ഡാളസ്: മുന്‍ ലോക ചാമ്പ്യന്‍മാരായ ജര്‍മനിയെ വരെ വിറപ്പിച്ച ആഫ്രിക്കന്‍ കരുത്തര്‍ ഐവറി കോസ്റ്റിന് ഇന്ന് ലോകകപ്പ് ഫുട്‌ബോള്‍ റൗണ്ട് ഓഫ് 32 പരീക്ഷണം. രാത്രി 10.30ന് ഡാളസില്‍ നടക്കുന്ന മത്സരത്തില്‍ ഐവറി നേരിടേണ്ടത് സൂപ്പര്‍ താരം എര്‍ലിങ് ഹാലന്‍ഡ് ഉള്‍പ്പെടുന്ന നോര്‍വേയെ.
ഗ്രൂപ്പ് ഇയില്‍ നിന്ന് ആറ് പോയിന്റോടെ രണ്ടാം സ്ഥാനക്കാരായാണ് ഐവറി കോസ്റ്റ് നോക്കൗട്ട് ബെര്‍ത്ത് ഉറപ്പിച്ചത്. ആദ്യ പോരാട്ടത്തില്‍ കരുത്തന്‍ ഇക്വഡോറിനെ 1-0ന് ഞെട്ടിച്ചു. രണ്ടാം മത്സരത്തില്‍ ജര്‍മനിയോട് തോറ്റെങ്കിലും മികച്ച പോരാട്ടം കാഴ്‌ച്ചവച്ച് 1-2നാണ് കീഴടങ്ങി. മൂന്നാം മത്സരത്തില്‍ കുറസാവോയെ 2-0ന് തോല്‍പ്പിച്ച് നോക്കൗട്ട് ബെര്‍ത്ത് ഉറപ്പിക്കുകയായിരുന്നു.
ഗ്രൂപ്പ് ഐയില്‍ നിന്ന് രണ്ടാം സ്ഥാനക്കാരായണ് നോര്‍വേയുടെ റൗണ്ട് ഓഫ് 32ലേക്കുള്ള വരവ്. ആദ്യ മത്സരത്തില്‍ ഇറാഖിനെ 4-1ന് പരാജയപ്പെടുത്തി. രണ്ടാം മത്സരത്തില്‍ സെനഗലില്‍ നിന്ന് വലിയ വെല്ലുവിളി നേരിട്ടു. ഒടുവില്‍ 3-2ന്റെ വിജയം കൈവരിച്ച് ആറ് പോയിന്റുമായി നോക്കൗട്ട് ബെര്‍ത്ത് ഉറപ്പാക്കി. മൂന്നാമത്തെയും അവസാനത്തെയും മത്സരത്തില്‍ ഗ്രൂപ്പ് ജേതാക്കളാകാന്‍ ഫ്രാന്‍സിനെതിരെ പോരടിച്ചു. മുന്‍നിര താരങ്ങളൊന്നടങ്കം വിട്ടു നിന്ന മത്സരത്തില്‍ 1-5ന്റെ കനത്ത തോല്‍വിയാണ് വഴങ്ങിയത്. അതിന് ശേഷം നോര്‍വെ ഇറങ്ങുന്ന മത്സരമാണ് ഇന്ന് നടക്കുന്നത്.
