മുംബായ് : മഹാരാഷ്ട്രയില് ഏകീകൃത സിവില് കോഡ് തയ്യാറാക്കുന്നതിനായി റിട്ട. സുപ്രീം കോടതി ജസ്റ്റിസ് രഞ്ജന പ്രകാശ് ദേശായിയുടെ നേതൃത്വത്തില് ഏഴ് അംഗ സമിതിയെ നിയമിച്ചു. ബോംബെ ഹൈക്കോടതിയില് നിന്ന് വിരമിച്ച ജഡ്ജിമാരായ ആര്.സി.ചവാന്, എസ്.ജി.മെഹാരെ, മുന് ചീഫ് സെക്രട്ടറി ഡി.കെ. ജെയിന്, മുന് അഡ്വക്കേറ്റ് ജനറല് ബീരേന്ദ്ര സറഫ് , ഭരണഘടനാ വിദഗ്ദ്ധന് രമേശ് പതംഗെ, ആക്ടിവിസ്റ്റ് സുവര്ണ റാവല് എന്നിവരാണ് കമ്മിറ്റിയിലുള്ളത് .
നിയമസഭയുടെ ശീതകാല സമ്മേളനത്തില് ഇതു സംബന്ധിച്ചുള്ള ബില് സര്ക്കാര് അവതരിപ്പിച്ചേക്കും.
ഉത്തരാഖണ്ഡ് സര്ക്കാര് ഏകീകൃത സിവില് കോഡ് തയ്യാറാക്കാന് രൂപീകരിച്ച വിദഗ്ദ്ധ സമിതിയെ നയിച്ചതും ജസ്റ്റിസ് രഞ്ജന ദേശായിയാണ്.
വിവാഹം, വിവാഹമോചനം, അനന്തരാവകാശം, പിന്തുടര്ച്ചാവകാശം തുടങ്ങിയ കാര്യങ്ങളില് പൊതുവായ വ്യക്തിഗത നിയമങ്ങള് അവതരിപ്പിക്കുന്നതിന്റെ നിയമപരവും ഭരണപരവും സാമൂഹികവുമായ പ്രത്യാഘാതങ്ങള് പാനല് പരിശോധിക്കും. ഭരണഘടനയുടെ 44-ാം അനുച്ഛേദത്തില് ഒരു നിര്ദ്ദേശക തത്വമായി എല്ലാ പൗരന്മാര്ക്കും ഒരു ഏകീകൃത സിവില് കോഡ് ഉറപ്പാക്കാന് സംസ്ഥാനങ്ങള് പരിശ്രമിക്കണമെന്ന് നിര്ദേശിച്ചിട്ടുണ്ട്.
