സെമിനാറുകൾ, യുവജന സമ്പർക്ക പരിപാടികൾ, രക്തദാന ക്യാമ്പുകൾ…..എബിവിപി സ്ഥാപക ദിനം വിപുലമായി ആഘോഷിച്ചു 

ന്യൂദൽഹി : അഖില ഭാരതീയ വിദ്യാർത്ഥി പരിഷത്തിന്റെ 78-ാം സ്ഥാപക ദിനമായ വ്യാഴാഴ്ച രാജ്യവ്യാപകമായി സേവന പ്രവർത്തനങ്ങളും സാംസ്കാരിക പരിപാടികളും സംഘടിപ്പിച്ചു. എബിവിപി സ്ഥാപക ദിനം ദേശീയ വിദ്യാർത്ഥി ദിനമായാണ് കൊണ്ടാടുന്നത്.

ദൽഹി സർവ്വകലാശാല, ജവഹർലാൽ നെഹ്രു സർവ്വകലാശാല, ബനാറസ് ഹിന്ദു സർവകലാശാല, മുംബൈ സർവ്വകലാശാല, ഹൈദരാബാദ് കേന്ദ്ര സർവ്വകലാശാല, പഞ്ചാബ് സർവ്വകലാശാല, എന്നിവിടങ്ങളിൽ നടന്ന ആഘോഷ പരിപാടികളിൽ നൂറുകണക്കിന് വിദ്യാർഥികൾ അണിചേർന്നിരുന്നു.

സെമിനാറുകൾ, യുവജന സമ്പർക്ക പരിപാടികൾ, രക്തദാന ക്യാമ്പുകൾ, വൃക്ഷത്തൈ നടീൽ , ശുചീകരണ യജ്ഞങ്ങൾ, കൗൺസിലിംഗ് സെഷനുകൾ, ഉപന്യാസ-വാദപ്രതിവാദ മത്സരങ്ങൾ, സാംസ്കാരിക പരിപാടികൾ, ബൗദ്ധിക ചർച്ചകൾ, എന്നിവ ആഘോഷങ്ങളുടെ ഭാഗമായി നടന്നു.

ദേശീയ വിദ്യാർത്ഥി ദിനത്തോടനുബന്ധിച്ച് എബിവിപി രാജ്യത്തെ മുഴുവൻ വിദ്യാർത്ഥികൾക്കും ഹൃദയം നിറഞ്ഞ ആശംസകൾ നേരുകയും, ഭാരതത്തിന്റെ ഉജ്ജ്വലമായ ഭാവി കെട്ടിപ്പടുക്കുന്നതിൽ സജീവമായി പങ്കാളികളാകാൻ ആഹ്വാനം ചെയ്യുകയും ചെയ്തു.

സ്റ്റുഡന്റ്സ് ഫോർ സേവ (SFS), സ്റ്റുഡന്റ്സ് ഫോർ ഡെവലപ്മെന്റ് (SFD), രാഷ്‌ട്രീയ കലാമഞ്ച് (RKM), ഖേലോ ഭാരത്, മിഷൻ സാഹസി, സ്റ്റുഡന്റ്സ് എക്സ്പീരിയൻസ് ഇൻ ഇന്റർസ്റ്റേറ്റ് ലിവിംഗ് (SEIL) തുടങ്ങിയ എബിവിപിയുടെ വിവിധ സർഗ്ഗാത്മക സംരംഭങ്ങളെയും സംഘടനാ തലങ്ങളെയും പരിപാടികളിലൂടെ വിദ്യാർത്ഥികൾക്ക് പരിചയപ്പെടുത്തി. വരും വർഷത്തിൽ നടപ്പിലാക്കാൻ ഉദ്ദേശിക്കുന്ന പ്രധാന രാജ്യവ്യാപക കാമ്പെയ്‌നുകളുടെയും സ്മരണാർത്ഥ പരിപാടികളുടെയും ഒരു രൂപരേഖയും എബിവിപി പങ്കുവെച്ചു. ‘സ്ക്രീൻ ടൈം ടു ആക്റ്റിവിറ്റി ടൈം’, ‘SEIL@60’, ‘വന്ദേമാതരത്തിന്റെ 150 വർഷങ്ങൾ’, ‘അടിയന്തരാവസ്ഥയ്‌ക്കെതിരായ പ്രതിരോധത്തിന്റെ 50 വർഷങ്ങൾ’, ‘ശ്രീ ഗുരു തേജ് ബഹാദൂറിന്റെ 350-ാം രക്തസാക്ഷിത്വ വാർഷികം’, ‘സന്ത് രവിദാസിന്റെ 650-ാം ജന്മവാർഷികം’ എന്നിവ ഇതിൽ ഉൾപ്പെടുന്നു.

