥാനം വരെ ലഭിച്ചു. അജിത് പവാറിന്റെ ഹെലികോപ്ടർ അപകടമരണത്തിനു ശേഷം (2026 ജനുവരി) ഭാര്യ സുനേത്ര പവാറാണ് ഉപമുഖ്യമന്ത്രി. പാർട്ടി പിളർന്നപ്പോൾ യഥാർത്ഥ എൻസിപി അജിത് വിഭാഗമായി. ശേഷിച്ചവരാണ് ശരദ് വിഭാഗത്തിൽ. ശരദ് പവാറിന്റെ വലംകൈ ആയിരുന്ന പ്രഫുൽ പട്ടേലാണ് അജിത് പവാർ കഴിഞ്ഞാൽ എൻസിപിയിൽ മുഖ്യൻ. എന്നാൽ, അടുത്തിടെ പാർട്ടി പുനസ്സംഘടിപ്പിച്ചപ്പോൾ സുനേത്ര പവാർതന്നെ പാർട്ടി അദ്ധ്യക്ഷ സ്ഥനം കൈയിൽവെച്ചു. പ്രഫുൽ പട്ടേൽ വർക്കിങ് പ്രസിഡന്റായി. മഹാരാഷ്‌ട്ര സംസ്ഥാന പ്രസിഡന്റായി സുനിൽ തത്കാറേ നിയോഗിക്കപ്പെട്ടു. പക്ഷേ സുനേത്രയുടെ താൽപര്യത്തിനു വിരുദ്ധമായാണ് സുനിലിനെ അദ്ധ്യക്ഷനാക്കിയത്. സുനേത്രയുടെ മകൻ പാർത്ഥ് പവാറിന്റെ എതിർപ്പും മറികടന്നാണ് സുനിലിന് പദവി നൽകിയത്. അതായത്, യഥാർത്ഥ എൻസിപിയിൽ കുഴപ്പങ്ങൾ രൂക്ഷമാണ്. സുനേത്രയും മകൻ പാർത്ഥും ഒരു പക്ഷത്തും പ്രഫുൽ പട്ടേലും സുനിൽ തത്കാറും മറ്റൊരു പക്ഷത്തുമാണ്.
2024 ലെ നിയമസഭാ തെരഞ്ഞെടുപ്പിൽ എൻസിപിക്ക് 41 സീറ്റും (2019 ലേതിൽനിന്ന് 13 കുറവ്) ശരദ് പവാർ വിഭാഗത്തിന് 10 (പൂജ്യത്തിൽനിന്ന്) സീറ്റുമാണ്. ബിജെപിയും മുഖ്യമന്ത്രി ഫഡ്‌നാവിസും രണ്ടു വിഭാഗത്തേയും ഒന്നിപ്പിക്കാനോ രണ്ടുകൂട്ടരേയും ഒപ്പം നിർത്താനോ ആണ് ശ്രമിക്കുന്നത്.

ഫഡ്‌നാവിസ് രാഷ്‌ട്രീയ ചർച്ചകൾ
എൻസിപിയുടെ ഇരുവിഭാഗങ്ങളുമായി മഹാരാഷ്‌ട്ര മുഖ്യമന്ത്രി ദേവേന്ദ്ര ഫഡ്‌നാവിസ് രാഷ്‌ട്രീയ ചർച്ചകൾ നടത്തുന്നണ്ട്. ശിവസേന എന്ന പാർട്ടി തമ്മിൽ പിരിഞ്ഞ് സംസ്ഥാനത്ത് ഒന്നുമല്ലാതായിപ്പോയതും ബിജെപിയോട് ചേർന്ന് ഏക്‌നാഥ് ഷിൻഡേ വിഭാഗം ശക്തിപ്പെട്ടതും ഇപ്പോൾ ശിവസേനയുടെ ഉദ്ധവ് താക്കറെ വിഭാഗവും ബിജെപിയോട് അടുക്കുന്നതും മഹാരാഷ്‌ട്രയിലെ രാഷ്‌ട്രീയ സംഭവ വികാസങ്ങളാണ്.
എൻസിപിയുടെ ഇരു വിഭാഗങ്ങളിലെയും മുതിർന്ന നേതാക്കളും മഹാരാഷ്‌ട്ര മുഖ്യമന്ത്രി ദേവേന്ദ്ര ഫഡ്‌നാവിസും തമ്മിൽ ചൊവ്വാഴ്ച നടത്തിയ കൂടിക്കാഴ്ചകൾ ശരദ് പവാറിന്റെ അടുത്ത രാഷ്‌ട്രീയ നീക്കത്തെക്കുറിച്ചും പാർട്ടിയുടെ ഭാവി ഗതിയെക്കുറിച്ചുമുള്ള പുതിയ ഊഹാപോഹങ്ങൾക്ക് കാരണമാവുകയായിരുന്നു.
അജിത് പവാറിന്റെ നേതൃത്വത്തിലുള്ള വിഭാഗത്തിൽ നിന്നുള്ള എൻസിപി നേതാവ് പ്രഫുൽ പട്ടേലും സംസ്ഥാന ഘടകം അധ്യക്ഷൻ സുനിൽ തത്കരെയും മുംബൈയിലെ ഔദ്യോഗിക വസതിയിൽ ഫഡ്‌നാവിസിനെ കണ്ടിരുന്നു. പിന്നാലെ ശരദ് പവാറിന്റെ നേതൃത്വത്തിലുള്ള വിഭാഗത്തിലെ മുതിർന്ന നേതാവ് ജയന്ത് പാട്ടീലും മുഖ്യമന്ത്രിയുടെ വസതിയിലെത്തി.

ഭിന്നത ഇല്ലാതാക്കാൻ

കൂടിക്കാഴ്ചകൾക്ക് ശേഷം ഇരു പാർട്ടി ഘടകങ്ങളും ഔദ്യോഗിക വിശദീകരണം ലഭിക്കാത്തതിനാൽ, ഊഹാപോഹങ്ങൾ വ്യാപകമാകുകയാണ്. ചിലർ ഈ വികസനത്തെ എൻസിപിക്കുള്ളിലെ ഭിന്നത ഇല്ലാതാക്കാനുള്ള ശ്രമമായി വീക്ഷിക്കുമ്പോൾ, മറ്റുള്ളവർ ഇത് ഒരു പുതിയ രാഷ്‌ട്രീയ പുനക്രമീകരണത്തെ സൂചിപ്പിക്കുമെന്ന് വിശ്വസിക്കുന്നു.

പാർലമെന്റിന്റെ വർഷകാല സമ്മേളനം ജൂലൈ 20ന് ആരംഭിക്കും. ലോക്‌സഭാ സീറ്റുകൾ 850 ആയി ഉയർത്താനും പാർലമെന്റിന്റെ മൺസൂൺ സമ്മേളനത്തിൽ ഡീലിമിറ്റേഷൻ ആരംഭിക്കാനും നിർദ്ദേശിക്കുന്ന ഭരണഘടന (131 -ാം ഭേദഗതി) ബിൽ കൊണ്ടുവരാനാണ് സർക്കാർ ഉദ്ദേശിക്കുന്നത്. ഈ ബില്ലിന് ലോക്‌സഭയിൽ എട്ട് എൻസിപി ശരദ് പവാർ വിഭാഗത്തിന്റെ വോട്ട് കിട്ടിയാൽ പുതിയ രാഷ്‌ട്രീയ നീക്കങ്ങളുടെ വിജയകരമായ പരിണാമമാകും അത്.