കൊച്ചി: പിണറായി വിജയന്റെ തിരുവനന്തപുരത്തെ വാടക വീട്ടില് പരിശോധന കഴിഞ്ഞിറങ്ങിയ എന്ഫോഴ്സ്മെന്റ് ഡയറക്ടറേറ്റ് (ഇഡി) സംഘത്തെ സി പി എം പ്രവര്ത്തകര് ആക്രമിച്ച സംഭവത്തില് സിബിഐ അന്വേഷണം വേണമെന്ന ആവശ്യം നിരാകരിച്ച് ഹൈക്കോടതി. കേസില് ഈ ഘട്ടത്തില് സിബിഐ അന്വേഷണം ആവശ്യമില്ലെന്ന് വിലയിരുത്തി ചീഫ് ജസ്റ്റിസ് സൗമന് സെന്നും ജസ്റ്റിസ് വി.എം. ശ്യാംകുമാറും ഉള്പ്പെട്ട ബഞ്ച് ഹര്ജി തീര്പ്പാക്കി.
അന്വേഷണം സംബന്ധിച്ച് സര്ക്കാര് ഇന്ന് ഹൈക്കോടതിയില് റിപ്പോര്ട്ട് നല്കി.മകള് ടി. വീണ പ്രതിയായ സിഎംആര്എല് – എക്സാലോജിക് പണമിടപാടുമായി ബന്ധപ്പെട്ടാണ് പിണറായി വിജയന്റെ വീട്ടില് ഇ ഡി പരിശോധന നടത്തിയത്.കേസുമായി ബന്ധപ്പെട്ട് 25ഓളം പേര് അറസ്റ്റിലായിരുന്നു. ഇതിനിടെയാണ് ഇഡിക്കെതിരെ നടന്ന ആക്രമണം സിബിഐ അന്വേഷിക്കണമെന്ന് ആവശ്യപ്പെട്ട് കണ്ണൂര് സ്വദേശി പൊതുതാല്പര്യ ഹര്ജിയുമായി ഹൈക്കോടതിയെ സമീപിച്ചത്.
ഇഡി ഉദ്യോഗസ്ഥര്ക്കെതിരായ ആക്രമണത്തിലെടുത്ത കേസില് അന്വേഷണം ഒച്ചിഴയും വേഗത്തിലാണെന്നതിനാല് സിബിഐ അന്വേഷണം വേണമെന്നായിരുന്നു ഹര്ജിക്കാരന് ആവശ്യമുന്നയിച്ചത്.
