ഫിഫ ലോകകപ്പ്: നാലായി ചുരുങ്ങാന്‍ എട്ട് കൂട്ടര്‍, ഇനി ക്വാര്‍ട്ടര്‍ ഫൈനല്‍ മത്സരങ്ങള്‍

അറ്റ്ലാന്റ: ഭാരത സമയം നാളെ പുലര്‍ച്ചെ 1.30ന് ആരംഭിക്കുന്ന മത്സരത്തോടെ ലോകകപ്പ് ഫുട്‌ബോള്‍ 2026ന്റെ ക്വാര്‍ട്ടര്‍ ഫൈനല്‍ മത്സരങ്ങള്‍ക്ക് തുടക്കമാകും. ഫോക്‌സ് ബറോയില്‍ നടക്കുന്ന ആദ്യ ക്വാര്‍ട്ടര്‍ പോരില്‍ നിലവിലെ റണ്ണറപ്പുകളായ ഫ്രാന്‍സും കഴിഞ്ഞ തവണ സെമി വരെ മുന്നേറിയ മൊറോക്കോയും തമ്മില്‍ ഏറ്റുമുട്ടും. നാളെ രാത്രി 12.30ന് രണ്ടാം ക്വാര്‍ട്ടര്‍ നടക്കും. ഞായറാഴ്‌ച്ച പുലര്‍ച്ചെ 2.30നും 6.30നുമായി നടക്കുന്ന രണ്ട് മത്സരങ്ങള്‍ കൂടി കഴിയുന്നതോടെ ക്വാര്‍ട്ടര്‍ തീരും. ഒപ്പം അടുത്ത ചൊവ്വ, ബുധന്‍ ദിവസങ്ങളിലായി നടക്കുന്ന സെമി പോരാട്ടത്തിനുള്ള ലൈനപ്പ് തയ്യാറാകും. കഴിഞ്ഞ ദിവസം നടന്ന അവസാന പ്രീ ക്വാര്‍ട്ടര്‍ മത്സരങ്ങളില്‍ അര്‍ജന്റീന ഈജിപ്തിനെയും സ്വിറ്റ്സര്‍ലന്‍ഡ് കൊളംബിയയെയും പരാജയപ്പെടുത്തി.

ക്വാര്‍ട്ടറില്‍ ഇവര്‍ മുഖാമുഖം

സ്‌പെയിന്‍-കൊളംബിയ

കരുത്തരായ പോര്‍ച്ചുഗലിനെ പ്രീക്വാര്‍ട്ടറില്‍ തളച്ച് നീണ്ട 16 വര്‍ഷത്തെ കാത്തിരിപ്പിനൊടുവില്‍ ലോകകപ്പ് സെമിയിലേക്ക് മുന്നേറാനാണ് നാളെ രാത്രി 12.30ന് സ്‌പെയിന്‍ ബെല്‍ജിയത്തെ നേരിടുക. ലോസ് ആഞ്ചലസിലാണ് മത്സരം. പ്രീക്വാര്‍ട്ടറില്‍ അമേരിക്കയെ 4-1ന് തകര്‍ത്താണ് സ്‌പെയിനെ നേരിടാന്‍ ബെല്‍ജിയം തയ്യാറെടുക്കുന്നത്. എട്ട് വര്‍ഷം മുമ്പ് പ്രതീക്ഷയോടെ സെമിയിലേക്ക് എത്തിയതിന്റെ ഓര്‍മകളുമായാണ് ബെല്‍ജിയം ഇന്ന് വീണ്ടും ക്വാര്‍ട്ടര്‍ കളിക്കാനിറങ്ങുന്നത്. 2018ല്‍ നടന്ന ആ ലോകകപ്പിന്റെ ക്വാര്‍ട്ടറില്‍ കരുത്തന്‍ ബ്രസീലിനെ തോല്‍പ്പിച്ചായിരുന്നു ബെല്‍ജിയത്തിന്റെ മുന്നേറ്റം.

