തൃശൂര് : യു ഡി എഫില് വാളെടുത്തവരെല്ലാം വെളിച്ചപ്പാട് എന്ന രീതിയാണെന്ന് കോണ്ഗ്രസ് നേതാവും മുന് എക്സൈസ് മന്ത്രിയുമായ കെ ബാബു.യുഡിഎഫില് എക്സൈസ് നയം സുഗമമായി നടപ്പാക്കാന് കഴിയില്ലെന്നും അദ്ദേഹം പറഞ്ഞു.
ഓരോരുത്തര്ക്കും ഓരോ നയമാണ്. അവരെല്ലാം സര്ക്കാറിനെ സഹായിക്കാന് എന്നാണ് താന് കരുതുന്നത്.ഉമ്മന്ചാണ്ടി സര്ക്കാറിന്റെ കാലത്തും ആ പിന്തുണ നല്ലവണ്ണം കിട്ടിയിട്ടുണ്ട്. ബാറുകളുടെ സമയം യുഡിഎഫ് വെട്ടിക്കുറച്ചത് എല്ഡിഎഫ് പഴയ നിലയിലേക്ക് കൊണ്ടുവന്നു. എല്ഡിഎഫിന്റെ നയം നടപ്പാക്കുന്നതിന് അവരുടെ സര്ക്കാരിനോ എക്സൈസ് മന്ത്രിക്കോ പ്രയാസം ഉണ്ടാകില്ല. എന്നാല് യുഡിഎഫില് ഇതല്ല സ്ഥിതിയെന്നും കെ ബാബു പറഞ്ഞു.
വീര്യം കുറഞ്ഞ വിദേശ മദ്യത്തിന് നികുതി ഇളവ് നല്കുമെന്ന് മുഖ്യമന്ത്രി വി ഡി സതീശന് ബഡ്ജറ്റ് പ്രസംഗത്തില് പറഞ്ഞതിനെ എതിര്ത്ത് മുതിര്ന്ന കോണ്ഗ്രസ് നേതാവ് വി എം സുധീരന് രംഗത്തെത്തിയതിനെതിരെ ഒളിയമ്പെയ്യുക ആയിരുന്നു കെ ബാബു.
കോണ്ഗ്രസിനെ പരസ്യമായി വിമര്ശിച്ച് വിഎം സുധീരന് രംഗത്തെത്തിയതിനെതിരെ വിമര്ശനവുമായി നിരവധി നേതാക്കളാണ് രംഗത്ത് വന്നത്. ഇതിന്റെ തുടര്ച്ചയായാണ് വിഎം സുധീരനെ പരിഹസിച്ച് കെ ബാബു രംഗത്തെത്തിയത്.
വീര്യം കുറഞ്ഞ മദ്യം വില്ക്കാന് അനുമതി നല്കുന്ന വിഷയം യുഡിഎഫില് ചര്ച്ച ചെയ്യാന് തീരുമാനിക്കുമ്പോഴും, വി എം സുധീരന് കോണ്ഗ്രസിനെ പ്രതിരോധത്തില് ആക്കിയെന്ന അമര്ഷം പാര്ട്ടിക്കുള്ളിലെ ഒരു വിഭാഗം നേതാക്കള്ക്കുണ്ട്.ഒന്നാം തീയതി നിയമസഭയില് അവതരിപ്പിക്കുന്ന ധനബില്ലില് നിന്ന് നികുതിയിളവ് ഒഴിവാക്കണമെന്ന വി എം സുധീരന്റെ നിലപാടും യു ഡി എഫിന് തിരിച്ചടിയാണ്.
