തിരുവനന്തപുരം: പരീക്ഷാ ക്രമക്കേടില്‍ സര്‍ക്കാര്‍ പ്രഖ്യാപിച്ച ക്രൈം ബ്രാഞ്ച് അന്വേഷണത്തോട് സഹകരിക്കുമെന്ന് പിഎസ്സി.ഇന്ന് ചേര്‍ന്ന ബോര്‍ഡ് യോഗത്തിലാണ് പി എസ് സി തീരുമാനമെടുത്തത്.അന്വേഷണസംഘം ആവശ്യപ്പെടുന്ന രേഖകള്‍ കൈമാറും.സര്‍ക്കാരുമായി ഏറ്റുമുട്ടേണ്ട സാഹചര്യം ഇല്ലെന്നാണ് യോഗത്തില്‍ വിലയിരുത്തല്‍ ഉണ്ടായത്.
സര്‍ക്കാരുമായി ഏറ്റുമുട്ടുന്നത് കൂടുതല്‍ വിഷയങ്ങളിലേക്ക് നയിക്കും എന്നാണ് പി എസ് സി ബോര്‍ഡ് യോഗം വിലയിരുത്തിയത്.പി എസ് സിക്കെതിരെ ഉയര്‍ന്ന ആരോപണങ്ങളുടെ നിജസ്ഥിതി കണ്ടെത്തണം. വസ്തുത അന്വേഷണത്തിലൂടെ പൊതു സമൂഹത്തിന് ബോധ്യമാകേണ്ടത് കമ്മീഷന്റെ കൂടി ആവശ്യകതയെന്നും യോഗത്തില്‍ അഭിപ്രായമുയര്‍ന്നു.
അതിനിടെ, പി എസ് സി ചെയര്‍മാന്‍ എം ആര്‍ ബൈജുവിന്റെ ഏകപക്ഷീയ തീരുമാനങ്ങള്‍ വിവാദങ്ങള്‍ക്ക് ആക്കംകൂട്ടി എന്നാണ് യോഗത്തില്‍ വിമര്‍ശനമുണ്ടായത്.അതേസമയം പരാതിക്കാരുടെ മൊഴി രേഖപ്പെടുത്തി തുടങ്ങി.മൊഴികളും പിഎസ് സി നല്‍കുന്ന രേഖകളും പരിശോധിച്ച ശേഷം ആയിരിക്കും എഫ്ഐആര്‍ രജിസ്റ്റര്‍ ചെയ്ത കേസെടുക്കുന്ന കാര്യം തീരുമാനിക്കുക.ഓരോ ദിവസവും പരീക്ഷ ക്രമക്കേടുകളെ കുറിച്ച് പരാതികള്‍ എസ്ഐടിക്ക് ലഭിക്കുന്നുണ്ട്.
പിഎസ്സി പ്രഖ്യാപിച്ച ആഭ്യന്തര വിജിലന്‍സ് അന്വേഷണവും നടക്കുന്നു.
ക്രമക്കേട് കാട്ടി ഇടത് സംഘടനാ നേതാക്കള്‍ക്ക് നിയമനം നല്‍കിയെന്ന വാര്‍ത്ത പുറത്തുവന്നതോടെ പ്രതിരോധത്തിലായിരിക്കുകയാണ് പി എസ് സി.