നോര്‍വേ-ഇംഗ്ലണ്ട്

ഞായറാഴ്‌ച്ച പുലര്‍ച്ചെ 2.30ന് മയാമിയില്‍ നോര്‍വേ-ഇംഗ്ലണ്ട് ക്വാര്‍ട്ടര്‍ പോരാട്ടം നടക്കും. അഞ്ച് തവണ ലോക കിരീടം നേടിയ ബ്രസീലിനെ പ്രീക്വാര്‍ട്ടറില്‍ 2-1ന് തോല്‍പ്പിച്ചാണ് നോര്‍വേയുടെ വരവ്. ഈ പ്രീക്വാര്‍ട്ടര്‍ പോരാട്ടത്തിന് മുമ്പ് ബ്രസീലിനനുകൂലമായിരുന്ന 95 ശതമാനം പ്രവചനത്തെയും അട്ടിമറിച്ചുകൊണ്ടായിരുന്നു നോര്‍വേയുടെ വിജയം. ഇംഗ്ലണ്ട് ക്വാര്‍ട്ടറിലെത്തുന്നത് ആതിഥേയ ടീമുകളില്‍ ഒന്നായ മെക്‌സിക്കോയെ പ്രീക്വാര്‍ട്ടറില്‍ 3-2ന് തുരത്തിയാണ്. ആവേശകരമായ മത്സരത്തില്‍ പത്ത് പേരായി ചുരുങ്ങിയ ശേഷമായിരുന്നു ഇംഗ്ലണ്ടിന്റെ ഗംഭീര വിജയം. ഒരേ നിലവാരത്തില്‍ ടോട്ടല്‍ ഫുട്‌ബോള്‍ കളിക്കുന്ന ടീമുകളാണ് രണ്ടും. നോര്‍വേ പ്രതിരോധത്തില്‍ കൂടുതല്‍ ശ്രദ്ധയൂന്നുമ്പോള്‍ തനി പ്രീമിയര്‍ ലീഗ് ശൈലിയിലുള്ള സ്റ്റൈലിഷ് ഗെയിം ആണ് ഇംഗ്ലണ്ട് കാഴ്‌ച്ചവയ്‌ക്കുന്നത്.

അര്‍ജന്റീന-സ്വിറ്റ്‌സര്‍ലന്‍ഡ്

ഞായറാഴ്‌ച്ച രാവിലെ 6.30ന് നടക്കുന്ന അര്‍ജന്റീന-സ്വിറ്റ്‌സര്‍ലന്‍ഡ് പോരാട്ടത്തോടെ ഇത്തവണത്തെ ക്വാര്‍ട്ടര്‍ മത്സരങ്ങള്‍ കഴിയും. ആവേശക്കടലിരമ്പം കണ്ട മത്സരത്തില്‍ ഈജിപ്ത് വെല്ലുവിളിയെ 3-2ന് മറികടന്നാണ് നിലവിലെ ജേതാക്കളായ അര്‍ജന്റീനയുടെ ക്വാര്‍ട്ടര്‍ പ്രവേശം. കളിയുടെ 75 ശതമാനം സമയവും കളം നിറഞ്ഞ ഈജിപ്തിനെതിരായ പ്രീക്വാര്‍ട്ടറില്‍ അവസാനത്തെ 12 മിനിറ്റില്‍ മൂന്ന് ഗോളുകള്‍ നേടിയാണ് അര്‍ജന്റീന തിരിച്ചുവരവ് നടത്തി വിജയം പിടിച്ചെടുത്തത്. ഗ്രൂപ്പ് ഘട്ടം മുതല്‍ മികച്ച പോരാട്ടത്തോടെ മുന്നേറിയ കൊളംബിയയുടെ കഥ കഴിച്ചുകൊണ്ടാണ് സ്വിറ്റ്‌സര്‍ലന്‍ഡ് ക്വാര്‍ട്ടര്‍ പാസെടുത്തിരിക്കുന്നത്. കൊളംബിയ-സ്വിസ്സ് നിശ്ചിത സമയ മത്സരവും അധിക സമയ മത്സരവും ഗോളില്ലാതെ തീരുകയായിരുന്നു. വിജയിയെ നിര്‍ണയിക്കാന്‍ നടത്തിയ പെനാല്‍റ്റി ഷൂട്ടൗട്ടില്‍ സ്വിറ്റ്‌സര്‍ലന്‍ഡ് 4-3ന് ജയിച്ചുകൊണ്ട് അന്തിമ എട്ടില്‍ ഇടം കണ്ടെത്തുകയായിരുന്നു.