7.7 ദശലക്ഷത്തിലധികം സജീവ അംഗങ്ങളുള്ള എബിവിപി ഇന്ന് ലോകത്തിലെ ഏറ്റവും വലിയ വിദ്യാർത്ഥി സംഘടനയാണ്, വിദ്യാർത്ഥി ശക്തിയെ രാഷ്‌ട്രശക്തിയാക്കി മാറ്റുന്നതിനായി ഇത് നിരന്തരം പ്രവർത്തിക്കുന്നു. വിദ്യാർത്ഥികളുടെ സമഗ്രമായ വികസനം, ഗുണമേന്മയുള്ള വിദ്യാഭ്യാസം, ദേശീയ സ്വഭാവ രൂപീകരണം എന്നിവയ്‌ക്കും വികസിത് ഭാരത് 2047 എന്ന സ്വപ്നത്തിലേക്ക് സർഗ്ഗാത്മകമായി സംഭാവന നൽകുന്നതിനും സംഘടന പ്രതിജ്ഞാബദ്ധമായി തുടരുന്നു.

എബിവിപി ദേശീയ ജനറൽ സെക്രട്ടറി ഡോ വീരേന്ദ്ര സിംഗ് സോളങ്കിയുടെ പ്രസ്താവന 

78 വർഷത്തെ യാത്രയിലുടനീളം, വിദ്യാർത്ഥികളുടെ സമഗ്രമായ വികസനത്തെ രാഷ്‌ട്രനിർമ്മാണമെന്ന വലിയ ലക്ഷ്യവുമായി ബന്ധിപ്പിക്കാൻ എബിവിപിക്ക് കഴിഞ്ഞിട്ടുണ്ട്.ഇന്ന് ലോകത്തിലെ ഏറ്റവും വലിയ വിദ്യാർത്ഥി സംഘടന എന്ന നിലയിൽ, സേവനം, സംഘടന, രാഷ്‌ട്രം ഒന്നാമത് എന്ന ചിന്ത എന്നിവയോടെ ഓരോ വിദ്യാർത്ഥിയിലേക്കും എത്തുവാൻ ഞങ്ങൾ പ്രതിജ്ഞാബദ്ധരാണ്.ദേശീയ വിദ്യാർത്ഥി ദിനത്തിൽ, രാജ്യത്തുടനീളമുള്ള എല്ലാ വിദ്യാർത്ഥികൾക്കും ഞാൻ എന്റെ ഹൃദയം നിറഞ്ഞ ആശംസകൾ നേരുന്നു. വികസിത് ഭാരത് 2047 കെട്ടിപ്പടുക്കുന്നതിൽ സജീവ പങ്കുവഹിച്ചുകൊണ്ട് അറിവ്, സ്വഭാവം, സാമൂഹിക പ്രതിബദ്ധത, ദേശസ്നേഹം എന്നിവയുടെ മൂല്യങ്ങൾ ഉൾക്കൊള്ളാൻ ഞാൻ ഈ അവസരത്തിൽ അവരോട് ആഹ്വാനം ചെയ്യുന്നു.