ജനസംഖ്യാ വർദ്ധനവ് കൊണ്ടല്ല, വികസനം ഉദ്ദേശിച്ചാണ് മലപ്പുറം ജില്ലയെ വിഭജിക്കുന്നതെങ്കിൽ കേന്ദ്രഭരണപ്രദേശമാക്കണം ; വിശ്വഹിന്ദുപരിഷത്ത്

മലപ്പുറം : ജനസംഖ്യാ വർദ്ധനവ് കൊണ്ടല്ല, വികസനം ഉദ്ദേശിച്ചാണ് മലപ്പുറം ജില്ലയെ വിഭജിക്കേണ്ടതെങ്കിൽ കേന്ദ്രഭരണപ്രദേശമാക്കണമെന്ന് വിശ്വഹിന്ദു പരിഷത്ത് സംസ്ഥാന ജനറൽ സെക്രട്ടറി അഡ്വ. അനിൽ വിളയിൽ . കേന്ദ്രഭരണ പ്രദേശമായാൽ കേന്ദ്രത്തിന്റെ നേരിട്ടുള്ള ശ്രദ്ധ കൂടുതലായി വികസന പദ്ധതികൾക്കും അടിസ്ഥാന സൗകര്യ വികസനത്തിനും ലഭിക്കുമെന്നും അദ്ദേഹം ഫേസ്ബുക്ക് കുറിപ്പിൽ വ്യക്തമാക്കുന്നുണ്ട്.

മലബാറിന്റെ സമ്പൂർണ വികസനത്തിനും രാജ്യ സുരക്ഷയ്‌ക്കും വേണ്ടി കോഴിക്കോടോ മലപ്പുറമോ കേന്ദ്രമാക്കി കേന്ദ്രഭരണ പ്രദേശം വരുന്നതാണ് അഭികാമ്യമെന്നും അദ്ദേഹം ഫേസ്ബുക്ക് പോസ്റ്റിൽ പറയുന്നു.

ഫേസ്ബുക്ക് പോസ്റ്റ്…

മലപ്പുറം മൂന്നാകണോ?
മലബാർ കേന്ദ്ര ഭരണ പ്രദേശമാകണോ ?
മലപ്പുറം മാത്രം വികസിച്ചാൽ മതിയോ?
മലബാർ എന്നാൽ മലപ്പുറം മാത്രമോ ?
സതീശൻ മന്ത്രിസഭ ലീഗിന് കീഴടങ്ങിയോ
ലീഗും മുസ്ലിം സംഘടനകളും കുറെ ഏറെ നാളായി പറയുകയും ആവശ്യപ്പെടുകയും ചെയ്യുന്ന ഒരു കാര്യമാണ് മലപ്പുറത്തെ വിഭജിക്കണമെന്ന്. ഇന്നത്തെ ബജറ്റിൽ ഇതിന് അംഗീകാരം തത്വത്തിൽ നൽകിയ രീതിയിലാണ് മുഖ്യമന്ത്രി പ്രതീകരിച്ചതും. ജനസംഖ്യാ പെരുപ്പമല്ല വികസനം ഉദ്ദേശിച്ചാണ് മലപ്പുറം ജില്ലയെ വിഭജിക്കേണ്ടത് എങ്കിൽ മലബാറിന്റെ സമ്പൂർണ്ണ വികസനത്തിനും രാജ്യ സുരക്ഷയ്‌ക്കും കോഴിക്കോടോ മലപ്പുറമോ കേന്ദ്രമാക്കി ഒരു കേന്ദ്രഭരണ പ്രദേശം വരുന്നതാണ് നല്ലത്.ഇന്ന് കേരള മുഖ്യമന്ത്രി ജില്ലകളുടെ വിഭജനത്തിനുവേണ്ടി കമ്മീഷനെ വെക്കുമെന്ന് പറഞ്ഞിട്ടുണ്ട്. എന്തിനാണ് വെറുതെ ഇതിനൊക്കെ പണം മുടക്കുന്നത്. കേരളത്തിന്റെ സാമ്പത്തിക അവസ്ഥ ഇപ്പോൾ തന്നെ വളരെ പരിതാപകരമാണ് .ഏറ്റവും എളുപ്പമാർഗം മലബാറിന്റെ വികസനത്തിന് ഒരു പ്രത്യേക കേന്ദ്രഭരണ പ്രദേശം എന്നത് തന്നെയാണ്. കാരണങ്ങൾ
1)പ്രധാനമായും രാജ്യത്തിന്റെ തന്ത്ര പ്രധാനമായ പ്രദേശം എന്ന രീതിയിൽ കിട്ടുന്ന സുരക്ഷ. തീവ്രവാദ പ്രവർത്തനങ്ങൾ, കള്ളകടത്ത്, കടൽ വഴിയുള്ള രാജ്യവിരുദ്ധ പ്രവർത്തനങ്ങൾ എന്നിവയെ നിയന്ത്രിക്കാം
2)കേന്ദ്രത്തിന്റെ നേരിട്ടുള്ള ശ്രദ്ധ കൂടുതലായി വികസന പദ്ധതികൾക്കും അടിസ്ഥാന സൗകര്യ വികസനത്തിനും ലഭിക്കും
3)ദേശീയ പ്രാധാന്യമുള്ള പദ്ധതികൾക്ക് വേഗത്തിൽ അനുമതി ലഭിക്കാൻ സാധ്യത
4)അടിസ്ഥാന സൗകര്യ വികസനം
ദേശീയപാതകൾ, റെയിൽവേ, വിമാനത്താവളങ്ങൾ, തുറമുഖങ്ങൾ എന്നിവയുടെ വികസനത്തിന് കൂടുതൽ മുൻഗണന
5)ഭരണ കാര്യക്ഷമത- ഭരണപരമായ നടപടികളിലെ ചില കാലതാമസങ്ങൾ കുറയും.
6)കേന്ദ്രസർക്കാർ പ്രത്യേക സാമ്പത്തിക പാക്കേജുകൾ പ്രഖ്യാപിക്കുകയാണ് എങ്കിൽ തൊഴിൽ, വ്യവസായം, ടൂറിസം മേഖലകളിൽ വളർച്ച ഉണ്ടാകും
7)പ്രാദേശിക പ്രശ്നങ്ങൾക്ക് പ്രത്യേക ശ്രദ്ധ – മലബാറിലെ പിന്നാക്കാവസ്ഥ, തീരദേശ വികസനം, കുടിയേറ്റവുമായി ബന്ധപ്പെട്ട പ്രശ്നങ്ങൾ എന്നിവയ്‌ക്ക് പ്രത്യേകം നയങ്ങൾ രൂപപ്പെടുത്താൻ സാധ്യത
8)അടിസ്ഥാന സൗകര്യങ്ങൾ: തെക്കൻ കേരളത്തെ അപേക്ഷിച്ച് റോഡുകൾ, പാലങ്ങൾ എന്നിവയുടെ വികസനം മലബാറിൽ കുറവാണ്.
9)ആരോഗ്യ മേഖല: മെഡിക്കൽ കോളേജുകളും സൂപ്പർ സ്പെഷ്യാലിറ്റി ആശുപത്രികളും മലബാർ മേഖലയിൽ ആവശ്യത്തിനില്ല.
10)വിദ്യാഭ്യാസം: ഹയർ സെക്കൻഡറി സീറ്റുകളുടെ ദൗർലഭ്യവും പ്രൊഫഷണൽ കോളേജുകളുടെ കുറവും വലിയ പ്രശ്നമാണ്.
ഭരണഘടനയുടെ ആർട്ടിക്കിൾ 3പ്രകാരം കേന്ദ്ര സർക്കാരിന് പുതിയ സംസ്ഥാനങ്ങൾ രൂപീകരിക്കാം.നിലവിൽ ഭൂമിശാസ്ത്രപരമായി മലബാറിൽ സ്ഥിതി ചെയ്യുന്ന പോണ്ടിച്ചേരിയുടെ ഭാഗമായ മാഹി കേന്ദ്രഭരണ പ്രദേശമാണ്. വിദ്യാഭ്യാസം, ഗതാഗതം, വ്യവസായ വൽക്കരണം, ആരോഗ്യ മേഖല തുടങ്ങിയ കാര്യങ്ങളിൽ പിന്നിലാണ് മലബാർ മേഖല.
മലബാറിലെ ജില്ലകൾ കൂട്ടി ചേർത്ത് ഒരു കേന്ദ്രഭരണപ്രദേശം വരികയാണെങ്കിൽ രാജ്യത്തിന്റെ തന്ത്ര പ്രാധാന്യമുള്ള സ്ഥലം എന്ന രീതിയിലും വികസനത്തിന് കുറവുള്ള സ്ഥലം എന്ന രീതിയിലും മലബാറിന്റെ വികസനം കൂടുവാൻ സാധ്യതയുണ്ട്. കേന്ദ്ര സർക്കാരിന്റെ നേരിട്ടുള്ള നിയന്ത്രണത്തിലാകുമ്പോൾ മേൽ പറഞ്ഞ പ്രശ്നങൾക്ക് ഒരു പരിധി വരെ പുരോഗതിയും ഉണ്ടാകും. ജമ്മുകാശ്‌മീർ സംസ്ഥാനത്തു നിന്നും ലഡാക്ക് വേർപെടുത്തി കേന്ദ്രഭരണ പ്രദേശമാക്കി മാറ്റിയതു പോലെ മലബാർ എന്ന കേന്ദ്രഭരണ പ്രദേശം ഭാവിയിൽ ഉണ്ടായാൽ നന്ന്.